महत्वाच्या बातम्या

समाजकार्याचे शिक्षण हे केवळ करिअर नसून समाजपरिवर्तनाचे प्रभावी माध्यम आहे : कुंदन खोब्रागडे

विदर्भ न्युज एक्सप्रेस
तालुका प्रतिनिधी / सिंदेवाही : स्व.सुशीलाबाई रामचंद्रराव मामीडवार कॉलेज ऑफ सोशल वर्क, पडोली, चंद्रपूर येथे बी.एस.डब्ल्यू. प्रथम वर्षातील नव्याने प्रवेश घेतलेल्या विद्यार्थ्यांसाठी पूर्वाभिमुख कार्यक्रमाचे आयोजन १६ जुलै २०२६ रोजी गुरुवार का उत्साहात करण्यात आले. या कार्यक्रमाचा मुख्य उद्देश विद्यार्थ्यांना सामाजिक कार्य शिक्षणाची सखोल ओळख करून देणे, त्यांच्या करिअरची दिशा स्पष्ट करणे आणि समाजसेवेची जाणीव निर्माण करणे हा होता.

या कार्यक्रमात प्रमुख मार्गदर्शक म्हणून मेडिकल सोशल वर्कर कुंदन सतीश खोब्रागडे उपस्थित होते. त्यांनी माझा सामाजिक कार्य शिक्षण क्षेत्रातील प्रवास या विषयावर अत्यंत प्रेरणादायी व मार्गदर्शक असे व्याख्यान दिले. सदर कार्यक्रम महाविद्यालयाच्या प्रभारी प्राचार्या डॉ. ममता ठाकूरवार यांच्या मार्गदर्शनाखाली पार पडला असून कार्यक्रमाचे उत्कृष्ट संयोजन डॉ. किरणकुमार मनुरे यांनी केले.

आपल्या मार्गदर्शनात कुंदन खोब्रागडे यांनी स्वतःच्या शैक्षणिक व व्यावसायिक प्रवासाचा आढावा घेत विद्यार्थ्यांसमोर वास्तव अनुभव मांडले.

त्यांनी सांगितले की, सामाजिक कार्य हे केवळ नोकरी किंवा करिअरचा पर्याय नसून समाजात सकारात्मक बदल घडवून आणण्याचे प्रभावी साधन आहे. त्यांनी विद्यार्थ्यांना समाजातील वंचित, दुर्बल आणि गरजू घटकांसाठी कार्य करण्याची प्रेरणा देत समाजासाठी काम करताना संवेदनशीलता, सहानुभूती आणि समर्पण हीच खरी ओळख आहे असे मत व्यक्त केले.

यावेळी त्यांनी सामाजिक कार्य शिक्षणातील विविध घटकांवर प्रकाश टाकत अभ्यासक्रमातील प्रात्यक्षिक कार्य, फील्ड वर्क, संशोधन आणि सामाजिक समस्या यांचा अभ्यास किती महत्त्वाचा आहे हे स्पष्ट केले.

मेडिकल व सायकेट्रिक सोशल वर्क या विशेष क्षेत्रातील संधींबाबत माहिती देताना त्यांनी रुग्णालयांमध्ये समाजसेवकांची भूमिका, रुग्ण व त्यांच्या कुटुंबीयांना दिला जाणारा मानसिक आधार, तसेच आरोग्य क्षेत्रातील सामाजिक कार्याची गरज यावर सविस्तर मार्गदर्शन केले.

तसेच, त्यांनी ग्रामीण भागातील सामाजिक समस्यांवर काम करण्याची आवश्यकता अधोरेखित करत विद्यार्थ्यांना प्रत्यक्ष क्षेत्रात जाऊन अनुभव घेण्याचा सल्ला दिला. संशोधनाचे महत्त्व सांगताना त्यांनी सामाजिक समस्यांवर आधारित अभ्यास व प्रकल्पांमुळे विद्यार्थ्यांची विचारसरणी विकसित होते, असे नमूद केले. कार्यक्रमादरम्यान विद्यार्थ्यांनी उत्स्फूर्त प्रतिसाद देत विविध प्रश्न विचारले, ज्यांची उत्तरे मार्गदर्शकांनी समाधानकारक पद्धतीने दिली.

या संवादात्मक सत्रामुळे विद्यार्थ्यांमध्ये सामाजिक कार्य क्षेत्राबद्दल अधिक स्पष्टता आणि आत्मविश्वास निर्माण झाला. कार्यक्रमाच्या शेवटी विद्यार्थ्यांनी मार्गदर्शकांचे मनःपूर्वक आभार मानत भविष्यात सामाजिक कार्य क्षेत्रात प्रामाणिकपणे काम करण्याचा निर्धार व्यक्त केला.

महाविद्यालयाच्या वतीनेही अशा उपक्रमांमुळे विद्यार्थ्यांच्या सर्वांगीण विकासास चालना मिळते आणि त्यांच्यात समाजाभिमुख दृष्टिकोन विकसित होतो, असे मत व्यक्त करण्यात आले. हा पूर्वाभिमुख कार्यक्रम विद्यार्थ्यांसाठी प्रेरणादायी ठरला असून त्यांच्या भविष्यातील सामाजिक कार्याच्या प्रवासाला सकारात्मक दिशा देणारा ठरला आहे.