महत्वाच्या बातम्या

कळमेश्वर : शेतातील वादातून मोठ्या भावाने लहान भावाची गोळ्या झाडून केली हत्या

- कौटुंबिक वादामुळे धक्कादायक हत्या, आरोपी अटक

विदर्भ न्यूज एक्सप्रेस
प्रतिनिधी / कळमेश्वर : कळमेश्वर तालुक्यातील मोहगाव-सावंगी शिवारात शनिवारी रात्री शेतातील पाणीवाटपावरून झालेल्या कौटुंबिक वादामुळे मोठ्या भावाने लहान भावाची गोळ्या झाडून हत्या केली. मृतकाचे नाव अरुण रामाजी तुरारे (४३, रा. धनगरपुरा, कळमेश्वर) असून, याप्रकरणी आरोपी चंद्रशेखर रामाजी तुरारे (वय ५३) याला पोलिसांनी अटक केली आहे.

शनिवारी रात्री ११ वाजताच्या सुमारास वन विभागाच्या पथकाला चंद्रशेखर आणि देवेंद्र यांच्या शेतालगतच्या नाल्याजवळ जळत असल्याचे दिसले. तपास केल्यावर तेथे मानवी हाडे व मांस जळालेल्या अवस्थेत आढळले. कळमेश्वर पोलिसांनी घटनास्थळी तातडीने तपास सुरू केला.

घटनेची पार्श्वभूमी: कौटुंबिक वाद आणि कुटुंबीयांचा संघर्ष -
अरुण आणि चंद्रशेखर यांच्यात शेतातील पाणीवाटपावरून तीन वर्षांपासून वाद सुरू होते. याच काळात अरुणच्या बहिणीने जेसीबीच्या सहाय्याने शेतातील रस्ता तयार केला होता, ज्यावरून चंद्रशेखर, अरुण आणि बहिण लता यांच्यात वाद झाला. पोलिसांच्या मते, या वादामुळे आरोपीच्या मनात राग वाढला आणि त्याने हत्या करण्याचा निर्णय घेतला.

दुपट्ट्यावर रक्ताचे डाग आणि बेपत्ता अरुण -
शनिवारी सकाळी ९:३० वाजता अरुण शेतात कामासाठी गेला होता. दुपारी शेतात जेवण केल्यानंतर अरुण आपल्या शेतात ट्रॅक्टरने नांगरणी करण्यासाठी गेला. सायंकाळी, ज्योत्स्ना शेतात परतल्यावर ट्रॅक्टर सुरू अवस्थेत उभे होते आणि त्याच्या चपला व दुपट्ट्यावर रक्ताचे डाग आढळले. यामुळे संशय बळावला, आणि अरुणच्या बेपत्ता होण्याची तक्रार पोलिसांत दाखल केली.

तीव्र वाद: शेतातील वाटणी आणि वादग्रस्त संबंध -
अरुण, चंद्रशेखर आणि देवेंद्र यांच्यात शेतातील वाटणी आणि पाणीवाटपावरून वाद सुरू होते. मागील तीन वर्षांपासून हे वाद चांगलेच तीव्र झाले होते. यामुळे यापूर्वीही पोलिस ठाण्यात तक्रारी दाखल झाल्या होत्या.

आरोपीने कबूल केली हत्या -
पोलिसांनी चंद्रशेखर तुरारे याला ताब्यात घेतल्यानंतर, चौकशीत त्याने कबूल केले की, त्याने अरुणची हत्या केली आणि पुरावे नष्ट करण्यासाठी मृतदेह नाल्यात टाकून पेट्रोल टाकून जाळला. यावरून पोलिसांनी त्याला अटक केली आहे.

याप्रकरणी अरुणच्या पत्नी ज्योत्स्ना यांनी दिलेल्या तक्रारीवरून खून आणि पुरावे नष्ट करण्याचा गुन्हा दाखल करण्यात आला आहे.