जिल्ह्यातील बंद धान खरेदी केंद्रे तातडीने सुरू करा!


- आमदार रामदास मसराम यांचे आदिवासी विकास महामंडळाच्या अधिकाऱ्यांना निर्देश; शेतकरी नोंदणी प्रक्रिया सुरू करण्याचीही मागणी
विदर्भ न्यूज एक्सप्रेस
प्रतिनिधी / गडचिरोली : खरीप हंगामातील धान कापणी आणि मळणीची कामे अंतिम टप्प्यात आली असताना आदिवासी विकास महामंडळाची अनेक धान खरेदी केंद्रे अद्याप बंद असल्याने शेतकऱ्यांसमोर अडचणी निर्माण झाल्या आहेत. धान विक्रीसाठी केंद्रे सुरू होण्याची प्रतीक्षा करावी लागत असल्याने शेतकऱ्यांमध्ये नाराजी व्यक्त होत आहे. या परिस्थितीची दखल घेत आमदार रामदास मसराम यांनी २० नोव्हेंबर रोजी गडचिरोली येथील आदिवासी विकास महामंडळाच्या प्रादेशिक कार्यालयाला भेट देऊन प्रादेशिक व्यवस्थापक सोपान संबारे यांच्याशी चर्चा केली. जिल्ह्यातील बंद असलेली सर्व धान खरेदी केंद्रे तातडीने सुरू करण्याचे तसेच ज्या केंद्रांवरील शेतकरी नोंदणी प्रक्रिया बंद आहे, ती त्वरित सुरू करण्याचे निर्देश त्यांनी यावेळी दिले.
धान हे गडचिरोली जिल्ह्यातील शेतकऱ्यांचे प्रमुख खरीप पीक आहे. मोठ्या कष्टाने पिकविलेल्या धानाची विक्री करून शेतकरी पुढील हंगामाच्या तयारीसह कुटुंबाचा आर्थिक खर्च भागविण्याचे नियोजन करतात. मात्र, हंगाम सुरू असतानाही आदिवासी विकास महामंडळाची धान खरेदी केंद्रे बंद असल्याने शेतकऱ्यांना आपले धान विक्रीसाठी अडचणींचा सामना करावा लागत आहे. त्यातच काही केंद्रांवर शेतकरी नोंदणी प्रक्रिया बंद असल्याने शेतकऱ्यांची गैरसोय वाढली आहे. या पार्श्वभूमीवर आमदार रामदास मसराम यांनी महामंडळाच्या प्रादेशिक कार्यालयात जाऊन अधिकाऱ्यांशी प्रत्यक्ष चर्चा केली. जिल्ह्यातील बंद असलेली धान खरेदी केंद्रे तातडीने सुरू करून शेतकऱ्यांना धान विक्रीची सुविधा उपलब्ध करून द्यावी. ज्या केंद्रांवर अद्याप शेतकऱ्यांची नोंदणी झालेली नाही किंवा नोंदणी प्रक्रिया बंद आहे, तेथे ती त्वरित सुरू करावी, अशी स्पष्ट मागणी त्यांनी केली.
धान खरेदी प्रक्रियेत होणाऱ्या विलंबामुळे शेतकऱ्यांचे आर्थिक नुकसान होऊ नये, याची प्रशासनाने विशेष काळजी घ्यावी. शेतकऱ्यांना नोंदणीसाठी किंवा धान विक्रीसाठी वारंवार खरेदी केंद्रांवर चकरा मारण्याची वेळ येऊ नये. खरेदी प्रक्रियेतील तांत्रिक व प्रशासकीय अडचणी तातडीने दूर करून शेतकऱ्यांना दिलासा द्यावा, असेही आमदार मसराम यांनी अधिकाऱ्यांना सांगितले. यावेळी प्रादेशिक व्यवस्थापक सोपान संबारे यांच्याशी धान खरेदी केंद्रांच्या सद्यस्थितीबाबत चर्चा करण्यात आली. धान खरेदी प्रक्रिया सुरळीत होण्यासाठी आवश्यक ती कार्यवाही करण्यावरही भर देण्यात आला. शेतकऱ्यांना त्यांच्या उत्पादित धानाची वेळेत विक्री करता यावी आणि शासकीय धान खरेदी योजनेचा लाभ मिळावा, यासाठी संबंधित यंत्रणेने तत्परतेने काम करणे आवश्यक असल्याचे आमदार मसराम यांनी यावेळी अधोरेखित केले.
या भेटीप्रसंगी माजी जिल्हा परिषद उपाध्यक्ष जीवन नाट, मिलिंद खोब्रागडे, जयंत हरडे, प्रभाकर तुलावी, गिरीधर तीतराम आदी उपस्थित होते. धान खरेदी केंद्रे वेळेत सुरू होऊन नोंदणी प्रक्रिया सुरळीत झाल्यास जिल्ह्यातील धान उत्पादक शेतकऱ्यांना मोठा दिलासा मिळणार आहे. त्यामुळे महामंडळाचे अधिकारी या निर्देशांची कितपत आणि किती लवकर अंमलबजावणी करतात, याकडे आता शेतकरी वर्गाचे लक्ष लागले आहे.




Petrol Price




