महत्वाच्या बातम्या

 स्वातंत्र्याच्या ७९ वर्षांनंतरही बिऱ्हाड घाटवासीयांचा डोंगीने धोकादायक प्रवास!


- इंद्रावती नदीवर पुलाची प्रतीक्षा कायम; पूल झाल्यास महाराष्ट्र-छत्तीसगडमधील दळणवळणाला मिळणार चालना

विदर्भ न्यूज एक्सप्रेस 
तालुका प्रतिनिधी / अहेरी : स्वातंत्र्याच्या ७९ वर्षांनंतरही अहेरी तालुक्यातील बिऱ्हाडघाट येथील नागरिकांना इंद्रावती नदी ओलांडण्यासाठी डोंगीचा आधार घ्यावा लागत आहे. महाराष्ट्र आणि छत्तीसगड या दोन राज्यांना जोडणाऱ्या या महत्त्वाच्या मार्गावर अद्याप पूल उभारण्यात आलेला नाही.

त्यामुळे नागरिकांना दुचाकी आणि जीवनावश्यक साहित्य घेऊन जीव धोक्यात घालून नदी पार करावी लागत आहे. पुलाच्या बांधकामाला अद्याप शासनाची मंजुरी मिळाली नसल्याने सीमावर्ती भागातील नागरिकांमध्ये नाराजी आहे. बिऱ्हाडघाट हे अहेरीपासून सुमारे ७० किलोमीटर, तर जिमलगट्टा येथून अवघ्या २० किलोमीटर अंतरावर आहे.

येथून इंद्रावती नदी पार केल्यानंतर छत्तीसगड राज्याची सीमा सुरू होते. नदीपलीकडे असलेले भोपालपट्टणम हे परिसरातील महत्त्वाचे व्यापारी केंद्र असल्याने नागरिक बाजारपेठ, खरेदी आणि अन्य कामांसाठी तेथे जातात. मात्र, पूल नसल्याने त्यांना डोंगीतून धोकादायक प्रवास करावा लागतो. येथे पूल झाल्यास छत्तीसगडकडे जाण्यासाठीचा सुमारे १५० किलोमीटरचा फेरा वाचू शकतो.

आंतरराज्य दळणवळणाला मिळेल चालना -

बिऱ्हाडघाट येथे इंद्रावती नदीवर पूल उभारल्यास जिमलगट्टा-देचलीपेठा-भोपालपट्टणम-रायपूर हा आंतरराज्य मार्ग विकसित होण्यास मदत होईल. यामुळे व्यापार, शिक्षण, आरोग्यसेवा आणि स्थानिक बाजारपेठांपर्यंत पोहोचणे अधिक सुलभ होऊ शकते.

तसेच परिसरातील अनेक नाल्यांवरही पुलांचा अभाव असल्याने पावसाळ्यात दळणवळणाच्या अडचणी निर्माण होतात. त्यामुळे बिऱ्हाडघाट येथील इंद्रावती नदीवरील पुलासह परिसरातील अपूर्ण पायाभूत सुविधांच्या विकासासाठी शासनाने तातडीने लक्ष देण्याची मागणी नागरिकांकडून होत आहे.





  Print






Related Photos