आदिवासी समाजाच्या विकासासाठी सदैव खंबीर साथ देणार : आ. सुधीर मुनगंटीवार


विदर्भ न्यूज एक्सप्रेस
प्रतिनिधी / चंद्रपूर : भगवान बिरसा मुंडा यांच्या १५१ व्या जयंतीनिमित्त आणि जनजातीय गौरव दिनानिमित्त चंद्रपूर जिल्हाधिकारी कार्यालयासमोर आयोजित कार्यक्रमात आमदार सुधीर मुनगंटीवार यांनी भगवान बिरसा मुंडा यांच्या पुतळ्याला माल्यार्पण करून अभिवादन केले. यावेळी आदिवासी बांधवांच्या पारंपरिक नृत्यात सहभागी होत त्यांनी समाजाच्या उन्नतीसाठी सदैव खंबीरपणे साथ देण्याची ग्वाही दिली.
यावेळी भाजप जिल्हाध्यक्ष हरीश शर्मा, महापौर संगीता खांडेकर, भगवान बिरसा मुंडा स्मारक समितीचे अध्यक्ष अशोक तुमराम यांच्यासह अनेक मान्यवर उपस्थित होते.
आ. मुनगंटीवार म्हणाले की, भगवान बिरसा मुंडा यांनी अवघ्या २५ वर्षांच्या आयुष्यात जल, जंगल आणि जमिनीच्या हक्कांसाठी ब्रिटिश सत्तेविरुद्ध ऐतिहासिक संघर्ष केला. त्यांचे विचार आजही आदिवासी समाजाला प्रेरणा देणारे आहेत. चंद्रपूरमध्ये त्यांच्या स्मारकाच्या उभारणीच्या संकल्पात सहभागी होता आले, हे आपले भाग्य असल्याचे त्यांनी सांगितले.
आदिवासी समाजाच्या विकासासाठी मंत्रीपदाच्या कार्यकाळात शबरी घरकुल योजनेचा शहरी भागात विस्तार, पेसा ग्रामपंचायतींना ५ टक्के थेट निधी, तेंदूपत्ता संकलकांना ७२ कोटींचा बोनस आणि विद्यार्थ्यांच्या शिक्षणासाठी आर्थिक मदत असे महत्त्वपूर्ण निर्णय घेतल्याचे त्यांनी नमूद केले.
मिशन शौर्यच्या माध्यमातून आदिवासी युवकांनी एव्हरेस्ट सर केले असून, आता मिशन ऑलिम्पिक २०३६ अंतर्गत चंद्रपूरच्या आदिवासी खेळाडूने ऑलिम्पिकमध्ये पदक जिंकावे, हे आपले स्वप्न असल्याचे त्यांनी सांगितले. यासाठी वीर बाबुराव शेडमाके यांच्या नावाने आंतरराष्ट्रीय दर्जाचे क्रीडा संकुल उभारण्याचे प्रयत्न सुरू असल्याचेही त्यांनी स्पष्ट केले.
आदिवासी समाजाची प्रगती, विकास आणि सन्मान यासाठी कार्य करणे हे आपले कर्तव्य असून, समाजाच्या प्रत्येक सुख-दुःखात आणि अडचणीच्या काळात आपण खंबीरपणे पाठीशी उभे राहू, अशी ग्वाही आ. सुधीर मुनगंटीवार यांनी दिली.




Petrol Price




