Petrol Price
देसाईगंजमध्ये भीषण अपघात : भरधाव पिकअपच्या धडकेत ७ जण जखमी
- माजी आमदार कृष्णाजी गजबे यांची घटनास्थळी व रुग्णालयात धाव
- जखमींची घेतली आस्थेने विचारपूस
विदर्भ न्यूज एक्सप्रेस
तालुका प्रतिनिधी / देसाईगंज : देसाईगंज शहरातील गजबजलेल्या मुख्य मार्गावर काल शुक्रवार, १३ नोव्हेंबर एका भरधाव पिकअप वाहनाने अनेक वाहनांना जोरदार धडक दिल्यामुळे एक भीषण अपघात घडला. या दुर्घटनेत सात जण जखमी झाले असून, अनेक वाहनांचे मोठ्या प्रमाणात नुकसान झाले आहे. या घटनेची माहिती मिळताच आरमोरी विधानसभा क्षेत्राचे माजी आमदार कृष्णाजी गजबे यांनी तातडीने घटनास्थळी धाव घेत परिस्थितीचा आढावा घेतला. काल घडलेल्या या अपघातामुळे शहरात काही वेळ तणाव आणि भीतीचे वातावरण निर्माण झाले होते. घटनेची गांभीर्य लक्षात घेऊन माजी आमदार कृष्णाजी गजबे यांनी तत्काळ अपघातस्थळी पोहोचून पाहणी केली. त्यानंतर त्यांनी देसाईगंज येथील शासकीय रुग्णालयात जाऊन उपचारासाठी दाखल असलेल्या सर्व जखमींची भेट घेतली. त्यांच्या प्रकृतीची आस्थेने विचारपूस करत त्यांनी धीर दिला.
यावेळी त्यांनी उपस्थित वैद्यकीय अधिकारी व कर्मचाऱ्यांकडून जखमींवर सुरू असलेल्या उपचारांची सविस्तर माहिती घेतली. तसेच, जखमींवर कोणतेही कसूर न ठेवता तातडीने आणि उत्तम उपचार करावेत, अशा सक्त सूचना त्यांनी संबंधित यंत्रणेला दिल्या.
कठोर कारवाईची मागणी -
भरधाव व निष्काळजीपणे वाहन चालवून निष्पाप नागरिकांच्या जीवितास धोका निर्माण करणाऱ्या वाहनचालकावर कठोर कायदेशीर कारवाई करण्यात यावी, अशी ठाम भूमिका माजी आमदार कृष्णाजी गजबे यांनी घेतली. याबाबत त्यांनी तात्काळ पोलीस विभागाशी संपर्क साधून दोषींवर विनाविलंब कडक कारवाई करण्याची मागणी केली आहे.
