Petrol Price
गवत कापताना विषारी सापाचा दंश : वृद्धेचा मृत्यू
- गोरठा शेतशिवारातील दुर्दैवी घटना; आमगाव पोलिसांत आकस्मिक मृत्यूची नोंद
विदर्भ न्यूज एक्सप्रेस
प्रतिनिधी / गोंदिया : जनावरांसाठी गवत कापण्यासाठी शेतात गेलेल्या ७० वर्षीय वृद्ध महिलेचा विषारी सापाच्या दंशाने मृत्यू झाल्याची दुर्दैवी घटना आमगाव तालुक्यातील गोरठा शेतशिवारात शनिवारी १९ सायंकाळी घडली. पार्वता बाबुराव फुंडे ७० वर्षे, रा. गोरठा असे मृत महिलेचे नाव आहे. या घटनेमुळे गोरठा परिसरात हळहळ व्यक्त होत आहे.
मिळालेल्या माहितीनुसार, पार्वता फुंडे या शनिवारी सायंकाळी साडेपाच ते सहा वाजण्याच्या सुमारास घराशेजारील शेतात जनावरांसाठी गवत कापण्यासाठी गेल्या होत्या. शेतात गवत कापत असताना अचानक विषारी सापाने त्यांच्या उजव्या हाताच्या बोटाला दंश केला. सर्पदंश झाल्यानंतर त्यांची प्रकृती बिघडल्याने कुटुंबीयांनी तत्काळ त्यांना उपचारासाठी आमगाव येथील ग्रामीण रुग्णालयात दाखल केले.
मात्र, ग्रामीण रुग्णालयात वैद्यकीय अधिकाऱ्यांनी तपासणी केल्यानंतर पार्वता फुंडे यांना मृत घोषित केले. उपचारासाठी रुग्णालयात आणल्यानंतर त्यांचा मृत्यू झाल्याने कुटुंबीयांवर दुःखाचा डोंगर कोसळला.
या घटनेची माहिती दुर्गाप्रसाद बाबुराव फुंडे ३७ वर्षे, रा. गोरठा यांनी आमगाव पोलिसांना दिली. त्यांच्या माहितीनुसार, पार्वता फुंडे यांना शेतात गवत कापत असताना सर्पदंश झाला होता.
घटनेची नोंद घेत आमगाव पोलिसांनी आकस्मिक मृत्यूची नोंद केली आहे. या प्रकरणाचा पुढील तपास हवालदार गजभिये करीत आहेत. शेतशिवारात गवत कापताना सर्पदंश झाल्याने वृद्ध महिलेचा मृत्यू झाल्याच्या या घटनेने परिसरात चिंता व्यक्त होत असून, शेतात काम करताना नागरिकांनी विशेष खबरदारी घेण्याची गरज पुन्हा अधोरेखित झाली आहे.
