Petrol Price
मानेकसा शेतशिवारात विष प्राशन केल्याने ६० वर्षीय व्यक्तीचा मृत्यू
- आमगाव ग्रामीण रुग्णालयात नेले असता वैद्यकीय अधिकाऱ्यांनी केले मृत घोषित; पोलिसांत आकस्मिक मृत्यूची नोंद
विदर्भ न्यूज एक्सप्रेस
प्रतिनिधी / गोंदिया : आमगाव तालुक्यातील मानेकसा येथील शेतशिवारात विष प्राशन केल्याने ६० वर्षीय व्यक्तीचा मृत्यू झाल्याची घटना समोर आली आहे. शालीकराम नारायण चौव्हाण असे मृत व्यक्तीचे नाव असून, या घटनेची नोंद आमगाव पोलिसांनी घेतली आहे.
मिळालेल्या माहितीनुसार, शालीकराम नारायण चौव्हाण यांनी मानेकसा येथील शेतशिवारात शिवमंदिराजवळ विष प्राशन केले होते. बुधवार, २१ ऑक्टोबर रोजी सायंकाळी ४ वाजतापासून गुरुवार, २२ ऑक्टोबर रोजी सकाळी ७.३० वाजताच्या दरम्यान ही घटना घडली.
विष प्राशन केल्याची माहिती मिळाल्यानंतर शालीकराम चौव्हाण यांना उपचारासाठी आमगाव येथील ग्रामीण रुग्णालयात नेण्यात आले. मात्र, तेथील वैद्यकीय अधिकाऱ्यांनी तपासणी केल्यानंतर त्यांना मृत घोषित केले.
या प्रकरणी मृताचे पुत्र रामेश्वर शालीकराम चौव्हाण २६ वर्षे, रा. मानेकसा यांनी दिलेल्या तक्रारीवरून आमगाव पोलिसांनी आकस्मिक मृत्यूची नोंद केली आहे. शालीकराम चौव्हाण यांनी विष प्राशन करण्यामागील नेमके कारण अद्याप स्पष्ट झालेले नाही.
पुढील तपास आमगाव पोलिस ठाण्याचे हवालदार पंधरे करीत आहेत.
