Petrol Price
आरमोरीत चोरट्यांचा तीन घरांत धुडगूस : रोख रक्कम लंपास
- आझाद चौक परिसरात भरदिवसा चोरी; तीन बहीण-भावंडांच्या घरांना चोरट्यांनी केले लक्ष्य
विदर्भ न्यूज एक्सप्रेस
तालुका प्रतिनिधी / आरमोरी : आरमोरी शहरातील आझाद चौक परिसरात चोरट्यांनी भरदिवसा तीन घरांना लक्ष्य करत रोख रक्कम लंपास केल्याची घटना १७ ऑक्टोबर रोजी उघडकीस आली. एकाच कुटुंबातील तीन बहीण-भावंडांच्या घरांत चोरी झाल्याने परिसरात खळबळ उडाली आहे. या घटनेत चोरट्यांनी एकूण १३ हजार ८०० रुपयांची रोख रक्कम चोरून नेली.
मिळालेल्या माहितीनुसार, ललिता विनायक मेश्राम ६० वर्ष या १७ ऑक्टोबर रोजी महाप्रसादासाठी स्वयंपाक बनविण्याच्या कामाकरिता रोजंदारीने बाहेर गेल्या होत्या. त्या दिवसभर कामावर असल्याची संधी साधून अज्ञात चोरट्यांनी त्यांच्या घरात प्रवेश केला. सायंकाळी त्या घरी परतल्यानंतर घरात चोरी झाल्याचे त्यांच्या लक्षात आले. तपासणी केली असता घरातील १२ हजार रुपये रोख रक्कम गायब असल्याचे आढळले.
ललिता मेश्राम यांच्या घराशेजारीच त्यांचे भाऊ सुरेश आणि मोरेश्वर यांची घरे आहेत. चोरट्यांनी या दोन्ही घरांनाही लक्ष्य केले. सुरेश यांच्या घरातून एक हजार रुपये, तर मोरेश्वर यांच्या घरातून ८०० रुपये रोख रक्कम चोरून नेल्याचे समोर आले.
एकाच परिसरातील तीन घरांतून भरदिवसा रोख रक्कम चोरीला गेल्याने नागरिकांमध्ये चिंता व्यक्त केली जात आहे. नागरिकांच्या घरांना लक्ष्य करून चोरट्यांनी चोरी केल्यामुळे परिसरातील सुरक्षेचा प्रश्नही ऐरणीवर आला आहे.या घटनेमुळे आझाद चौक परिसरातील नागरिकांमध्ये भीतीचे वातावरण निर्माण झाले असून, अज्ञात चोरट्यांचा शोध घेऊन चोरीच्या घटनांना आळा घालण्याची मागणी नागरिकांकडून होण्याची शक्यता आहे.
चोरीचा एकूण मुद्देमाल -
ललिता मेश्राम यांच्या घरातून १२ हजार रुपये, सुरेश यांच्या घरातून एक हजार रुपये आणि मोरेश्वर यांच्या घरातून ८०० रुपये, अशी एकूण १३ हजार ८०० रुपयांची रोख रक्कम चोरीला गेली.
