अंगावरून रेल्वे मालगाडी जाऊनही बचावला युवक


- देसाईगंज येथे 'देव तारी त्याला कोण मारी' चा प्रत्यय

विदर्भ न्यूज एक्सप्रेस
तालुका प्रतिनिधी / देसाईगंज :
रेल्वे मालगाडीच्या दोन डब्यांना जोडणाऱ्या रिकाम्या जागेतून दुसऱ्या प्लॅटफार्मवर जाताना अचानक रेल्वे सुरू झाली अन् संपूर्ण मालगाडी त्याच्या अंगावरून पुढे निघून गेली. तरीही त्या युवकाला थोडी जखमही झाली नाही. हृदयाचे ठोके चुकविणारी ही घटना मंगळवार, १० डिसेंबर २०१९ रोजी दुपारी वडसा रेल्वेस्थानकावर घडली. या घटनेमुळे 'देव तारी त्याला कोण मारी' याचा प्रत्यय आला आहे. गडचिरोली जिल्ह्यात देसाईगंज (वडसा) हे एकमेव रेल्वेस्थानक आहे. या ठिकाणी तीन प्लॅटफार्म आहेत. प्रत्येक प्लॅटफार्मवर जाण्यासाठी उडाणपूल बनविण्यात आले आहे. मात्र काही प्रवाशी उडाणपुलावरून न जाता शॉर्टकट मारत खालूनच रेल्वे रूळ पार करून पुढे जातात. पण कधीकधी हा शॉर्टकट जीवावर बेतू शकतो, याचा प्रत्यय वडसा स्थानकावरील सर्व प्रवाशांनी अनुभवला. फलाट क्रमांक १ वर गोंदियाला जाणारी पॅसेंजर तर फलाट क्रमांक २ वर गोंदिया-बल्लारशहा डेमो उभी होती. तिसऱ्या फलाटावर मालगाडी उभी होती. पॅसेंजर पकडण्यासाठी तीन युवकांनी मालगाडीच्या दोन डब्यांच्यामध्ये असलेल्या रिकाम्या जागेतून मार्ग काढण्याचा प्रयत्न केला. यामध्ये दोन तरूण रेल्वे डब्यांना जोडणाऱ्या जोडांवर उभे झाले. त्यामुळे तिसऱ्या युवकाने जॉइंडच्या खालच्या बाजुने जाऊन रूळ पार करण्याचा प्रयत्न केला. मात्र त्याच वेळी मालगाडी सुरू झाल्याने दोन डब्यांच्या जोडावर उभे असलेल्या युवकांनी कसेतरी फलाटावर उड्या मारून स्वत:चे प्राण वाचविले. मात्र खालून जाणाऱ्या युवकापुढे कोणताच पर्याय शिल्लक नव्हता. यावेळी त्या युवकाने समयसूचकता दाखवत क्षणाचाही विलंब न करता दोन रूळांच्या मध्ये समांतर झोपला. यामुळे मालगाडीचे अनेक डबे त्याच्या अंगावरून धडधडत पुढे निघून गेले. मात्र त्या युवकाला कोणतीही इजा झाली नाही. मालगाडी निघून गेल्यानंतर भयभीत झालेल्या युवकाने रेल्वे स्थानकावरून पळ काढला. त्यामुळे त्याचे नाव कळू शकले नाही. हा चित्तथरारक प्रसंग काही रेल्वेप्रवाशांनी मोबाईलच्या कॅमेऱ्यात कैद केला.
उड्डाणपुलाचा वापर करा - संजयकुमार सिंग
फलाट ओलांडण्यासाठी रेल्वेने उड्डाण पूल बनविले आहेत. मात्र अनेक वेळा प्रवाशी त्याचा वापर न करता खालूनच रेल्वे रुळावरून पलिकडे जातात. परिणामी अशा जीवघेण्या प्रसंगांना सामोरे जावे लागते. रेल्वे रूळ ओलांडणे बेकायदेशीर आहे. प्रवाशांनी उड्डाण पुलावरूनच फलाट ओलांडावा, असे आवाहन देसाईगंजचे स्टेशनमास्टर संजयकुमार सिंग यांनी रेल्वे प्रवाशांना केले आहे.



  Print






News - Gadchiroli | Posted : 2019-12-11






Related Photos