Petrol Price
बल्लारपुरात अवैध रेतीची वाहतूक सुरूच : भरारी पथकाच्या कार्यक्षमतेवर प्रश्नचिन्ह
विदर्भ न्यूज एक्सप्रेस
तालुका प्रतिनिधी / बल्लारपूर : बल्लारपूर शहरात अवैध रेती वाहतुकीचा गोरखधंदा पुन्हा सुरू झाल्याचे चित्र दिसत असून, महसूल विभागाच्या कारवाईनंतरही रेती तस्करांवर प्रभावी अंकुश बसलेला नसल्याचे समोर येत आहे. तहसीलदार रेणुका कोकाटे यांनी १५ व १६ ऑक्टोबर रोजी कारवाई करत दोन ट्रॅक्टर पकडले होते. तसेच अवैध रेती वाहतुकीला आळा घालण्यासाठी भरारी पथकाची नियुक्ती करण्यात आली आहे. मात्र, या उपाययोजना करूनही शहरात अवैध रेतीच्या खेपा सुरूच असल्याने महसूल विभागाच्या कारवाईवर प्रश्नचिन्ह उपस्थित होत आहे.
मिळालेल्या माहितीनुसार, किन्ही नाला तसेच पळसगाव नाला परिसरातून अवैधरित्या रेतीचा उपसा केला जात असल्याची चर्चा आहे. या ठिकाणांहून ट्रॅक्टरद्वारे रेतीची वाहतूक करून शहरात खेपा पोहोचवल्या जात असल्याचे सांगितले जात आहे. विशेष म्हणजे, महसूल विभागाच्या तलाठी कार्यालयासमोरूनही रेतीचे ट्रॅक्टर जात असल्याचे दिसत असताना त्यांच्यावर कारवाई होत नसल्याबाबत नागरिकांकडून प्रश्न उपस्थित केले जात आहेत.
रेतीची वाहतूक करणारे ट्रॅक्टर कारवाई टाळण्यासाठी मागे-पुढे इतर वाहनांची मदत घेत असल्याचीही चर्चा आहे. तसेच काही ट्रॅक्टरमालक सकाळपासून तहसील कार्यालय आणि महसूल अधिकाऱ्यांच्या वसाहती परिसरातील हालचालींवर लक्ष ठेवत असल्याचा दावा केला जात आहे. त्यामुळे कारवाईची माहिती आधीच मिळते का, असा प्रश्न उपस्थित होत आहे. या बाबींची निष्पक्ष चौकशी झाल्यास अवैध रेती वाहतुकीमागील यंत्रणा स्पष्ट होण्यास मदत होऊ शकते.
दरम्यान, तलाठी आणि मंडळ अधिकारी मुख्यालयी नियमित उपस्थित राहत नसल्यामुळे अवैध रेती उपसा व वाहतुकीवर नियंत्रण ठेवण्यात अडचणी निर्माण होत असल्याची तक्रारही पुढे येत आहे. मात्र, या आरोपांची अधिकृत पुष्टी झालेली नाही. संबंधित अधिकाऱ्यांची मुख्यालयातील उपस्थिती, भरारी पथकाची प्रत्यक्ष गस्त आणि अवैध रेती वाहतुकीविरोधात करण्यात आलेल्या कारवायांचा आढावा घेण्याची गरज व्यक्त होत आहे.
तहसीलदारांनी यापूर्वी केलेल्या कारवाईनंतरही अवैध रेती वाहतुकीचे प्रकार सुरू असल्याचे चित्र कायम राहिल्यास शासनाचा महसूल बुडण्याबरोबरच नियमांचे उल्लंघन करणाऱ्यांचे मनोबल वाढण्याची शक्यता आहे. त्यामुळे किन्ही व पळसगाव नाला परिसरातील रेती उपशाची चौकशी करून अवैध वाहतूक करणाऱ्यांवर कठोर कारवाई करावी, तसेच तलाठी व मंडळ अधिकाऱ्यांच्या मुख्यालयातील उपस्थितीवर लक्ष ठेवावे, अशी मागणी नागरिकांकडून होत आहे.
