महत्वाच्या बातम्या

देवळी येथे जिल्हास्तरीय शालेय कुस्ती स्पर्धा संपन्न

- कुस्तीविषयी आवड निर्माण करावयाची असेल तर शालेय स्तरावर मार्गदर्शन व स्पर्धा सातत्याने होणे गरजेचे : खासदार रामदास तडस

विदर्भ न्यूज एक्सप्रेस

प्रतिनिधी / वर्धा : कुस्ती हा भारताचा पारंपारिक खेळ आहे आणि मनोरंजनाचे खूप जुने साधन आहे. पूर्वी, जेव्हा टीव्ही युग नव्हते, तेव्हा कुस्ती स्पर्धा अनेकदा जत्रा किंवा सामाजिक प्रसंगी आयोजित केले जायचे, पंरतु आज मोबाईल व मनोरंजनाच्या इतर साधनामुळे खेळाकडे दुर्लक्ष होत आहे, महाराष्ट्रातही कुस्तीला अनन्यसाधारण महत्व आहे, अनेक कुस्तीगीरांना आपले नाव जागतिक स्तरावर मोठे केले आहे. कुस्तीविषयी आवड निर्माण करावयाची असेल तर शालेय स्तरावर योग्य मार्गदर्शन मिळणे व स्पर्धा सातत्याने होणे गरजेचे आहे असे प्रतिपादन खासदार रामदास तडस यावेळी केले.

आज विदर्भ केसरी रामदास तडस इनडोअर स्टेडीयम देवळी येथे क्रीडा व युवक सेवा संचालनालय महाराष्ट्र राज्य, पुणे अंतर्गत जिल्हा क्रीडा अधिकारी कार्यालय, वर्धा व जिल्हा क्रीडा परिषद वर्धा व्दारा आयोजीत जिल्हास्तरीय शालेय कुस्ती स्पर्धा २०२२-२३ चे उद्घाटन खासदार रामदास तडस यांच्या हस्ते संपन्न झाले, कार्यक्रमाला माजी उपाध्यक्ष नरेन्द्र मदनकर, क्रीडा प्रशिक्षक सुरेन्द्र गांडोळे, व्यवस्थापक रवी काकडे, महाजन, चव्हान, राजु भगत, सचिव दिनेश क्षिरसागर, भरत पांडे, रवी पोटदुखे उपस्थित होते.

या शालेय कुस्ती स्पर्धेमध्ये देवळी, वर्धा, हिंगणघाट, आर्वी, आष्टी, कारंजा, सेलू, समुद्रपूर, तालुक्यातील जवळपास मुली ७५, मुले १२५ एकुण २०० शालेय कुस्तीगीरांनी भाग घेतले, या स्पर्धेत जिकंणा-या कुस्तीगीराची महाराष्ट्र विभागीय स्तरावर भाग घेता येणार आहे. यावेळी मोठया संख्येने विद्यार्थी, पालक उपस्थित होते.