महत्वाच्या बातम्या

जिल्ह्यातील ३० वर्षावरील प्रत्येक नागरिकाने स्वइच्छेने तपासणीसाठी पुढे यावे : फेसबुक लाईव्ह वर जिल्हाधिकारी यांचा नागरिकांशी संवाद

विदर्भ न्यूज एक्सप्रेस
प्रतिनिधी / नागपूर : आरोग्य यंत्रणा प्रत्येक नागरिकांच्या आरोग्याची काळजी घेण्यासाठी तत्पर आहे. आवश्यक मोफत सुविधा, औषध पुरवठा व तज्ञ डॉक्टरांची नियुक्ती केली आहे. त्यामुळे जिल्ह्यातील ३० वर्षावरील एकही व्यक्ती तपासणी विना राहू नये यासाठी नागरिकांनी साथ द्यावी, तसेच ५० वर्षावरील प्रत्येक नागरिकाच्या मोतीबिंदू तपासणीला प्रतिसाद दयावा, असे आवाहन जिल्हाधिकारी डॉ. विपीन इटनकर यांनी जिल्ह्यातील नागरिकांना केले आहे. नागपूर जिल्ह्यातील ३० वर्षावरील सर्व नागरिकांच्या उच्च रक्तदाब, मधुमेह, गर्भाशय मुखाचे कर्करोग, स्तनाचा कर्करोग, तोंडाचा कर्करोग तपासणी व ५० वर्षावरील पुरुष आणि महिलांची डोळ्यांची तपासणी आणि शस्त्रक्रिया प्रशासनातर्फे करण्यात येत आहे. तसेच आरोग्य विषयक मोहीम युद्धस्तरावर राबविण्यात येत आहे. या मोहिमे विषयी माहिती देण्यासाठी फेसबुक लाईव्हवरून जनतेशी आज जिल्हाधिकारी डॉ.विपिन इटनकर, जिल्हा परिषदेचे मुख्य कार्यकारी अधिकारी योगेश कुंभेजकर व आरोग्य यंत्रणेतील वरिष्ठ अधिकाऱ्यांनी संपर्क साधला. जिल्ह्यामध्ये आरोग्य मोहीम राबविण्यासाठी दोन तारखेपासून सुरुवात झाली आहे. पुढील दोन महिने ही मोहीम राबविण्यात येणार असून प्रत्येक गावांमध्ये दवंडी देऊन तसेच धार्मिक स्थळे व व ग्रामपंचायतच्या पब्लिक अँड्रेस सिस्टम वरून गावागावात या संदर्भात माहिती दिली जाणार आहे. या माहितीचा लाभ घेऊन नागरिकांनी आपली तपासणी करून घ्यावी, कॅन्सर सारख्या जटील आजाराची लक्षणे आढळलेल्या रुग्णांना विविध तपासण्यांसाठी नॅशनल कॅन्सर इन्स्टिट्यूट तसेच तुकडोजी महाराज कॅन्सर हॉस्पिटल या ठिकाणी पाठविण्यात येणार आहे. या आजारांच्या संदर्भातील संभाव्य रुग्णांच्या याद्या तयार करण्यात येणार आहे. अतिशय गांभीर्यपूर्वक मोफत ही तपासणी होणार असून नागरिकांनी याचा लाभ घ्यावा, असे आवाहन यावेळी करण्यात आले.
मोतीबिंदू मुक्त नागपूर
जिल्ह्यामध्ये मोतीबिंदू मुक्त नागपूर मोहिम राबविण्यात येणार आहे. जिल्हा शल्य चिकित्सक यांच्या चमूसह शासकीय वैद्यकीय महाविद्यालय, इंदिरा गांधी शासकीय वैद्यकीय महाविद्यालय, लता मंगेशकर हॉस्पिटल, महात्मे आय हॉस्पिटल, सुरज आय इन्स्टिट्यूट यांच्या तज्ञानाद्वारे जिल्हास्तरावरून टीम ठरवून दिलेल्या तारखांप्रमाणे प्रत्येक तालुक्यातील उपजिल्हा रुग्णालय, ग्रामीण रुग्णालय, प्राथमिक आरोग्य केंद्र व काही निवडक उपकेंद्र येथे जाऊन ५० वर्षांवरील सर्व नागरिकांची तपासणी करण्यात येणार आहे. यासाठी मोठ्या प्रमाणात कॅम्पचे आयोजन करण्यात येणार असून यामध्ये नागरिकांनी सहभागी व्हावे, कॅम्प मध्ये फक्त तपासणी करण्यात येणार असून त्यानंतर तज्ञ डॉक्टरांकडून ज्यांना मोतीबिंदू आहे त्यांच्यावर शस्त्रक्रिया केली जाणार आहे नागरिकांनी याचा लाभ घ्यावा असे आवाहनही त्यांनी केले. आजच्या या लाईव्ह कार्यक्रमाला जिल्हा आरोग्य अधिकारी डॉ.दीपक सेलोकार, डॉ. हर्षा मेश्राम वाकोडकर, जिल्हा नेत्र शल्य चिकित्सक डॉ. संगीता इंदुरकर उपस्थित होते.