प्रतिनिधी / नागपूर : रब्बी हंगामाकरिता केंद्र व राज्य शासनामार्फत राष्ट्रीय अन्न सुरक्षा योजना व कृषी उन्नती योजनेंतर्गत ग्रामबिजोत्पादन कार्यक्रम राबविण्यात येत असून दोन्ही योजनेत शेतकऱ्यांना हरभरा व गहू प्रमाणित बियाणे अनुदानावर मिळणार आहेत. हरभरा व गहू बियाणे महाबीज विक्रेत्याकडे उपलब्ध राहणार आहेत. शेतकऱ्यांनी अनुदानित दराने बियाणे प्राप्त करुन घेण्याकरीता नजिकच्या कृषी कार्यालय तसेच महाबीज कार्यालय येथे त्वरीत संपर्क साधावा.
हरभरा व गहू बियाण्यांकरिता प्रती क्विंटल अनुदान व अनुदानित विक्री दर याप्रमाणे आहेत. १० वर्षाआतील हरभरा वाणासाठी प्रती क्विंटल अनुदान २ हजार ५०० रुपये राहणार असून अनुदानित विक्री दर ४ हजार ५०० रुपये आहे. १० वर्षावरील हरभरा वाणासाठी प्रती ‍क्विंटल अनुदान -२ हजार रुपये राहणार असून अनुदानित विक्री दर ५ हजार राहणार आहे. १०वर्षाआतील हरभरा काबुली वाणासाठी अनुदान- २ हजार ५०० राहणार असून अनुदानित विक्री दर ८ हजार ५०० रुपये आहे. १० वर्षावरील हरभरा काबुली वाणासाठी प्रती क्विंटल अनुदान- २ हजार राहणार असून अनुदानित विक्री दर - ९ हजार रुपये आहे. १० वर्षाआतील गव्हाचा वाणासाठी प्रती क्विंटल अनुदान १ हजार ५०० असून अनुदानित विकी दर - २ हजार ५०० रुपये तर १० वर्षावरील गव्हाचा प्रती क्विंटल अनुदान १ हजार ५०० असून अनुदानित विक्री दर २ हजार ७०० रुपये आहेत.
अनुदानावर कमी दरात महाबीजचे हरभरा व गहू प्रमाणित बियाणे उपलब्ध असून याचा लाभ शेतकऱ्यांनी घ्यावा, असे आवाहन महाबीजचे विभागीय व्यवस्थापक विनोद पाटील यांनी केले आहे.