महत्वाच्या बातम्या

कोविड अंतर्गत सीएसआर निधीचे सर्व यंत्रणांनी ऑडिट करा : जिल्हाधिकारी विपीन इटनकर

विदर्भ न्यूज एक्सप्रेस
प्रतिनिधी / नागपूर : कोविड महामारीच्या पहिला, दुसरा व तिसऱ्या टप्प्यातील विविध बाबींबर प्राप्त निधी तत्काळ खर्च करुन त्यांचे ऑडिट करा. यानंतर कोविडसाठी प्राप्त निधीबाबत कोणतेही प्रशासकीय मान्यता मिळणार नाही, असे स्पष्ट आदेश जिल्हाधिकारी डॉ. विपीन इटनकर यांनी सर्व संबंधित यंत्रणेस दिले.
कोविड व सीएसआर निधीबाबत जिल्हाधिकारी यांच्या अध्यक्षतेखाली जिल्हाधिकारी कार्यालयाच्या छत्रपती सभागृहात आयोजित बैठकीत ते बोलत होते. मुख्य कार्यकारी अधिकारी योगेश कुंभेजकर, निवासी उपजिल्हाधिकारी विजया बनकर, उपजिल्हाधिकारी पियुष चिवंडे, महापालिकेचे उपायुक्त राम जोशी, जिल्हा शल्यचिकित्सक डॉ. माधूरी थोरात, जिल्हा आरोगय अधिकारी डॉ. दीपक सेलोकर, पुजा पाटील, ललीत राऊत तसेच समिती सदस्य यावेळी उपस्थित होते.
कोविडसाठी ऑगस्टपर्यत प्राप्त निधीचा प्रलंबित खर्च लवकरात लवकर करा. ज्या खर्चास अजूनपर्यंत प्रशासकीय मान्यता मिळाली नसेल त्याचे योग्य प्रस्तावासह सादर करा. त्यास तत्काळ मान्यता देण्यात येईल. यानंतर प्राप्त कोणतेही कोविडबाबत प्रस्तावास मान्यता देण्यात येणार नाही, असे जिल्हाधिकारी यांनी सांगितले.
याबैठकीत विविध संस्थांच्या सेवाविषयक खर्चास मान्यता देण्यात आली. कोणत्याही अफवांना बळी न पडता निधीबाबत योग्य कार्यवाही करण्याचे त्यांनी सांगितले. विविध ठिकाणी स्थापित विलगीकरण केंद्रासोबतच ऑक्सीजन प्लांटवर मनुष्यबळावर झालेल्या खर्चाचे प्रस्ताव सादर करा.पालकमंत्री यांच्या अध्यक्षतेखाली स्थापित समिती अंतर्गत खर्चाचेही प्रस्ताव लवकरात लवकर सादर करण्याचे त्यांनी सांगितले.
कोविड अंतर्गत झालेल्या विविध कामांचा व खर्चाचा आढावा जिल्हाधिकारी यांनी घेतला. कोविडमध्ये झालेला कोविड सेंटरवरील औषधोपचारावरील व अंटिबॉयोटिकवरील खर्चास तसेच इतर खर्चास यावेळी मान्यता देण्यात आली.