पिक करपले उत्पन्न घटले, दुष्काळातून वगळले !


समुद्रपूर तालुक्यातील स्थिती ; दुष्काळ घोषणेतून गावे वंचित
- हजारो शेतकऱ्यांत खदखदतोय असंतोष 
विदर्भ न्यूज एक्सप्रेस 
तालुका प्रतिनिधी / समुद्रपूर :
निसर्गाच्या अवकृपेच्या झळा कायमच शेतकऱ्यांच्या जीवनावर बेतणाऱ्या आहे. दरवर्षीच दुष्काळी परिस्थिती ओढवली जात आहे. मात्र यातही शासनाच्या निकषांचे आणि नियमांचे अडथळे शेतकऱ्यांना घोषणांच्या लाभापासून वंचित ठेवण्यास कारणीभूत ठरत असल्याची प्रचिती येत आहे. शेतकऱ्यांना निसर्गाने मारले आणि शासनाने झिडकारले असाच प्रकार समुद्रपूर तालुक्यातील समुद्रपूर, नंदोरी महसूल मंडळातील हजारो शेतकऱ्यांवर ओढविली आहे. या महसूल मंडळातील शेतशिवारात दुष्काळी स्थिती असून पाण्याविना पिक करपले, उत्पादनात कमालीची घट आली आणि याच गावांना शासनाने दुष्काळाच्या यादीतून वगळले. यामुळे शासनाच्या धोरणाविरुध्द शेतकऱ्यात रोष खदखदतो आहे. 
 शासनाने पहिल्या टप्पातील पाहणीत समुद्रपूर तालुका दुष्काळसदृश घोषित केला. तर  दुसऱ्या टप्पातील अहवालात दुष्काळग्रस्तांच्या यादीतून समुद्रपूर आणि नंदोरी या महसूल मंडळातील गावे वगळली आहे. यामुळे  शेतकऱ्यांमध्ये तीव्र असंतोष निर्माण झाला आहे . दुष्काळी परिस्थितीमुळे मागील एका महिण्यात तीन शेतकऱ्यांनी आत्महत्या केल्या. मात्र  शासनाला दुष्काळी परिस्थितीची धग दिसलीच नाही.हि  शोकांतिका आहे. शेतकऱ्यांना निसर्गाने तर मारलेच मात्र शासनानेही झिडकारल्याची प्रचीती येत आहे. 
 मागिल दहा वर्षापासून तालुका दुष्काळात होरपळत आहे . मागील तीन वर्षात ३६ शेतकऱ्यांनी आत्महत्या केल्या तर यावर्षी दहा महिन्यात ११ शेतकऱ्यांनी जीवनाला कवटाळले . ऑक्टोंबर महिन्यात तीन शेतकऱ्यांनी दुष्काळातून सुटका होण्याचे चिन्ह न दिसल्याने मरण पत्करले.  शेतकरी आत्महत्यांचे विदारक परिस्थितीचे बोलके चित्र असतांना शासनाला आणि लोकप्रतिनिधींना तालुक्यातील दुष्काळ मात्र दिसत नाही. चालू वर्षात एक जून ते ३०सप्टेंबर दरम्यान ७२२.९ मिलीमिटर पाऊस झाला. हा पाऊसही २०-२० दिवसांच्या अंतराने पडल्याने खरीपातील उत्पादनात कमालीची घट झाली आहे. सोयाबीनला एकरी दोन ते तीन क्विंटल उतारा आला. कापूस पिकाचीही  हीच अवस्था कायम आहे. दिवाळीपूर्वी निम्म्याहून अधिक उत्पन्न शेतकऱ्यांच्या हाती यायचे मात्र यावर्षी अद्यापही उत्पादन निघालेच नाही. अतीपावसाने बुरशीजन्य रोगाने बोंड गळली आणि सडली. यातच बोंड अळीचा काही प्रमाणात प्रादुर्भाव झाला.वीस - वीस दिवसाच्या अंतराने पावसाने हजेरी लावली.पावसाच्या खंडामुळे पिकांची वाढ खुंटली.परिणामी खरीपातील उत्पादन निम्म्यावर आले.तर हलक्या आणि मुरमाड जमिनीतील पिक पूर्णतः करपली.शेतकऱ्यांनी शेतीला लावलेला उत्पादन खर्च निघणे कठीण झाला. ज्या शेतकऱ्यांकडे ओलिताचे साधन होती ती निष्फळ ठरली. शेतकऱ्याकडे ओलिताचे साधन असले तरी भारनियमनाच्या फटक्याने ओलिताच्या कामे खोळंबली. यावर्षी विहिरीची पाण्याची पातळी कमालीची खालावल्याने पिकांना पाणी देणे पुरेशे होऊ शकले नाही.
समुद्रपूर तालुक्यात दरवर्षी १००० मिमी. ते ११०० मिमि पाऊस पडायचा मात्र यावर्षी ७२२  मिलीमिटरच  पाऊस  झाला. या अल्प पावसाने खरीप हंगामातील पिकांची वाताहत झाल्यानंतर रब्बी हंगामावर शेतकऱ्यांची आशा होती. पण भुजल पातळी खोल गेल्याने अनेक गावांमध्ये पिण्याच्याच पाण्याचा प्रश्न गहन झाला आहे मग शेतातील पिकांसाठी पाणी येणारच कुठून ?  सप्टेंबर महिन्यातच विहीरी , धरणे , तलाव  कोरडी पडायला लागली आहे.या वर्षीच्या दुष्काळी स्थितीने बळीराजा कायमच हादरला आहे. शेतकऱ्यांना निसर्गाने मारलेच मात्र शासनाने तरी झिडकारु नये ,तालुक्यातील संपूर्ण गावांचा दुष्काळात समावेश करावा अशी मागणी शेतकरी वर्गातून करण्यात येत आहे.
 तालुक्यातील समुद्रपूर,नंदोरी या महसूल मंडळात येत असलेल्या गावांना शासनाने दुष्काळाच्या घोषणेतून वगळले आहे. या निर्णयाने शासनाच्या चुकीच्या धोरणाबद्दल शेतकऱ्यात रोष खदखदतो आहे.या दोन्हीही मंडळातील पिक परिस्थितीचा आढावा शासनाने घ्यावा, दुष्काळातून वगळलेल्या गावांचा समावेश करण्यात यावा अशी मागणी शेतकरी वर्गातून जोर धरत आहे.



  Print






News - Wardha | Posted : 2018-11-21






Related Photos