Petrol Price
उपविभागीय अधिकाऱ्यांच्या खुर्चीसह कार्यालयातील साहित्य जप्त
- भूसंपादनाच्या वाढीव मोबदल्याच्या वादात न्यायालयाच्या आदेशानंतर गोंदियात कारवाई; शासकीय वाहनाचीही जप्ती होणार
विदर्भ न्यूज एक्सप्रेस
प्रतिनिधी / गोंदिया : भूसंपादनाच्या वाढीव मोबदल्यावरून सुरू असलेल्या न्यायालयीन वादात गोंदिया येथील उपविभागीय अधिकारी कार्यालयातील साहित्य जप्त करण्याची कारवाई गुरुवारी करण्यात आली. दिवाणी न्यायाधीश वरिष्ठ स्तर यांच्या न्यायालयाच्या आदेशानंतर तक्रारदार राजू नागवंशी यांच्या वकिलांसह न्यायालयीन कर्मचारी उपविभागीय अधिकारी कार्यालयात पोहोचले. यावेळी उपविभागीय अधिकाऱ्यांची खुर्ची तसेच कार्यालयातील विविध साहित्य जप्त करण्यात आले. न्यायालयाच्या आदेशानुसार शासकीय वाहनही जप्त करायचे होते; मात्र वाहन कार्यालयाबाहेर असल्याने गुरुवारी त्याची जप्ती होऊ शकली नाही.
गोंदिया शहरातील क्रीडा संकुल परिसरात राजू नागवंशी यांच्या मालकीची सुमारे ११ आर जमीन सन २००९ मध्ये भूसंपादन प्रक्रियेत शासनाने संपादित केली होती. या जमिनीच्या भूसंपादनापोटी शासनाकडून मोबदल्याची रक्कम मिळाली असली, तरी नियमानुसार मिळणारा वाढीव मोबदला अद्याप मिळालेला नसल्याचा दावा नागवंशी यांनी केला आहे. वाढीव मोबदल्यासाठी त्यांनी प्रशासनाकडे सातत्याने पाठपुरावा केला. मात्र, अपेक्षित कार्यवाही होत नसल्याने त्यांनी न्यायालयात धाव घेतली. या प्रकरणाची सुनावणी दिवाणी न्यायाधीश वरिष्ठ स्तर यांच्या न्यायालयात झाली. न्यायालयाने संबंधित रकमेच्या वसुलीसाठी उपविभागीय अधिकारी कार्यालयातील साहित्य आणि शासकीय वाहन जप्त करण्याचे आदेश दिले.
न्यायालयीन कर्मचाऱ्यांकडून जप्ती -
न्यायालयाच्या आदेशाची अंमलबजावणी करण्यासाठी गुरुवारी तक्रारदार राजू नागवंशी यांच्या वकिलांसह न्यायालयीन कर्मचारी उपविभागीय अधिकारी कार्यालयात दाखल झाले. त्यानंतर आदेशानुसार कार्यालयातील साहित्याची जप्ती प्रक्रिया सुरू करण्यात आली.यावेळी उपविभागीय अधिकाऱ्यांची खुर्ची आणि कार्यालयातील इतर साहित्य ताब्यात घेण्यात आले.
मात्र, जप्तीची कारवाई सुरू असताना उपविभागीय अधिकारी जिल्हाधिकारी कार्यालयात बैठकीसाठी गेले होते. त्यामुळे त्यांच्या अनुपस्थितीत कार्यालयातील इतर साहित्य जप्त करण्यात आले.न्यायालयाच्या आदेशात शासकीय वाहनाचाही समावेश होता. मात्र संबंधित वाहन त्यावेळी कार्यालयाबाहेर असल्याने त्याची जप्ती होऊ शकली नाही. वाहन कार्यालयात किंवा संबंधित ठिकाणी परत आल्यानंतर न्यायालयाच्या आदेशानुसार ते जप्त करण्यात येईल, अशी माहिती तक्रारदाराच्या वकिलांनी दिली.
काय आहे नेमके प्रकरण -
गोंदिया शहरातील क्रीडा संकुल परिसरातील राजू नागवंशी यांच्या मालकीची सुमारे ११ आर जमीन सन २००९ मध्ये भूसंपादन प्रक्रियेत शासनाकडे गेली. या जमिनीच्या संपादनापोटी शासनाकडून मोबदला देण्यात आला. मात्र, जमिनीच्या वाढीव मोबदल्याची रक्कम मिळणे बाकी असल्याचा दावा नागवंशी यांनी केला.
वाढीव मोबदला मिळावा यासाठी त्यांनी प्रशासनाकडे अनेकदा पाठपुरावा केला. मात्र, त्यावर अपेक्षित कार्यवाही होत नसल्याने त्यांनी न्यायालयाचा दरवाजा ठोठावला. न्यायालयीन प्रक्रियेनंतर संबंधित रकमेच्या वसुलीसाठी उपविभागीय अधिकारी कार्यालयातील साहित्य जप्त करण्याचे आदेश देण्यात आले.या आदेशाची अंमलबजावणी करण्यासाठी गुरुवारी जप्तीची कारवाई करण्यात आली. कार्यालयातील साहित्याबरोबरच उपविभागीय अधिकाऱ्यांची खुर्ची जप्त करण्यात आल्याने या कारवाईची शहरात चर्चा सुरू झाली आहे.
प्रशासकीय कार्यालयात खळबळ -
भूसंपादनाच्या वाढीव मोबदल्यासाठी सुरू असलेल्या न्यायालयीन लढ्याचा थेट परिणाम शासकीय कार्यालयातील साहित्याच्या जप्तीपर्यंत पोहोचल्याने प्रशासकीय वर्तुळातही या प्रकरणाची चर्चा रंगली आहे. न्यायालयाच्या आदेशानुसार कार्यालयातील साहित्य जप्त करण्याची वेळ आल्याने संबंधित प्रकरणाचे गांभीर्य अधोरेखित झाले आहे. दरम्यान, शासकीय वाहन सध्या कार्यालयाबाहेर असल्याने त्याची जप्ती रखडली आहे. वाहन परत आल्यानंतर त्यावरही न्यायालयाच्या आदेशानुसार कारवाई केली जाणार असल्याचे तक्रारदाराच्या वकिलांनी स्पष्ट केले.
