महत्वाच्या बातम्या

हैदराबादमध्ये १३० नक्षलवाद्यांचे सामूहिक आत्मसमर्पण : नक्षलवादावर ऐतिहासिक यश

विदर्भ न्यूज एक्सप्रेस
प्रतिनिधी / गडचिरोली : देशातील नक्षलवाद पूर्णपणे मोडीत काढण्यासाठी केंद्र सरकारने ३१ मार्च २०२६ ची डेडलाइन निश्चित केली आहे. या पार्श्वभूमीवर तेलंगणाची राजधानी हैदराबाद मध्ये नक्षली चळवळीला मोठा धक्का बसला आहे. शनिवारी एका विशेष कार्यक्रमात प्रतिबंधित नक्षलवादी संघटनेच्या १३० नक्षलवाद्यांनी मुख्यमंत्री रेवंत रेड्डी यांच्यासमोर शस्त्रे खाली ठेवून आत्मसमर्पण केले.

यामध्ये अनेक बड्या नेत्यांचा समावेश असून, मोठ्या प्रमाणात अत्याधुनिक शस्त्रास्त्रेही पोलिसांच्या स्वाधीन करण्यात आली आहेत. काही दिवसांपूर्वी संघटनेचे सर्वोच्च नेता पॉलीट ब्युरो सदस्य देवजी आणि केंद्रीय समिती सदस्य संग्राम यांसह चार नेत्यांनी आत्मसमर्पण केले होते.

नक्षलवाद संपवण्याचे उद्दिष्ट -
केंद्रीय गृहमंत्री अमित शाह यांनी ३१ मार्च २०२६ पर्यंत देशातून नक्षलवाद पूर्णपणे समाप्त करण्याचे उद्दिष्ट ठेवले आहे. सुरक्षा दलांच्या वाढत्या कारवाई आणि सरकारच्या प्रभावी पुनर्वसन धोरणामुळे नक्षलवाद्यांचे कंबरडे मोडल्याचे दिसत आहे. एका बाजूला अनेक भागांत चकमकींमध्ये नक्षलवादी मारले जात असताना, दुसरीकडे मोठ्या संख्येने नक्षलवादी मुख्य प्रवाहात परतत आहेत. या सामूहिक आत्मसमर्पणाला नक्षलविरोधी मोहिमेतील ऐतिहासिक यश** मानले जात आहे.

१२५ नक्षलवादी छत्तीसगडमधील -
आत्मसमर्पण करणाऱ्या १३० जणांपैकी १२५ नक्षलवादी छत्तीसगडमधील, तर ४ तेलंगणा आणि १ आंध्र प्रदेशचा आहे. यामध्ये संघटनेच्या धोरण निश्चितीमध्ये महत्त्वाची भूमिका बजावणारे ३ राज्य समिती सदस्य, १० विभागीय समिती सदस्य, ४६ एरिया कमिटी सदस्य आणि ७६ दलम सदस्यांचा समावेश आहे.

आत्मसमर्पणावेळी नक्षलवाद्यांनी ३१ ए.के.-४७ रायफल्स, २१ इन्सास रायफल्स, २० एसएलआर रायफल्स आणि एक इन्सास एलएमजी रायफल यांसह मोठ्या प्रमाणात दारूगोळा प्रशासनाकडे सुपूर्द केला.

मुख्यमंत्री रेवंत रेड्डींकडून स्वागत -
मुख्यमंत्री रेवंत रेड्डी यांनी आत्मसमर्पण करणाऱ्यांचे स्वागत केले आणि म्हटले की, महात्मा गांधींच्या देशात हिंसक आणि सशस्त्र मार्गाने कोणत्याही समस्येचे निराकरण होऊ शकत नाही. भरकटलेल्यांनी लोकशाही आणि शांततेच्या मार्गावर परतावे.

मुख्यमंत्र्यांनी नक्षलवाद्यांना बुलेट चे राजकारण सोडून बॅलेटच्या राजकारणात सहभागी होण्याचे आवाहन केले. त्यांनी सांगितले की, लोकशाहीत जनतेची सेवा आणि हक्कांची लढाई लढण्याचे सर्वोत्तम माध्यम म्हणजे निवडणूक.

गणपतीने मुख्य प्रवाहात यावे -
संघटनेच्या सर्वोच्च नेता गणपती यानेही हिंसेचा मार्ग सोडावा, सरकार त्याला पूर्ण सुरक्षा आणि सन्मानजनक पुनर्वसन देईल, अशी ग्वाही मुख्यमंत्र्यांनी दिली. राज्य सरकार आत्मसमर्पण करणाऱ्यांना रोजगार, शिक्षण आणि सुरक्षा यांसह सर्वतोपरी मदत करेल, असा विश्वास त्यांनी व्यक्त केला.

गेल्या काही वर्षांत नक्षलग्रस्त भागात झालेली विकासकामे, रस्ते आणि आरोग्य सुविधा यांमुळे नक्षलवाद्यांचा जनाधार घटत चालल्याचे या मोठ्या शरणागतीवरून स्पष्ट होत आहे.