खेमजई गावात होणार पहिल्यांदाच बिनविरोध ग्रामपंचायत निवडणूक


- ग्रामस्थांच्या पुढाकारातून घेतला ऐतिहासिक निर्णय

विदर्भ न्यूज एक्सप्रेस 
तालुका प्रतिनिधी / वरोरा :
आपल्या गावात कायम शांतता नांदावी, ग्रामपंचायतीच्या निवडणुकीत विनाकारण होणारी पैशाची उधळपट्टी टाळावी,  सरपंच पदासाठी होणारा घोडेबाजार थांबावा या मुख्य उद्देशाने वरोरा तालुक्यातील खेमजई गावाने ग्रामपंचायतीची निवडणूक बिनविरोध करण्याचे ऐतिहासिक पाऊल उचलले आहे. गावातील शांताता हे ग्राम परिवर्तनाचे मुख्य सूत्र आहे हे खेमजई गावाने अचूक हेरले असून याचा आदर्श इतर गावसुध्दा घेण्याच्या तयारीत आहे.
वरोरा तालुक्यातील खेमजई हे गाव राजकारण तसेच समाजकारणाचा केंद्रबिंदू म्हणून ओळखले जाते. या गावात सर्व जाती धर्माचे लोक वास्तव्यास आहे. त्यामुळे गावात होणाऱ्या विधानसभा, लोकसभा, पंचायत समिती, जिल्हा परिषद, तसेच ग्रामपंचायतीच्या निवडणुकीमध्ये दोन गटांमध्ये नेहमीच रस्सीखेच होत असे. गावातील वातावरण नेहमीच ताण तणावाचे राहत होते. सत्ता व खुर्चीचा मोह मित्रा-मित्रात, भाऊबंदकी मध्ये वाद लावत होता. विनाकारण भांडण म्हणजे राजकारण  ही बाब हेरून गावातील जेष्ठांच्या मार्गदर्शनात ग्रामहितेशी युवकांनी पुढाकार घेऊन गावची ग्रामपंचायतीची निवडणूक बिनविरोध करण्याचा विडा उचलला व सुयोग्य संवादाने तो यशस्वीही करून दाखवला. त्यामुळे सर्वांना आश्चर्याचा सुखद धक्का बसला आहे.
खेमजई गावाची ग्रामपंचायत नऊ सदस्यांची असून ग्रामस्थांच्या मदतीने व सहमतीने नऊ उमेदवारांचे नामनिर्देशन पत्र काल २९ डिसेंबर २०२० रोजी तहसील कार्यालयात दाखल करण्यात आले. यामध्ये चंद्रहास मोरे, रमेश चौधरी, शैला चवरे, भाऊराव दडमल, माधुरी निब्रड, वंदना नन्नावरे, धनराज गायकवाड, शितल साळवे, मनिषा चौधरी यांचा समावेश आहे. तसेच सरपंच सुध्दा अविरोध निवडण्याचा निर्णय ग्रामस्थांनी घेतला आहे. यावेळी कैन्हयालाल जैस्वाल  व डॉ. गांपावर, अरविंद पेटकर, भगवंत नन्नावरे, अशोक दडमल, विनायक बावणे, रवींद्र रणदिवे, अनिल साळवे, विजय निब्रड, विलास चौधरी, कमलाकर कापटे व सर्व उमेदवार उपस्थित होते.
खेमजई गावाच्या या निर्णयाचे कौतुक सर्व स्तरातून करण्यात येत आहे. खेमजई गावचे सुपुत्र पोंभुर्णा पंचायत समितीचे गट विकास अधिकारी धनंजय साळवे, तसेच वरोरा पंचायत समितीचे गट विकास अधिकारी श्रीकांत बोबडे, शेगाव पोलीस स्टेशनचे ठाणेदार सुधीर बोरकुटे, ग्रामसेवक एम.डी. येचंलवार आणि पोलीस पाटील विश्वनाथ तुराणकर यांनी सुध्दा या निर्णयाचे स्वागत केले आहे.




  Print






News - Chandrapur | Posted : 2020-12-30






Related Photos