महत्वाच्या बातम्या

यवतमाळ : अवधुतवाडी पोलीस स्टेशनचे ठाणेदार नरेश रणधीर यांना १५ डिसेंबर २०२५ पर्यंत पोलीस कोठडी

- ठाणेदार नरेश रणधीर यांना १५ डिसेंबर पर्यंत पोलीस कोठडी

विदर्भ न्युज एक्सप्रेस
अयनुद्दीन सोलंकी / घाटंजी : यवतमाळ येथील अवधुतवाडी पोलीस स्टेशनचे ठाणेदार तथा पोलीस निरीक्षक नरेश रमेशराव रणधीर (ह.मु. यवतमाळ, रा. अंमळनेर जिल्हा जळगांव) यांना अमरावती येथील लाचलुचपत प्रतिबंधक विभागाने १ लाख रुपयाची लाच घेतांना सापळा यशस्वी करुन रंगेहाथ पकडले. दरम्यान, संशयित आरोपी अवधुतवाडी पोलीस स्टेशनचे ठाणेदार नरेश रणधीर यांना १५ डिसेंबर २०२५ पर्यंत पोलीस कोठडीत रवानगी करण्यात आली आहे.

पोलीस सुत्राने दिलेल्या माहितीनुसार, ११ डिसेंबर २०२५ रोजी यातील तक्रारदार यांनी तक्रार दिली की, त्यांचे एका मित्राला पैश्याची गरज असल्याने त्यांनी मध्यस्थी करून त्याने दुसऱ्या मित्रांकडून १०,००,०००/- रुपये (दहा लाख रुपये) घेवून ६ महिन्याकरीता त्यांना दिले. परंतु ज्या मित्राला पैसे दिले त्याने सहा महिने पुर्ण होवूनही घेतलेले पैसे अद्यापपावेतो परत दिलेले नाही. त्यामुळे तक्रारदार यांनी १० डिसेंबर २०२५ रोजी ज्या मित्राला पैसे दिले तो परत करत नसल्याबाबतची तक्रार अवधुतवाडी पोलीस स्टेशन, यवतमाळ येथे दिली असता, नरेश रणधीर, पोलीस निरीक्षक अवधुतवाडी पोलीस स्टेशन, यवतमाळ यांनी तक्रारदार यांना त्यांचे पैसे परत मिळवून देण्याचे मोबदल्यात ५,००,०००/- रुपये (पांच लाख रुपये) लाचेची मागणी केल्याबाबतची लेखी तक्रार लाचलुचपत प्रतिबंधक विभाग, अमरावती येथे दाखल केली.

सदर तक्रारीचे अनुषंगाने, १२ डिसेंबर २०२५ रोजी करण्यात आलेल्या पडताळणी दरम्यान आलोसे यांनी तक्रारदार यांचेकडे ३,००,००० रुपये (तीन लाख रुपये) लाचेची मागणी केल्याचे निष्पन्न झाले.

त्यानंतर आयोजित सापळा कारवाई दरम्यान आलोसे नरेश रणधीर, पोलीस निरीक्षक यांनी तक्रारदार यांचेकडून मागणी केलेल्या लाच रक्कमेच्या पैकी १,००,०००/- रुपये (एक लाख रुपये) लाच स्विकारले. या वरुन आलोसे नरेश रणधीर, पोलीस निरीक्षक पोलीस स्टेशन अवधुतवाडी, यवतमाळ यांना ताब्यात घेण्यात आले असुन, त्यांचे विरुध्द अवधुतवाडी पोलीस स्टेशन यवतमाळ येथे गुन्हा दाखल करण्यात आला आहे.

सदरची कार्यवाही लाचलुचपत प्रतिबंधक विभागाचे अमरावती परिक्षेत्र अमरावतीचे पोलीस अधीक्षक बापू बांगर, अपर पोलीस अधीक्षक संचिद्र शिंदे, पोलीस उप अधीक्षक सुनील किनगे यांच्या मार्गदर्शनाखाली पोलीस निरीक्षक चित्रा मेसरे, पोलीस निरीक्षक स्वप्नील निराळे, पोलीस शिपाई शैलेश कडू, उपेंद्र थोरात, वैभव जायले, चालक सहाय्यक पोलीस उप निरीक्षक सतीश किटूकले, चालक पोलीस काॅन्स्टेबल राजेश बहीरट आदींनी यशस्वी रीत्या पार पाडली.

दरम्यान, अवधुतवाडी पोलीस स्टेशनचे ठाणेदार तथा पोलीस निरीक्षक नरेश रमेशराव रणधीर यांच्या घराची झडती लाचलुचपत प्रतिबंधक विभागाच्या अधिकाऱ्यांनी घेतल्याचे विश्वासनिय वृत आहे.