महत्वाच्या बातम्या

महाराष्ट्रातील १९५ वैद्यकीय अधिकाऱ्यांच्या पदस्थापनेसाठी न्यायाची प्रतीक्षा

विदर्भ न्यूज एक्सप्रेस
वृत्तसंस्था / मुंबई : महाराष्ट्रातील १९६ वैद्यकीय अधिकाऱ्यांना गट अ पदोन्नती मिळून तीन महिने उलटले असले तरी, १९५ अधिकाऱ्यांची पदस्थापना अद्याप प्रलंबित आहे. १३ ऑगस्ट २०२५ रोजी जाहीर झालेल्या या पदोन्नतीच्या निवडसूचीनंतर सर्व प्रशासकीय प्रक्रिया पूर्ण झाल्या आहेत, परंतु प्रत्यक्ष नियुक्तीचे आदेश फक्त एका अधिकाऱ्याला देण्यात आले आहेत, तो देखील त्यांच्या सेवानिवृत्तीच्या दोन दिवस आधी.

महाराष्ट्र राज्य राजपत्रित वैद्यकीय अधिकारी महासंघाने मुख्यमंत्री देवेंद्र फडणवीस यांना सादर केलेल्या निवेदनात या बाबीची गंभीर दखल घेत तातडीने निर्णय घेण्याची मागणी केली आहे. महासंघाच्या म्हणण्यानुसार, तीन दशकांच्या सेवेनंतर पदोन्नती मिळूनही नियुक्तीचे आदेश न मिळणे, हा अधिकाऱ्यांसाठी अत्यंत मनस्तापदायक अनुभव आहे.

पदोन्नती मिळूनही नियुक्तीचा पत्ता नाही -
महासंघाचे म्हणणे आहे की, अनेक अधिकाऱ्यांना पदोन्नती मिळूनही ते प्रत्यक्ष रुजू होण्याच्या आदेशाची प्रतीक्षा करत आहेत. त्यात पुढील महिन्यात दोन अधिकारी निवृत्त होणार असून त्यांनाही पदस्थापना मिळण्याची शक्यता कमी आहे. महासंघाने मुख्यमंत्र्यांकडे तातडीने हस्तक्षेप करण्याची मागणी केली आहे.

अमरावती -
आरोग्य विभागातील वैद्यकीय अधिकारी आणि कर्मचाऱ्यांच्या आस्थापना आणि पदोन्नतीविषयी प्रकरणे अनेक वर्षांपासून प्रलंबित आहेत. यामुळे या विभागातील अधिकाऱ्यांमध्ये असंतोष निर्माण झाला आहे. दुर्गम भागांमध्ये काम करणाऱ्या अधिकाऱ्यांवर अतिरिक्त कामाचा ताण येत आहे, तसेच कंत्राटी कर्मचाऱ्यांवर कामाचा ताण वाढला आहे.

न्यायासाठी प्रतीक्षेचा सूर -
राज्यभरातील वैद्यकीय अधिकारी पदोन्नतीसाठी पात्र असूनही त्यांची नियुक्ती झालेली नाही. आरोग्य विभागातील गट ब मधील अनेक अधिकाऱ्यांच्या पदोन्नतीसंबंधी निर्णय लवकर घेतले जावेत अशी अपेक्षा आहे. विशेषत: गट ब विभागातील अधिकारी पदोन्नतीसाठी प्रतीक्षेत आहेत, पण त्यांना न्याय मिळण्यास विलंब होत आहे.

कंत्राटी कर्मचाऱ्यांवर कामाचा ताण -
दुरदराज भागातील अधिकाऱ्यांना नियमित नियुक्ती न मिळाल्याने कंत्राटी कर्मचाऱ्यांना नियमित अधिकारी म्हणून काम सोपवले जात आहे. त्यामुळे, नियमित पदे भरून काढली जावीत व पदोन्नतीसाठी पात्र असलेल्या अधिकाऱ्यांना लवकरच पदस्थापना मिळावी अशी अपेक्षा व्यक्त होत आहे.

प्रशासनाची दिरंगाई आणि नियुक्तीचे प्रश्न -
सहा महिन्यांपूर्वी पदोन्नतीसंबंधी शासनस्तरावर बैठक झाली होती. जीएडीकडून १९६ वैद्यकीय अधिकाऱ्यांच्या गट ब पदोन्नतीला मंजुरी मिळाली होती, तरीही एकाच अधिकाऱ्याला पदस्थापना आदेश मिळाला. १९५ अधिकाऱ्यांच्या नियुक्तीला विलंब का होत आहे, असा प्रश्न उपस्थित होत आहे.

मुख्यमंत्र्यांनी तातडीने हस्तक्षेप करावा -
आरोग्य विभागातील अधिकाऱ्यांनी मुख्यमंत्री देवेंद्र फडणवीस यांच्याकडे तातडीने हस्तक्षेप करण्याची आणि प्रलंबित कामांचा निपटारा करण्याची मागणी केली आहे. जर लवकर निर्णय न घेण्यात आले, तर आरोग्य विभागात कार्यरत अधिकाऱ्यांमध्ये असंतोष वाढण्याची शक्यता आहे.