महत्वाच्या बातम्या

आशियातील सर्वात मोठं मेट्रो कारशेड पूर्ण : उद्घाटनासाठी मुहूर्ताची प्रतिक्षा

विदर्भ न्यूज एक्सप्रेस
वृत्तसंस्था / मुंबई : मुंबई महानगर प्रदेश विकास प्राधिकरण (एमएमआरडीए) ने डी. एन. नगर ते मंडाळे मेट्रो २ बी मार्गिकेसाठी अत्याधुनिक आणि आशियातील सर्वात मोठं कारशेड उभारलं आहे. हे कारशेड एकाच वेळी ७२ मेट्रो गाड्यांना उभं करण्याची क्षमता राखत, २९ किमी लांबीच्या अंतर्गत ट्रॅकसोबत सुसज्ज आहे. लवकरच या कारशेडमधून मेट्रोचे संचलन सुरू होणार आहे.

मेट्रो २ बी मार्गिका २३.६ किमी लांबीची असून, त्यावर १९ स्थानकं असतील. या मार्गिकेसाठी १०,९८६ कोटी रुपयांचा खर्च अपेक्षित आहे. कारशेड मंडाळे येथील ३०.४५ हेक्टर जागेवर उभारलेलं असून, तळमजला आणि अधिक एक मजला अशा स्वरूपात तयार करण्यात आले आहे. गाड्यांच्या ये-जा सुलभ करण्यासाठी तीन वाय डक्ट्स उभारण्यात आले आहेत. यासोबतच, कर्मचाऱ्यांसाठी अत्याधुनिक प्रशिक्षण केंद्र देखील येथे उभारलं आहे.

तथापि, मेट्रो २ बी मार्गिकेच्या उद्घाटनासाठी अद्याप मुहूर्त मिळालेला नाही. मेट्रोच्या कामांचा समारोप होऊन दीड महिना झालं असून, सीएमआरएस प्रमाणपत्र देखील मिळालं आहे. एमएमआरडीएने उद्घाटनाची तयारी केली असताना, राज्य सरकारकडून अद्याप उद्घाटनाच्या वेळेची माहिती मिळालेली नाही.