महत्वाच्या बातम्या

 बल्लारपुरात गांजा सेवन करणाऱ्या चौघांवर गुन्हे दाखल : पोलिसांची विविध ठिकाणी कारवाई


विदर्भ न्यूज एक्सप्रेस
तालुका प्रतिनिधी / बल्लारपूर : शहरातील सार्वजनिक ठिकाणी गांजासारख्या अंमली पदार्थाचे सेवन करणाऱ्यांविरुद्ध बल्लारपूर पोलिसांनी कारवाई केली. किल्ला वार्ड, भगतसिंग वार्ड आणि पंडित दिनदयाळ वार्ड परिसरात केलेल्या कारवाईत चार जण गांजाचे सेवन करताना आढळून आले. या चौघांविरुद्ध एनडीपीएस कायद्याच्या कलम २७ अन्वये गुन्हे दाखल करण्यात आले आहेत.

मिळालेल्या माहितीनुसार, बल्लारपूर पोलीस ठाण्याचे गुन्हे शोध पथकाचे अधिकारी आणि अंमलदार शहरात अंमली पदार्थांचे सेवन करणाऱ्यांविषयी माहिती घेत गस्त घालत होते. यावेळी किल्ला वार्डातील बाबा पान सेंटरजवळ सार्वजनिक ठिकाणी गांजाचे सेवन सुरू असल्याची माहिती मिळाली. पोलिसांनी घटनास्थळी धाड टाकली असता सिगारेटमध्ये गांजासदृश पदार्थ भरून त्याचे सेवन करणारा सुमित कृष्णा रामटेके (२०), रा. किल्ला वार्ड, बल्लारपूर आढळून आला. त्याच्याकडून अर्धवट जळालेली सिगारेट, गांजाची राख आणि आगपेटी मिळाली.

दरम्यान, भगतसिंग वार्डातील छठपूजा घाट परिसरात केलेल्या कारवाईत धनेन्द्र ऊर्फ गोलू संघराज पिपलांगे (१९), रा. भगतसिंग वार्ड आणि अभिषेक नारायण नक्का (२१), रा. आंबेडकर वार्ड हे दोघे गांजाचे सेवन करताना आढळले. त्यांच्याकडून गांजाची राख, अर्धवट जळालेली सिगारेट आणि आगपेटी मिळाली. तसेच पंडित दिनदयाळ वार्डातील खुल्या परिसरात केशरंजन अवधेश सिंग (३२), रा. पंडित दिनदयाळ वार्ड हा गांजाने भरलेल्या चिलममधून सेवन करताना आढळून आला. त्याच्याकडून चिलम, माचीस आणि गांजाची राख मिळाली.

पोलिसांनी चारही प्रकरणांत पंचनामा करून गांजा सेवनासाठी वापरण्यात आलेले साहित्य पंचांसमक्ष नष्ट केले. संबंधितांची वैद्यकीय तपासणी करून रासायनिक परीक्षणासाठी रक्त व लघवीचे नमुने घेण्यात आले. या चौघांविरुद्ध बल्लारपूर पोलीस ठाण्यात एनडीपीएस कायद्याच्या कलम २७ अन्वये गुन्हे दाखल करण्यात आले आहेत. शहरातील सार्वजनिक ठिकाणी अंमली पदार्थांचे सेवन करणाऱ्यांविरुद्ध पोलिसांनी सुरू केलेल्या कारवाईने अशा प्रकारांवर नियंत्रण आणण्याचा प्रयत्न केला जात आहे.

सदर कारवाई पोलीस निरीक्षक बिपिन इंगळे यांच्या मार्गदर्शनाखाली सहायक पोलीस निरीक्षक अनिल राऊत यांचा नेतृत्वात पोलीस उपनिरीक्षक उमेश जोगदंड आणि अंमलदारानी केले.





  Print






Related Photos