मुख्यमंत्री समृद्ध पंचायत राज अभियानात दिभना ग्रामपंचायत जिल्ह्यात प्रथम


- चोप ग्रामपंचायतीला द्वितीय, तर देऊळगावला तृतीय क्रमांक; विजेत्या ग्रामपंचायतींना एक कोटींचे पुरस्कार
- आगामी अभियानात राज्यस्तरावर प्रथम क्रमांक मिळविण्यासाठी प्रयत्न करा – मुख्य कार्यकारी अधिकारी सुहास गाडे
विदर्भ न्यूज एक्सप्रेस
प्रतिनिधी / गडचिरोली : मुख्यमंत्री समृद्ध पंचायत राज अभियान सन २०२५-२६ अंतर्गत गडचिरोली जिल्हास्तरीय पुरस्कारांमध्ये गडचिरोली तालुक्यातील दिभना ग्रामपंचायतीने प्रथम क्रमांक पटकावत जिल्ह्यात अव्वल स्थान मिळविले आहे. देसाईगंज तालुक्यातील चोप ग्रामपंचायतीने द्वितीय, तर आरमोरी तालुक्यातील देऊळगाव ग्रामपंचायतीने तृतीय क्रमांक प्राप्त केला आहे. या तीनही विजेत्या ग्रामपंचायतींना अनुक्रमे ५० लाख, ३० लाख आणि २० लाख रुपये असे एकूण एक कोटी रुपयांचे पुरस्कार जाहीर करण्यात आले आहेत. जिल्हा परिषद गडचिरोलीच्या वतीने १९ नोव्हेंबर रोजी जिल्हाधिकारी कार्यालयातील नियोजन भवन येथे जिल्हास्तरीय पुरस्कार वितरण सोहळा आणि मुख्यमंत्री समृद्ध पंचायत राज अभियान सन २०२६-२७ च्या पूर्वतयारीसाठी जिल्हास्तरीय कार्यशाळेचे आयोजन करण्यात आले होते. या कार्यक्रमाच्या अध्यक्षस्थानी जिल्हा परिषदेचे मुख्य कार्यकारी अधिकारी सुहास गाडे होते.
यावेळी मार्गदर्शन करताना मुख्य कार्यकारी अधिकारी सुहास गाडे यांनी ग्रामपंचायती या ग्रामीण विकासाचा कणा असल्याचे सांगितले. गावांच्या सर्वांगीण विकासामध्ये ग्रामपंचायतींची भूमिका अत्यंत महत्त्वाची असून, लोकसहभाग, पारदर्शक प्रशासन आणि नाविन्यपूर्ण उपक्रमांच्या माध्यमातून विकासकामांना गती देणे आवश्यक असल्याचे त्यांनी नमूद केले. मुख्यमंत्री समृद्ध पंचायत राज अभियान सन २०२६-२७ मध्ये जिल्ह्यातील सर्व ग्रामपंचायतींनी अधिक प्रभावीपणे सहभाग नोंदवावा. केवळ जिल्हास्तरावर यश मिळविण्यापुरते मर्यादित न राहता आगामी अभियानात राज्यस्तरावर प्रथम क्रमांक मिळविण्याचे उद्दिष्ट ठेवून नियोजनबद्ध पद्धतीने काम करावे, असे आवाहनही त्यांनी केले.
लोकसहभाग आणि प्रभावी अंमलबजावणीवर भर -
आगामी अभियानाच्या अनुषंगाने आयोजित कार्यशाळेत ग्रामपंचायतींच्या कामकाजात सुधारणा करणे, प्रशासन अधिक पारदर्शक बनविणे, ग्रामस्थांचा सहभाग वाढविणे तसेच विविध विकास योजनांची प्रभावी अंमलबजावणी करणे या विषयांवर मार्गदर्शन करण्यात आले. गावांच्या गरजा लक्षात घेऊन विकासकामांचे नियोजन करणे आणि उपलब्ध संसाधनांचा योग्य वापर करून ग्रामपंचायतींनी आदर्श कामगिरी करण्यावर विशेष भर देण्यात आला. जिल्ह्यातील ग्रामपंचायतींनी विविध विकासकामे, लोकसहभाग आणि प्रशासकीय कार्यक्षमतेच्या माध्यमातून ग्रामीण विकासाला चालना द्यावी. आगामी अभियानात अधिकाधिक ग्रामपंचायतींनी पुरस्कार मिळविण्याच्या दृष्टीने प्रयत्न करावेत, असेही यावेळी सांगण्यात आले.
या कार्यक्रमाला अतिरिक्त मुख्य कार्यकारी अधिकारी राजेंद्र भुयार, जिल्हा ग्रामीण विकास यंत्रणेचे प्रकल्प संचालक राहुल काळभोर, उपमुख्य कार्यकारी अधिकारी (सामान्य प्रशासन) अनिकेत पाटील, जिल्हा कार्यक्रम अधिकारी (महिला व बालविकास) दीपक बानाईत, जिल्हा आरोग्य अधिकारी डॉ. प्रताप शिंदे, उपजिल्हा कार्यक्रम समन्वयक चेतन हिवंज, ग्रामीण पाणीपुरवठा विभागाचे कार्यकारी अभियंता विनोद उद्धरवार यांच्यासह जिल्हा परिषदेचे विविध विभागप्रमुख आणि सर्व पंचायत समित्यांचे गटविकास अधिकारी उपस्थित होते.
कार्यक्रमाचे प्रास्ताविक उपमुख्य कार्यकारी अधिकारी (ग्रामपंचायत) पंकज भोयर यांनी केले. सूत्रसंचालन शेषराव नागमोती यांनी केले, तर जिल्हा व्यवस्थापक (पेसा) प्रमोद भोयर यांनी उपस्थितांचे आभार मानले.दिभना, चोप आणि देऊळगाव या ग्रामपंचायतींनी जिल्हास्तरावर मिळविलेल्या यशामुळे संबंधित गावांच्या विकासकामांना प्रोत्साहन मिळणार असून, आगामी अभियानात जिल्ह्यातील इतर ग्रामपंचायतींसमोरही उत्कृष्ट कामगिरी करण्याचे आव्हान उभे राहिले आहे.




Petrol Price




