Petrol Price
वोट बचाओ, देश बचाओ अभियानाला चंद्रपुरात बळ : आ. बाला बच्चन यांनी घेतला संघटनात्मक कामकाजाचा आढावा
विदर्भ न्यूज एक्सप्रेस
प्रतिनिधी / चंद्रपूर : लोकशाही आणि संविधानाचे संरक्षण, मतदारांच्या हक्कांविषयी जनजागृती तसेच काँग्रेस संघटनेच्या बळकटीकरणाच्या उद्देशाने अखिल भारतीय काँग्रेस कमिटीच्या वतीने राबविण्यात येत असलेल्या वोट बचाओ, देश बचाओ अभियानांतर्गत चंद्रपुरात काँग्रेस पदाधिकारी व कार्यकर्त्यांची महत्त्वपूर्ण बैठक पार पडली. मध्य प्रदेशचे माजी गृहमंत्री तथा राजपूर विधानसभा क्षेत्राचे आमदार बाला बच्चन यांच्या अध्यक्षतेखाली हॉटेल सिद्धार्थ प्रीमियर येथे झालेल्या या बैठकीत संघटनात्मक कामकाजाचा आढावा घेण्यात आला.
तसेच १ नोव्हेंबर २०२६ रोजी दिल्लीतील रामलीला मैदानावर होणाऱ्या वोट बचाओ, देश बचाओ महारॅलीत मोठ्या संख्येने सहभागी होण्याचे आवाहन करण्यात आले.या बैठकीला काँग्रेस विधिमंडळ पक्षाचे गटनेते आमदार विजय वडेट्टीवार, जिल्हा काँग्रेसचे अध्यक्ष तथा माजी आमदार सुभाष धोटे आणि जिल्हा शहर काँग्रेसचे अध्यक्ष शिवा राव पोलशेट्टी यांची प्रमुख उपस्थिती होती. अखिल भारतीय काँग्रेस कमिटीने चंद्रपूर जिल्हा काँग्रेसचे निरीक्षक म्हणून नियुक्त केलेले आमदार बाला बच्चन यांनी पदाधिकारी व कार्यकर्त्यांशी संवाद साधत पक्षाच्या संघटनात्मक कामकाजाचा आढावा घेतला.
वोट बचाओ, देश बचाओ अभियानाची प्रभावी अंमलबजावणी, पक्षाची संघटनात्मक बांधणी आणि आगामी पक्षीय कार्यक्रमांचे नियोजन यावर बैठकीत चर्चा करण्यात आली. मतदारांच्या अधिकारांविषयी जनजागृती करणे, लोकशाही प्रक्रियेवरील जनतेचा विश्वास दृढ करणे आणि काँग्रेसची भूमिका जनतेपर्यंत पोहोचविण्यासाठी कार्यकर्त्यांनी सक्रियपणे पुढाकार घ्यावा, असे आवाहन यावेळी करण्यात आले.
बैठकीनंतर आमदार बाला बच्चन, आमदार विजयभाऊ वडेट्टीवार आणि जिल्हाध्यक्ष सुभाष धोटे यांनी पत्रकार परिषद घेऊन वोट बचाओ, देश बचाओ अभियान, मतचोरीचे आरोप आणि दिल्ली येथे आयोजित करण्यात येणाऱ्या महारॅलीविषयी भूमिका मांडली. मतचोरीचा मुद्दा गंभीर असल्याचे सांगत भारतीय लोकशाही, संविधान आणि नागरिकांच्या अधिकारांच्या संरक्षणासाठी विरोधी पक्षनेते राहुल गांधी यांच्या नेतृत्वाखाली काँग्रेस आणि इंडिया आघाडी संघर्ष करीत असल्याचे त्यांनी नमूद केले. या पार्श्वभूमीवर १ नोव्हेंबर रोजी दिल्लीतील रामलीला मैदानावर होणाऱ्या महारॅलीत काँग्रेस पदाधिकारी, कार्यकर्ते आणि नागरिकांनी मोठ्या संख्येने सहभागी व्हावे, असे आवाहन करण्यात आले.
या बैठकीला अनुसूचित जाती विभाग काँग्रेसचे प्रदेशाध्यक्ष अनिरुद्ध वनकर, युवक काँग्रेसचे जिल्हाध्यक्ष शंतनू धोटे, एनएसयूआयचे जिल्हाध्यक्ष सफाक शेख, प्रदेश सचिव रोशनलाल बिट्टू, सेवादल काँग्रेसचे जिल्हाध्यक्ष सचिन कत्याल, शहर महिला काँग्रेसच्या जिल्हाध्यक्ष चंदाताई वैरागडे, माजी जिल्हाध्यक्ष सुभाषसिंह गौर, विनायक बांगडे, विनोद दत्तात्रय, के. के. सिंग, प्रवीण पडवेकर, प्रा. सूर्यकांत खनके, प्रा. राम राऊत, प्रमोद बोरीकर, दीपक वाढई, श्यामकांत थेरे, सपना मोरे, पवन भगत आणि सुनीता गोवर्धन उपस्थित होते.
याशिवाय नगराध्यक्ष अरुण धोटे, नगराध्यक्षा अलकाताई वाढई, माजी महापौर संगीता अमृतकर, महानगरपालिकेतील काँग्रेसचे गटनेते सुरेंद्र अडबाले, नगराध्यक्षा दीप्ती सोनटक्के, उपनगराध्यक्ष राजू रेड्डी, दिनेश चोखारे, प्रवीण काकडे, भास्कर माकोडे, विजय घरत, तालुकाध्यक्ष विजय गावंडे, खेमराज तिडके, प्रमोद चौधरी, अनिल नरुले, उत्तमराव पेचे, रंजन लांडे, गोविंदा उपरे, अशोक रेचनकर, नितीन गोहणे, वासुदेव पाल, रमाकांत लोधे, राजेंद्र चिकटे आणि शहराध्यक्ष अब्दुल करीम शेख यांच्यासह काँग्रेसचे प्रदेश, जिल्हा व शहर स्तरावरील पदाधिकारी, विविध आघाड्यांचे प्रतिनिधी आणि कार्यकर्ते उपस्थित होते.
कार्यक्रमाचे प्रास्ताविक शिवा राव पोलशेट्टी यांनी केले. संचालन जिल्हा शहर काँग्रेसचे अध्यक्ष मनीष तिवारी यांनी केले, तर आभार प्रदर्शन शहर महिला काँग्रेसच्या जिल्हाध्यक्ष चंदाताई वैरागडे यांनी मानले.
