महत्वाच्या बातम्या

 प्रत्येक ग्रामपंचायतीने किमान १०० जलतारा कामे हाती घ्यावीत - पराग सोमण


- पवनार येथे जलतारा कामाचा शुभारंभ

विदर्भ न्यूज एक्सप्रेस 
प्रतिनिधी / वर्धा : पाणीटंचाई आणि कोरड्या दुष्काळाच्या परिस्थितीवर मात करण्यासाठी तसेच भूजल पातळीत वाढ करण्याच्या दृष्टीने गावपातळीवर जलसंधारणाची कामे प्रभावीपणे राबविणे आवश्यक आहे. यासाठी विकसित भारत रोजगार व आजीविका हमी मिशन तसेच मुख्यमंत्री समृद्ध पंचायत राज अभियान ५.० अंतर्गत जिल्ह्यातील प्रत्येक ग्रामपंचायतीने किमान १०० जलतारा कामे हाती घ्यावीत, असे आवाहन जिल्हा परिषदेचे मुख्य कार्यकारी अधिकारी पराग सोमण यांनी केले.

विकसित भारत रोजगार व आजीविका हमी मिशन अंतर्गत ग्रामपंचायत पवनार, येथे जलतारा कामाचा शुभारंभ मुख्य कार्यकारी अधिकारी पराग सोमण यांच्या हस्ते करण्यात आला. त्यावेळी ते बोलत होते. उपमुख्य कार्यकारी अधिकारी प्रफुल्ल लोखंडे, गटविकास अधिकारी (नरेगा) शीतल हिरवाळे यांच्यासह जिल्हा परिषद व पंचायत समितीचे अधिकारी व कर्मचारी उपस्थित होते.

यावेळी मुख्य कार्यकारी अधिकारी सोमण यांनी जलतारा कामांचे महत्त्व विशद करताना, पावसाचे पाणी जमिनीत मुरवून भूजल पातळी वाढविण्यासाठी अशा प्रकारची कामे उपयुक्त ठरतात, असे सांगितले. भविष्यातील पाणीटंचाई टाळण्यासाठी प्रत्येक गावाने जलसंधारणाच्या कामांना प्राधान्य देऊन लोकसहभागातून ही कामे पुर्ण करावीत, असेही ते म्हणाले.





  Print






Related Photos