निवृत्तीवेतनधारकांसाठी २० नोव्हेंबरला नागपुरात महामेळावा


- चेहरा प्रमाणीकरणाद्वारे डिजिटल हयात प्रमाणपत्र तयार करून मिळणार; आधार कार्ड, पीपीओ क्रमांक व बँक पासबुक आणण्याचे आवाहन
विदर्भ न्यूज एक्सप्रेस
प्रतिनिधी / नागपूर : राज्यातील शासकीय निवृत्तीवेतनधारक आणि कुटुंब निवृत्तीवेतनधारकांसाठी डिजिटल हयात प्रमाणपत्र तयार करण्याच्या उद्देशाने नागपुरात २० नोव्हेंबर रोजी विशेष महामेळाव्याचे आयोजन करण्यात आले आहे. केंद्र सरकारच्या देशव्यापी डिजिटल जीवन प्रमाणपत्र अभियानांतर्गत चेहरा प्रमाणीकरण (फेस ऑथेंटिकेशन) तंत्रज्ञानाचा प्रचार व प्रसार करण्यासाठी हा उपक्रम राबविण्यात येत आहे. या महामेळाव्यात पात्र निवृत्तीवेतनधारकांना प्रत्यक्ष उपस्थितीत ऑनलाइन हयात प्रमाणपत्र तयार करून देण्याची सुविधा उपलब्ध करून दिली जाणार आहे. वरिष्ठ कोषागार कार्यालय, जिल्हा अग्रणी बँक आणि नागपूर जिल्ह्यातील सर्व राष्ट्रीयीकृत बँकांच्या संयुक्त विद्यमाने या महामेळाव्याचे आयोजन करण्यात आले आहे. नागपुरातील नियोजन भवन येथे २० नोव्हेंबर रोजी सकाळी १०.३० ते दुपारी 1 वाजेपर्यंत हा कार्यक्रम पार पडणार आहे. या उपक्रमाला प्रधान सचिव (लेखा व कोषागार) डॉ. रिचा बागला, डीओपीपीडब्ल्यूचे निदेशक डॉ. प्रमोद कुमार तसेच लेखा व कोषागारे विभागाच्या संचालक दीपा देशपांडे यांची प्रमुख उपस्थिती राहणार आहे. त्यांच्या मार्गदर्शनाखाली निवृत्तीवेतनधारकांना डिजिटल हयात प्रमाणपत्राच्या प्रक्रियेबाबत माहिती आणि आवश्यक तांत्रिक सहाय्य उपलब्ध करून देण्यात येणार आहे.
चेहरा प्रमाणीकरणाद्वारे होणार प्रमाणपत्राची निर्मिती -
निवृत्तीवेतनधारकांना दरवर्षी आपले हयात प्रमाणपत्र सादर करणे आवश्यक असते. यासाठी बँक किंवा संबंधित कार्यालयात प्रत्यक्ष जाण्याची आवश्यकता अनेकदा भासते. मात्र, डिजिटल जीवन प्रमाणपत्र प्रणालीमुळे ही प्रक्रिया अधिक सुलभ होत आहे. विशेषतः चेहरा प्रमाणीकरण तंत्रज्ञानाच्या माध्यमातून निवृत्तीवेतनधारकांची ओळख पडताळून ऑनलाइन हयात प्रमाणपत्र तयार करता येते. नागपुरात आयोजित महामेळाव्यात ही संपूर्ण प्रक्रिया प्रत्यक्ष करून दाखविण्यासोबतच सहभागी निवृत्तीवेतन धारकांचे डिजिटल हयात प्रमाणपत्र तयार करण्यात येणार आहे. यासाठी जिल्हा कोषागार कार्यालयाच्या वतीने आवश्यक मार्गदर्शन व सहकार्य केले जाणार आहे.
ही कागदपत्रे सोबत आणणे आवश्यक -
महामेळाव्याचा लाभ घेण्यासाठी निवृत्तीवेतनधारक आणि कुटुंब निवृत्तीवेतनधारकांनी काही आवश्यक कागदपत्रे सोबत आणावीत, असे आवाहन करण्यात आले आहे. यामध्ये आधार कार्ड, पीपीओ (पेन्शन पेमेंट ऑर्डर) क्रमांक, बँक खाते पुस्तिका अर्थात पासबुक आणि मोबाईल फोन यांचा समावेश आहे. ही कागदपत्रे उपलब्ध असल्यास डिजिटल हयात प्रमाणपत्र तयार करण्याची प्रक्रिया सुलभ होणार आहे.
डिसेंबर२०२६ च्या निवृत्तीवेतनासाठी प्रमाणपत्र आवश्यक -
डिसेंबर २०२६ महिन्याचे निवृत्तीवेतन अदा करण्यासाठी ऑनलाइन हयात प्रमाणपत्र सादर करणे आवश्यक असल्याने सर्व पात्र निवृत्तीवेतनधारकांनी या महामेळाव्यात सहभागी होऊन सुविधेचा लाभ घ्यावा, असे आवाहन वरिष्ठ कोषागार अधिकारी अमित मेश्राम यांनी केले आहे. वृद्ध आणि ज्येष्ठ निवृत्तीवेतनधारकांना तांत्रिक प्रक्रियेतील अडचणी दूर करून डिजिटल पद्धतीने हयात प्रमाणपत्र तयार करण्यासाठी हा महामेळावा उपयुक्त ठरणार आहे. त्यामुळे नागपूर जिल्ह्यातील सर्व संबंधित निवृत्तीवेतनधारकांनी आवश्यक कागदपत्रांसह नियोजन भवन येथे वेळेत उपस्थित राहून या उपक्रमाचा लाभ घ्यावा, असे आवाहन प्रशासनाच्या वतीने करण्यात आले आहे.




Petrol Price




