Petrol Price
गडचिरोलीच्या सार्वजनिक वाहतुकीला नवी गती : १५ शिवाई इलेक्ट्रिक बसेसचे लोकार्पण
- आमदार डॉ. मिलिंद नरोटे यांच्या हस्ते ई-चार्जिंग स्टेशनचेही उद्घाटन
- प्रवाशांचा प्रवास होणार आरामदायी आणि प्रदूषणमुक्त
विदर्भ न्यूज एक्सप्रेस
प्रतिनिधी / गडचिरोली : जिल्ह्यातील सार्वजनिक वाहतूक व्यवस्था अधिक सक्षम, आधुनिक आणि पर्यावरणपूरक करण्याच्या दिशेने मोठे पाऊल उचलण्यात आले असून, गडचिरोली आगारात दाखल झालेल्या १५ अत्याधुनिक शिवाई इलेक्ट्रिक बसेसचा लोकार्पण व पूजन सोहळा तसेच नव्याने उभारण्यात आलेल्या ई-चार्जिंग स्टेशनचे उद्घाटन स्थानिक बस स्थानक परिसरात आमदार डॉ. मिलिंद नरोटे यांच्या हस्ते उत्साहात पार पडले.
मुख्यमंत्री तथा जिल्ह्याचे पालकमंत्री देवेंद्र फडणवीस यांच्या नेतृत्वाखाली जिल्ह्याच्या विकासाला गती मिळत असून, परिवहन मंत्री प्रतापराव सरनाईक यांच्याकडे केलेल्या सातत्यपूर्ण पाठपुराव्याला यश आल्याने या बसेस गडचिरोली आगाराला उपलब्ध झाल्याचे आमदार डॉ. नरोटे यांनी यावेळी सांगितले. या नवीन बसेस गडचिरोली-नागपूर, गडचिरोली-चंद्रपूर, गडचिरोली-अहेरी आणि गडचिरोली-मुरुमगाव या प्रमुख मार्गांवर धावणार असल्याने जिल्ह्यातील प्रवाशांना अधिक आरामदायी, सुरक्षित आणि प्रदूषणमुक्त प्रवासाची सुविधा मिळणार आहे.
तसेच, या इलेक्ट्रिक बसेसच्या सुरळीत संचलनासाठी आगारात अद्ययावत ई-चार्जिंग स्टेशनही कार्यान्वित करण्यात आल्याने जिल्ह्यातील दळणवळण व्यवस्थेला नवी गती मिळणार आहे. या सोहळ्याला भाजप जिल्हा महामंत्री प्रकाश गेडाम, भाजयुमोचे हरिश माकडे, शुभम बाळेकरमकर, यश कोंडावार, सतीश पेंडोरकर यांच्यासह महाराष्ट्र राज्य परिवहन महामंडळाच्या सनियंत्रण समिती क्र. ०३ चे प्रादेशिक व्यवस्थापक श्रीकांत गभने, प्रादेशिक अभियंता महेंद्रकुमार नेवारे, गडचिरोलीचे विभाग नियंत्रक डॉ. चंद्रकांत वडस्कर, यंत्र अभियंता छगन डिवसे, विभागीय वाहतूक अधिकारी कन्हैया भोगे आणि गडचिरोली आगार व्यवस्थापक सचिन नेवारे प्रामुख्याने उपस्थित होते.
