Petrol Price
बालकामगारांविरोधात चंद्रपूर जिल्ह्यात धाडसत्र मोहीम राबविण्याचे निर्देश
- प्रत्येक गावात आणि शहरी वॉर्डात बाल संरक्षण समित्या स्थापन करा; जिल्हाधिकारी वसुमना पंत यांचे आदेश
विदर्भ न्यूज एक्सप्रेस
प्रतिनिधी / चंद्रपूर : जिल्ह्यातील बालकांचे हक्क आणि संरक्षण सुनिश्चित करण्यासाठी बालकामगारांविरोधात प्रभावी धाडसत्र मोहीम राबविण्यात यावी. तसेच बालकांवरील अत्याचार, बालविवाह, बालमजुरी आणि बालकांचे शोषण रोखण्यासाठी जिल्ह्यातील प्रत्येक गावात तसेच शहरी भागातील प्रत्येक वॉर्डात बाल संरक्षण समित्या स्थापन करून त्यांचा अहवाल सादर करावा, असे निर्देश जिल्हाधिकारी वसुमना पंत यांनी दिले.
जिल्हाधिकारी कार्यालयात जिल्हा बाल संरक्षण कक्ष, जिल्हा व रेल्वे चाईल्ड हेल्पलाईन, बाल कल्याण समिती आणि बाल न्याय मंडळ यांच्या कामकाजाचा त्रैमासिक आढावा घेण्यासाठी बैठक आयोजित करण्यात आली होती. जिल्हाधिकारी वसुमना पंत यांच्या अध्यक्षतेखाली झालेल्या या बैठकीत बाल संरक्षणाशी संबंधित विविध योजना, उपक्रम आणि प्रलंबित प्रकरणांचा सविस्तर आढावा घेण्यात आला.
यावेळी जिल्हाधिकारी पंत यांनी बालकांचे संरक्षण, संगोपन आणि पुनर्वसन यांना सर्वोच्च प्राधान्य देण्याचे निर्देश दिले. जिल्ह्यातील अनाथ बालकांना अनाथ प्रमाणपत्र देण्यासंदर्भातील प्रलंबित प्रकरणे तातडीने निकाली काढावीत, असे त्यांनी स्पष्ट केले. तसेच बालगृहांमध्ये दाखल असलेल्या बालकांच्या पुनर्वसनाची प्रक्रिया गतिमान करून पात्र बालकांचे नियमानुसार लवकरात लवकर पुनर्वसन करावे. यासाठी जिल्हा बाल संरक्षण कक्षाने संबंधित यंत्रणांशी समन्वय साधून आवश्यक कार्यवाही करावी, असेही त्यांनी सांगितले.
जिल्ह्यात बालकामगार आढळण्याची शक्यता असलेल्या ठिकाणांची नियमित तपासणी करून बालमजुरीला प्रतिबंध घालण्यासाठी संबंधित विभागांनी समन्वयाने काम करावे, अशा सूचनाही त्यांनी दिल्या. संकटात सापडलेल्या तसेच काळजी व संरक्षणाची गरज असलेल्या बालकांना तातडीने मदत मिळावी, यासाठी चाईल्ड हेल्पलाईन १०९८ या क्रमांकाची माहिती जिल्ह्यातील प्रत्येक गावात आणि शहरी वॉर्डात पोहोचविण्यावर भर देण्यात आला. याशिवाय बाल कल्याण समिती आणि बाल न्याय मंडळाकडे प्रलंबित असलेली प्रकरणे नियमानुसार तातडीने निकाली काढण्याचे निर्देश देण्यात आले.
बैठकीत जिल्हा महिला व बाल विकास अधिकारी प्रकाश भांदककर यांनी जिल्हा बाल संरक्षण कक्ष, चाईल्ड हेल्पलाईन १०९८, बाल कल्याण समिती आणि बाल न्याय मंडळ यांच्या कामकाजाचा आढावा सादर केला.
यावेळी बाल कल्याण समितीच्या अध्यक्ष ॲड. क्षमा बासरकर, शिक्षणाधिकारी अश्विनी केळकर, परिविक्षा अधिकारी अतिश चव्हाण व सायली पाटील, जिल्हा बाल संरक्षण अधिकारी अजय साखरकर, मनोविकृती तज्ज्ञ संदीप भटकर, चाईल्ड हेल्पलाईनचे जिल्हा समन्वयक अभिषेक मोहूर्ले यांच्यासह जिल्हा विधी सेवा प्राधिकरणाचे प्रतिनिधी, सहायक कामगार आयुक्त कार्यालयाचे प्रतिनिधी, बाल कल्याण समिती व बाल न्याय मंडळाचे सदस्य तसेच विविध विभागांचे अधिकारी आणि कर्मचारी उपस्थित होते.
