शासकीय रुग्णालयातील सुविधांचा आमदार जोरगेवार यांनी घेतला ऑन द स्पॉट आढावा


- अस्वच्छता, बंद एसी व कर्मचाऱ्यांच्या गैरहजेरीवर नाराजी , रुग्णांना दर्जेदार सुविधा देण्याच्या कडक सूचना
विदर्भ न्यूज एक्सप्रेस
प्रतिनिधी / चंद्रपूर : शासकीय वैद्यकीय महाविद्यालय व रुग्णालयातील विविध समस्या आणि रुग्णांना मिळणाऱ्या सुविधांचा आमदार किशोर जोरगेवार यांनी रुग्णालयाची प्रत्यक्ष पाहणी करून आढावा घेतला. पाहणीदरम्यान काही ठिकाणी आढळलेली अस्वच्छता, बंद असलेले एसी, कर्मचाऱ्यांची कर्तव्यावरील गैरहजेरी तसेच रुग्णांना भेडसावणाऱ्या विविध समस्यांबाबत त्यांनी तीव्र नाराजी व्यक्त केली. रुग्णालयातील स्वच्छता, सुरक्षितता आणि सेवा व्यवस्था तातडीने सुधारण्याच्या कडक सूचना त्यांनी संबंधित अधिकाऱ्यांना दिल्या. रुग्णालयातील स्वच्छतेबाबत अनेक तक्रारी प्राप्त होत असल्याचे आमदार जोरगेवार यांनी सांगितले. रुग्णालयासारख्या संवेदनशील ठिकाणी स्वच्छता ही सर्वोच्च प्राधान्याची बाब असली पाहिजे. त्यामुळे रुग्णालय परिसराची नियमित स्वच्छता व पाहणी करून परिसर स्वच्छ आणि आरोग्यदायी ठेवण्याचे निर्देश त्यांनी दिले.
काही कर्मचारी नियमितपणे कर्तव्यावर उपस्थित राहत नसल्याच्या तक्रारींचीही त्यांनी दखल घेतली. प्रत्येक कर्मचाऱ्याने आपली जबाबदारी प्रामाणिकपणे पार पाडणे आवश्यक असून, कर्तव्यावर गैरहजर राहणाऱ्यांबाबत प्रशासनाने गांभीर्याने कारवाई करावी, असे त्यांनी स्पष्ट केले. रुग्णालयातील विविध विभागांमध्ये एसी बंद असल्याचे निदर्शनास आल्यानेही आमदारांनी नाराजी व्यक्त केली. उपचारासाठी येणाऱ्या रुग्णांना व त्यांच्या नातेवाईकांना गैरसोयीचा सामना करावा लागू नये, यासाठी बंद असलेले एसी तातडीने दुरुस्त करून सर्व आवश्यक सुविधा सुरळीत ठेवण्याच्या सूचना त्यांनी दिल्या.
रुग्णालयातील शौचालये रात्री आठ वाजेपर्यंतच सुरू राहत असल्याच्या बाबीचीही त्यांनी दखल घेतली. रुग्णालय २४ तास कार्यरत असल्याने शौचालयांची सुविधाही २४ तास उपलब्ध असणे आवश्यक आहे. त्यामुळे शौचालये दिवसरात्र सुरू ठेवण्याचे निर्देश त्यांनी दिले. रुग्णालयाच्या दृष्टीने अग्निसुरक्षा अत्यंत महत्त्वाचा विषय असल्याचे सांगत आमदार जोरगेवार यांनी फायर एक्स्टिंग्विशर, अग्निशमन यंत्रणा, आपत्कालीन बाहेर पडण्याचे मार्ग तसेच विद्युत व्यवस्थेची नियमित तपासणी करण्याच्या सूचना दिल्या. आपत्कालीन परिस्थितीत रुग्णांना सुरक्षितपणे बाहेर काढण्यासाठी आवश्यक यंत्रणा सदैव सज्ज ठेवावी, असेही त्यांनी सांगितले.
रुग्णालयात उपचारासाठी येणारा प्रत्येक नागरिक मानसिक आणि शारीरिक त्रासातून जात असतो. त्यामुळे डॉक्टर, परिचारिका आणि सर्व कर्मचाऱ्यांनी रुग्ण व त्यांच्या नातेवाईकांशी सौजन्याने, संयमाने आणि आपुलकीने वागावे. रुग्णांना अनावश्यक त्रास होणार नाही तसेच उपचाराबाबत योग्य माहिती मिळेल, याची प्रशासनाने दक्षता घ्यावी, असे निर्देश त्यांनी दिले. रुग्ण व त्यांच्या नातेवाईकांसाठी स्वच्छ आणि शुद्ध पिण्याच्या पाण्याची पुरेशी व्यवस्था असणे आवश्यक असल्याचे आमदारांनी सांगितले. पिण्याच्या पाण्याच्या ठिकाणांची नियमित स्वच्छता करावी तसेच पाण्याची गुणवत्ता तपासून ते सुरक्षित असल्याची खात्री करावी. रुग्णालयात येणाऱ्या प्रत्येक नागरिकाला सहज उपलब्ध होईल, अशी पिण्याच्या पाण्याची व्यवस्था करण्याचे निर्देश त्यांनी दिले. रुग्णालयातील प्रत्येक सुविधा नियमितपणे कार्यरत आणि सुस्थितीत ठेवणे आवश्यक आहे. केवळ कागदोपत्री कार्यवाही न करता त्याचा प्रत्यक्ष लाभ रुग्णांना मिळाला पाहिजे. रुग्णांना कोणत्याही प्रकारची गैरसोय होणार नाही, यासाठी प्रशासनाने तातडीने उपाययोजना करून त्याची प्रभावी अंमलबजावणी करावी, असे आमदार किशोर जोरगेवार यांनी स्पष्ट केले.
दरम्यान, शासकीय वैद्यकीय महाविद्यालय व रुग्णालयात नवजात शिशूंसाठी ह्युमन मिल्क बँक सुरू करण्यासाठी आवश्यक निधी उपलब्ध करून देणार असल्याची घोषणा आमदार जोरगेवार यांनी केली. नवजात बालकांना आवश्यकतेनुसार सुरक्षित व पोषक मानवी दूध उपलब्ध करून देण्यासाठी ही सुविधा महत्त्वपूर्ण ठरणार आहे. यासाठी निधीची कमतरता भासू दिली जाणार नाही, असे त्यांनी स्पष्ट केले. यावेळी शासकीय वैद्यकीय महाविद्यालयाचे अधिष्ठाता डॉ. मिलिंद कांबळे, निवासी वैद्यकीय अधिकारी डॉ. निवृत्ती जिवने, अतिरिक्त जिल्हा शल्यचिकित्सक डॉ. भास्कर सोनारकर, सार्वजनिक बांधकाम विभागाचे उपअभियंता विवेक अंबोले, विद्युत विभागाचे उपअभियंता भूषण येरगुळे यांच्यासह भाजपचे पदाधिकारी, नगरसेवक व कार्यकर्ते उपस्थित होते.




Petrol Price




