Petrol Price
शेअर ट्रेडिंगच्या आमिषाने १ कोटी ४४ लाखांची फसवणूक : रामनगर पोलिसांत तक्रार
विदर्भ न्यूज एक्सप्रेस
प्रतिनिधी / चंद्रपूर : शेअर ट्रेडिंगमध्ये पैसे गुंतवून मोठा परतावा मिळवून देण्याचे आमिष दाखवत अनेकांकडून तब्बल १ कोटी ४४ लाख १२ हजार रुपये घेतल्याचा प्रकार चंद्रपूरच्या रामनगर पोलीस ठाण्याच्या हद्दीत उघडकीस आला आहे. याप्रकरणी उमा पप्पु भट यांनी रामनगर पोलिसांत तक्रार दाखल केली असून, निखिता बारई व कल्याणी दास यांच्याविरुद्ध कायदेशीर कारवाईची मागणी केली आहे.
तक्रारीनुसार, २०२४ मध्ये निखिता बारई हिने शेअर ट्रेडिंगमध्ये पैसे गुंतवल्यास दरमहा १० ते १५ टक्के कमिशन मिळेल, असे सांगून तक्रारदाराचा विश्वास संपादन केला. सुरुवातीला गुंतवलेल्या रकमेवर काही काळ परतावा मिळाल्याने विश्वास अधिक दृढ झाला. त्यानंतर तक्रारदाराने विविध तारखांना निखिता हिच्याकडे मोठ्या रकमा देण्यास सुरुवात केली.
२०२४ ते एप्रिल २०२६ या कालावधीत विविध व्यवहारांतून सुमारे ५५ लाख रुपये दिल्याचे तक्रारदाराने नमूद केले आहे. यातील काही रक्कम रोख स्वरूपात देण्यात आली, तर काही रक्कम बचतीतून आणि सोन्यावर कर्ज घेऊन उभारल्याचे तक्रारीत म्हटले आहे. बँक खाते, यूपीआय व्यवहार आणि इतर कागदपत्रांची तपासणी केल्यानंतर प्रत्यक्ष रक्कम स्पष्ट होणार असल्याचेही तक्रारदाराने सांगितले आहे.
मार्च २०२६ पासून निखिता बारई हिने पैसे देणे बंद केल्यानंतर तक्रारदाराने रक्कम परत मागितली. त्यावेळी संबंधित व्यक्तीचा अपघात झाल्याने पैसे मिळत नसल्याचे सांगून दोन महिन्यांत रक्कम परत करण्याचे आश्वासन देण्यात आल्याचा दावा तक्रारीत करण्यात आला. त्यानंतर परिसरातील नागरिकांनीही पैशांची मागणी केली. मात्र जून महिन्यात पैसे परत करण्याचे आश्वासन देऊनही रक्कम परत न मिळाल्याने संशय अधिक बळावला.
दरम्यान, निखिता बारई ही मुलांसह घर सोडून गेल्याचे समोर आल्यानंतर परिसरातील नागरिकांनी तिच्याकडे केलेल्या आर्थिक व्यवहारांची माहिती घेतली. त्यातून आणखी अनेक नागरिकांकडून शेअर ट्रेडिंगच्या नावाखाली पैसे घेतल्याचा आरोप पुढे आला. तक्रारीनुसार, सीमा संजय मुजुमदार यांच्याकडून १३ लाख ५० हजार, जयंती दिनेश दास ७ लाख, सुप्रिया नरेश ९ लाख, रेखा मनोज पॉल ७ लाख, श्रुती संजय दास ६ लाख, रोहित उर्फ पप्पू रणसिंग भट ११ लाख, शिवम कृष्ण शाहा ६ लाख ३० हजार, आदित्य मनोज मल्लिक २२ लाख ५० हजार, अजहर शेख ६ लाख आणि सचिन दिनेश दास यांच्याकडून ८२ हजार रुपये घेतल्याचा दावा करण्यात आला आहे.
या सर्व नागरिकांकडून मिळून ८९ लाख १२ हजार रुपये घेतल्याचे तक्रारीत नमूद आहे. तक्रारदाराच्या सुमारे ५५ लाख रुपयांसह एकूण सुमारे १ कोटी ४४ लाख १२ हजार रुपयांचा व्यवहार झाल्याचा दावा करण्यात आला आहे. या प्रकरणात निखिता बारई व कल्याणी दास यांच्याविरुद्ध कायदेशीर कारवाई करण्याची मागणी रामनगर पोलिसांकडे करण्यात आली आहे. या प्रकरणातील आर्थिक व्यवहार, बँक व यूपीआय नोंदी तसेच संबंधित व्यक्तींची भूमिका याची चौकशी झाल्यानंतर फसवणुकीची नेमकी व्याप्ती स्पष्ट होणार आहे.
