Petrol Price
देवळीत कापसाला मुहूर्तावर ९,५०१ रुपयांचा भाव : पहिल्याच दिवशी २०० क्विंटलची खरेदी
- उत्पादनात घट; भाववाढीच्या अपेक्षेने शेतकऱ्यांची प्रतीक्षा, सोयाबीनच्या उत्पन्नातून भागविल्या जाताहेत तातडीच्या गरजा
विदर्भ न्यूज एक्सप्रेस
प्रतिनिधी /वर्धा : देवळी येथील संजय इंडस्ट्रीज जिनिंग फॅक्टरीमध्ये शनिवारी कापूस खरेदी हंगामाचा शुभारंभ करण्यात आला. पहिल्याच दिवशी २०० क्विंटल कापसाची खरेदी करण्यात आली असून, कापसाला प्रतिक्विंटल ९,५०१ रुपये भाव देण्यात आला. यंदा परिसरात कापसाचे उत्पादन अपेक्षेप्रमाणे नसल्याने शेतकऱ्यांचे लक्ष आता बाजारातील भाववाढीकडे लागले आहे.
कृषी उत्पन्न बाजार समितीचे सभापती मनोज वसू यांच्या हस्ते कापसाच्या गाडीचे पूजन करून खरेदीचा मुहूर्त साधण्यात आला. जिनिंगचे मालक नेमीचंद घिया, विनोद घिया, संजय घिया आणि विकास घिया यांच्या हस्ते काटापूजन व धार्मिक विधी पार पडले. यावेळी कापूस विक्रीसाठी आणणाऱ्या पहिल्या पाच शेतकऱ्यांचा सन्मान करण्यात आला. उमेश तेलरांधे, अनिल वैद्य, संजय सोनटक्के, वैभव थोटे आणि सूरज जगताप यांना सभापती मनोज वसू यांच्या हस्ते शाल, श्रीफळ आणि भेटवस्तू देऊन गौरविण्यात आले.
भाववाढीच्या अपेक्षेने कापूस विक्रीला ब्रेक -
कापूस खरेदीच्या मुहूर्तावर आवक तुलनेने कमी होती. कापसाचे पीक शेतकऱ्यांच्या घरी येण्यास सुरुवात झाली असली, तरी सध्याच्या भावापेक्षा अधिक दर मिळण्याच्या अपेक्षेने अनेक शेतकरी विक्री करण्याबाबत थांबून निर्णय घेत असल्याचे सांगण्यात येते. आगामी काळात कापसाच्या दरात वाढ होईल, या आशेने शेतकऱ्यांनी सध्या वेट अँड वॉच ची भूमिका स्वीकारली आहे.
कापूस खरेदीच्या शुभारंभाला प्रतिक्विंटल ९,५०१ रुपये भाव मिळाल्याने पुढील काळात बाजारभावाची दिशा काय राहणार, याबाबत शेतकऱ्यांमध्ये उत्सुकता आहे. उत्पादन खर्च, पिकाची स्थिती आणि बाजारातील मागणी लक्षात घेता कापसाला समाधानकारक दर मिळणे आवश्यक असल्याची भावना शेतकरी व्यक्त करीत आहेत.
सोयाबीनच्या उत्पन्नावर दिवाळीचा खर्च -
सध्या बाजारात सोयाबीनची आवक सुरू असून या पिकाला मिळणाऱ्या भावातून शेतकरी आपल्या तातडीच्या आर्थिक गरजा भागवत आहेत. दिवाळीचा खर्च भागविण्यासाठी सोयाबीनच्या उत्पन्नाचा आधार घेतला जात आहे. त्यामुळे काही शेतकऱ्यांनी आर्थिक गरजांसाठी सोयाबीनची विक्री करण्यास प्राधान्य दिले असून, कापसाची विक्री अपेक्षित भाव मिळेपर्यंत पुढे ढकलण्याकडे कल दिसून येत आहे.
खरीप हंगामातील उत्पन्नावर शेतकऱ्यांचे वर्षभराचे आर्थिक नियोजन अवलंबून असते. अशा परिस्थितीत सोयाबीनमधून तातडीच्या गरजा भागवून कापसाला चांगला भाव मिळण्याची प्रतीक्षा केली जात आहे.
उत्पादन घटल्याने कापसाच्या भावाकडे लक्ष -
देवळी परिसरात यंदा कापसाचे उत्पादन अपेक्षित प्रमाणात झालेले नसल्याचे चित्र आहे. त्यामुळे उपलब्ध कापसाला चांगला दर मिळणे शेतकऱ्यांसाठी महत्त्वाचे ठरणार आहे. उत्पादनात घट झाल्याने कापसाच्या बाजारभावावर शेतकऱ्यांचे आर्थिक गणित अवलंबून आहे.
यंदाच्या हंगामात कापसाचे उत्पादन कमी असल्याने शेतकऱ्यांना त्यांच्या कष्टाचा योग्य मोबदला मिळण्याची अपेक्षा आहे. मुहूर्तावर मिळालेल्या ९,५०१ रुपयांच्या भावानंतर आगामी दिवसांत कापसाचे दर वाढतात की स्थिर राहतात, याकडे शेतकरी आणि व्यापाऱ्यांचे लक्ष लागले आहे.
मान्यवरांची उपस्थिती कापूस खरेदीच्या शुभारंभप्रसंगी बाजार समितीचे संचालक हरीश ओझा, कापूस व्यापारी मानक सुराणा, जगदीश ज्योतवानी, नरेश अग्रवाल, महेश अग्रवाल, विवेक कांकरिया, बबलू कांकरिया, प्रमोद ठाकरे, जब्बार तंवर, सुनील बासू, पप्पू टावरी, संतोष कामनापुरे, सोनू जावंधिया, पराग वैद्य, रमेश सातपुते, शैलेश पाळेकर, विक्की उमरे, राजू खत्री तसेच बाजार समितीचे मापारी सतीश चौधरी, सुनील हिवरकर आणि आशिष खडसे यांच्यासह शेतकरी उपस्थित होते.
