Petrol Price
पुण्यश्लोक अहिल्यादेवी होळकर शेतकरी कर्जमुक्ती योजनेची चौथी यादी प्रसिद्ध
- गडचिरोली जिल्ह्यातील २१६ पात्र शेतकऱ्यांची यादी आधार प्रमाणीकरणासाठी जाहीर : शेतकऱ्यांनी ई-केवायसी व ॲग्रीस्टॅक नोंदणी पूर्ण करण्याचे आवाहन
विदर्भ न्यूज एक्सप्रेस
प्रतिनिधी / गडचिरोली : महाराष्ट्र शासनाच्या पुण्यश्लोक अहिल्यादेवी होळकर शेतकरी कर्जमुक्ती योजना-२०२६ अंतर्गत गडचिरोली जिल्ह्यातील २१६ पात्र शेतकऱ्यांची यादी २२ ऑक्टोबर २०२६ रोजी आधार प्रमाणीकरणासाठी प्रसिद्ध करण्यात आली आहे. एकापेक्षा अधिक बँकांमध्ये पीककर्ज खाती असलेल्या आणि दोन लाख रुपयांपेक्षा कमी थकबाकी असलेल्या पात्र शेतकऱ्यांचा या यादीत समावेश आहे. संबंधित शेतकऱ्यांनी जवळच्या आपले सरकार सेवा केंद्रात जाऊन ई-केवायसी प्रक्रिया पूर्ण करावी, असे आवाहन जिल्हाधिकारी आणि जिल्हा उपनिबंधक, सहकारी संस्था, गडचिरोली यांनी केले आहे.
दोन लाख रुपयांपर्यंतच्या पीककर्जाला कर्जमुक्तीचा लाभ -
महाराष्ट्र शासनाने २ जून २०२६ रोजीच्या शासन निर्णयानुसार ही योजना सुरू केली आहे. या योजनेंतर्गत १ एप्रिल २०१९ ते ३१ मार्च २०२५ या कालावधीत वितरित करण्यात आलेली आणि ३० सप्टेंबर २०२५ पर्यंत थकीत असलेली, तसेच ३१ मार्च २०२६ पर्यंत परतफेड न झालेली पीककर्जे व पुनर्गठित किंवा फेरपुनर्गठित कर्जे यांना दोन लाख रुपयांपर्यंत कर्जमुक्तीचा लाभ देण्यात येणार आहे. या योजनेची अंमलबजावणी ऑनलाइन संगणकीय प्रणालीद्वारे केली जात आहे. त्यासाठी शासनाने महाआयटीची नियुक्ती केली असून, जिल्ह्यातील विविध बँकांनी योजनेच्या पोर्टलवर एकूण १५ हजार १४९ थकीत कर्जखात्यांची माहिती अपलोड केली आहे.
आतापर्यंत १० हजार ८८५ पात्र शेतकऱ्यांच्या याद्या प्रसिद्ध -
महाआयटीने संगणकीय प्रक्रियेद्वारे तयार केलेल्या माहितीनुसार, शासनाकडून आतापर्यंत चार याद्या प्रसिद्ध करण्यात आल्या आहेत. त्यामध्ये पहिल्या यादीत ४ हजार ३७१, दुसऱ्या यादीत ३ हजार ६१०, तिसऱ्या यादीत २ हजार ६७९ आणि चौथ्या यादीत २२५ पात्र लाभार्थी शेतकऱ्यांचा समावेश आहे. या चारही याद्यांमध्ये मिळून एकूण १० हजार ८८५ पात्र शेतकऱ्यांचा समावेश करण्यात आला आहे. आधार प्रमाणीकरणाची प्रक्रिया पूर्ण झालेल्या शेतकऱ्यांपैकी आतापर्यंत ६ हजार ५१३ पात्र लाभार्थ्यांच्या कर्जखात्यांत ३८ कोटी २४ लाख रुपयांची कर्जमुक्तीची रक्कम जमा करण्यात आली आहे.
२१६ शेतकऱ्यांची यादी आधार प्रमाणीकरणासाठी -
२२ ऑक्टोबर २०२६ रोजी एकापेक्षा अधिक बँकांमध्ये कर्जखाती असलेल्या आणि दोन लाख रुपयांपेक्षा कमी थकबाकी असलेल्या एकूण २१६ पात्र शेतकऱ्यांची यादी आधार प्रमाणीकरणासाठी प्रसिद्ध करण्यात आली आहे. या यादीतील शेतकऱ्यांची जिल्हानिहाय माहिती परिशिष्ट अमध्ये, तर बँकनिहाय माहिती परिशिष्ट बमध्ये देण्यात आली आहे. संबंधित लाभार्थ्यांची यादी बँक शाखा, विकास संस्था आणि ग्रामपंचायत कार्यालयांमध्ये प्रसिद्ध करण्यात येणार आहे. त्यामुळे शेतकऱ्यांनी संबंधित ठिकाणी आपले नाव तपासून घ्यावे.
३१ मार्च २०२६ पर्यंतच्या थकबाकीची खात्री करा -
या योजनेअंतर्गत प्रसिद्ध करण्यात आलेली यादी कर्जमुक्तीसाठीची आहे. यामध्ये एकापेक्षा अधिक बँकांकडून पीककर्ज घेतलेल्या शेतकऱ्यांचाही समावेश करण्यात आला आहे. संबंधित शेतकऱ्यांच्या कर्जाची थकबाकी ३१ मार्च २०२६ रोजीच्या स्थितीनुसार विचारात घेण्यात आली आहे. १ एप्रिल २०२६ नंतरचे व्याज आणि इतर खर्च माफ करण्यात येणार असल्याचे प्रशासनाने स्पष्ट केले आहे. त्यामुळे यादीत नाव असलेल्या शेतकऱ्यांनी आपल्या कर्जखात्याची ३१ मार्च २०२६ रोजीची थकबाकी संबंधित बँकेकडून तपासून घ्यावी. तसेच योजनेचा लाभ मिळविण्यासाठी आवश्यक असलेले आधार प्रमाणीकरण वेळेत पूर्ण करावे.
ई-केवायसी आणि ॲग्रीस्टॅक नोंदणी आवश्यक -
योजनेच्या यादीत नाव असलेल्या सर्व शेतकऱ्यांनी जवळच्या आपले सरकार सेवा केंद्रात जाऊन ई-केवायसी प्रक्रिया पूर्ण करणे आवश्यक आहे. ही प्रक्रिया पूर्ण केल्यामुळे योजनेचा लाभ मिळविण्यासाठी पुढील कार्यवाही करता येणार आहे. तसेच गडचिरोली जिल्ह्यातील सर्व शेतकऱ्यांनी योजनेचा लाभ वेळेत मिळावा यासाठी जवळच्या आपले सरकार सेवा केंद्रात ॲग्रीस्टॅक नोंदणी करून घ्यावी, असे आवाहन जिल्हाधिकारी आणि जिल्हा उपनिबंधक, सहकारी संस्था, गडचिरोली यांनी केले आहे. योजनेच्या लाभासाठी शेतकऱ्यांनी आपले नाव यादीत तपासणे, कर्जखात्याच्या थकबाकीची खात्री करणे, ई-केवायसी पूर्ण करणे आणि ॲग्रीस्टॅक नोंदणी करून घेणे या बाबींना प्राधान्य द्यावे.
