Petrol Price
मुतनूर येथे आदिशक्ती दुर्गामाता मंदिरात भव्य महाप्रसाद वितरण व बालिका पूजन सोहळा उत्साहात संपन्न
- नवरात्रोत्सवानिमित्त गडचिरोली जिल्ह्यातील भाविकांची मोठी उपस्थिती; बालिकांना स्नेहभेट म्हणून विविध भेटवस्तूंचे वाटप
विदर्भ न्यूज एक्सप्रेस
तालुका प्रतिनिधी / चामोर्शी : तालुक्यातील निसर्गरम्य मुतनूर येथील पहांदि पारी कुपार लिंगो देवस्थान परिसरात आदिशक्ती दुर्गामाता मंदिराच्या वतीने नवरात्रोत्सवानिमित्त भव्य महाप्रसाद वितरण व बालिका पूजनाचा कार्यक्रम मोठ्या उत्साहात आणि भक्तिमय वातावरणात संपन्न झाला. खुणे कन्स्ट्रक्शन कंपनीचे प्रमुख प्रणय भाऊ खुणे यांच्या गुरनोली येथील खुणे परिवाराचे आराध्य दैवत असलेल्या आदिशक्ती दुर्गामातेच्या मंदिरात गेल्या अनेक वर्षांपासून हा धार्मिक व सामाजिक उपक्रम सातत्याने आयोजित केला जात आहे.
चामोर्शी तालुक्यातील मुतनूर हे निसर्गरम्य ठिकाण आदिवासी समाजाच्या श्रद्धेचे महत्त्वपूर्ण केंद्र आहे. येथे आदिवासी समाजाचे प्रसिद्ध राजाराणी देवस्थान असून, या देवस्थानाच्या खालच्या भागात आदिशक्ती दुर्गामातेचे मंदिर आहे. या मंदिरात दरवर्षी नवरात्रोत्सवाच्या निमित्ताने धार्मिक कार्यक्रमांसोबतच सामाजिक बांधिलकी जपणारे विविध उपक्रम राबविले जातात.
यंदाही नवरात्रोत्सवाचे औचित्य साधून मुतनूर व परिसरातील नागरिकांसाठी भव्य महाप्रसाद वितरणाचे आयोजन करण्यात आले होते. या कार्यक्रमाला गडचिरोली जिल्ह्यातील दुर्गामातेचे भाविक व भक्त मोठ्या संख्येने उपस्थित राहिले. भाविकांनी आदिशक्ती दुर्गामातेचे दर्शन घेऊन पूजा-अर्चा केली आणि महाप्रसादाचा लाभ घेतला. या सोहळ्यामुळे संपूर्ण परिसरात भक्तिमय वातावरण निर्माण झाले होते.
बालिका पूजनातून स्त्रीशक्तीचा सन्मान -
या कार्यक्रमाचे विशेष आकर्षण म्हणजे बालिका पूजन आणि बालिकांना स्नेहभेट म्हणून विविध भेटवस्तूंचे वाटप. नवरात्रोत्सवात आदिशक्तीचे प्रतीक मानल्या जाणाऱ्या बालिकांचे पूजन करून त्यांच्याप्रती आदर व सन्मान व्यक्त करण्यात आला. मुतनूर व परिसरातील बालिकांना विविध भेटवस्तू देऊन त्यांचा आनंद द्विगुणित करण्यात आला. गेल्या अनेक वर्षांपासून सुरू असलेल्या या उपक्रमातून धार्मिक परंपरेचे जतन करण्यासोबतच बालिकांचा सन्मान, समाजातील आपुलकी आणि सामाजिक एकोपा वृद्धिंगत करण्याचा प्रयत्न केला जात आहे. धार्मिक श्रद्धा आणि सामाजिक बांधिलकी यांचा सुंदर संगम या कार्यक्रमातून पाहायला मिळाला.
मान्यवरांची प्रमुख उपस्थिती -
या सोहळ्याला खुणे कन्स्ट्रक्शन कंपनी व एल. एल. डोंगरवार कन्स्ट्रक्शन कंपनीचे संस्थापक अध्यक्ष प्रणय भाऊ खुणे, संचालक लोकेश भाऊ डोंगरवार, राकेश भाऊ डोंगरवार, दिनेश भाऊ खुणे आणि राहुल भाऊ झोडे यांची उपस्थिती होती. तसेच मार्गदर्शक प्रमोदजी आसूटकर व पुरुषोत्तम गोबाडे यांनीही कार्यक्रमात सहभाग घेतला. यावेळी ग्रामसभा पुसेर व ग्रामसभा मुतनूर येथील पदाधिकारी आणि कार्यकर्ते, खुणे कन्स्ट्रक्शन कंपनीचे पदाधिकारी, कार्यकर्ते व वाहनचालक तसेच गुरनोली येथील खुणे परिवाराचे सदस्य मोठ्या संख्येने उपस्थित होते.
राष्ट्रीय मानवाधिकार संघटनेचे जिल्हाध्यक्ष रमेश अधिकारी, उपाध्यक्ष नानू भाऊ उपाध्ये, दिनेश मुजुमदार, विलास सावकार वडेट्टीवार, मास्टर नोनी हलदार यांच्यासह संघटनेचे विविध पदाधिकारी व कार्यकर्त्यांनीही या धार्मिक सोहळ्याला उपस्थिती दर्शविली.
धार्मिक परंपरेसोबत सामाजिक एकोप्याचा संदेश -
नवरात्रोत्सवाच्या निमित्ताने आयोजित करण्यात येणारा महाप्रसाद वितरण व बालिका पूजनाचा हा उपक्रम केवळ धार्मिक कार्यक्रम नसून समाजातील विविध घटकांना एकत्र आणणारा आणि सामाजिक सलोखा वाढविणारा उपक्रम ठरत आहे. श्रद्धा, सेवा, स्नेह आणि सामाजिक बांधिलकी या मूल्यांना प्राधान्य देत खुणे परिवार गुरनोली यांच्या पुढाकारातून हा उपक्रम दरवर्षी आयोजित केला जातो.
मुतनूर येथील पहांदि पारी कुपार लिंगो देवस्थान परिसरात पार पडलेल्या या सोहळ्याला भाविकांचा उत्स्फूर्त प्रतिसाद लाभला. दुर्गामातेचे दर्शन, महाप्रसाद वितरण आणि बालिका पूजनाच्या माध्यमातून धार्मिक उत्साहासोबतच सामाजिक एकात्मतेचा संदेश देण्यात आला. एकंदरीत, आदिशक्ती दुर्गामाता मंदिरात संपन्न झालेला हा भव्य महाप्रसाद वितरण व बालिका पूजन सोहळा भक्ती, परंपरा, स्त्रीशक्तीचा सन्मान आणि सामाजिक बांधिलकी यांचा सुंदर संगम ठरला.
