महत्वाच्या बातम्या

नागपूर : संघ मुख्यालयाभोवती २८ मार्चपर्यंत ड्रोन उडवण्यास बंदी

विदर्भ न्यूज एक्सप्रेस

प्रतिनिधी / नागपूर : नागपूरच्या महाल परिसरातील राष्ट्रीय स्वयंसेवक संघाच्या मुख्यालयाभोवती आगामी २८ मार्चपर्यंत ड्रोन उडवण्यास बंदी घालण्यात आली आहे. पोलिसांनी संघ मुख्यालयाला नो ड्रोन झोन म्हणून घोषित केले आहे. तसेच मुख्यालयातील फोटोग्राफी आणि व्हिडिओग्राफीवरही २८ मार्चपर्यंत बंदी घालण्यात आली आहे.

नागपूरच्या सह पोलीस आयुक्त अस्वती दोरजे यांनी जारी केलेल्या आदेशात म्हटले आहे की, राष्ट्रीय स्वयंसेवक संघाचे मुख्यालय हॉटेल, लॉज आणि कोचिंग क्लासने वेढलेल्या दाट लोकवस्तीच्या परिसरात आहे. यामुळे जवळून जाणारे लोक फोटो आणि व्हिडिओ काढण्याचा प्रयत्न करू शकतात.

व्हिडिओग्राफीसाठी लोक ड्रोनचाही वापर करू शकतात, ज्यामुळे मुख्यालयाच्या सुरक्षेला धोका निर्माण होऊ शकतो. त्यामुळे परिसरात फोटो काढणे, व्हिडिओग्राफी किंवा ड्रोन फोटोग्राफी करण्यास बंदी घालण्यात आली आहे. पोलिसांच्या म्हणण्यानुसार, आदेशाचे उल्लंघन करणाऱ्यांना भारतीय दंड संहितेच्या कलम १८८ (लोकसेवकाने दिलेल्या आदेशाची अवज्ञा) अंतर्गत कारवाई केली जाईल. हा आदेश आज, सोमवार २९ जानेवारी ते २८ मार्च २०२४ या कालावधीत लागू राहणार आहे. या काळात मुख्यालय परिसरात ड्रोनमधून व्हिडिओ किंवा छायाचित्रे घेण्यास बंदी घालण्यात आली आहे.