महत्वाच्या बातम्या

राष्ट्रीय बाल स्वास्थ कार्यक्रमांतर्गत जिल्हा रुग्णालय गडचिरोली येथे पार पडले २ डी इको तपासणी शिबीर

विदर्भ न्यूज एक्सप्रेस

प्रतिनिधी / गडचिरोली : राज्यात शालेय आरोग्य तपासणी हा कार्यक्रम यशस्वी ठरल्यामुळे व कुपोषणाचा प्रश्न गंभीर असल्यामुळे बाल मृत्यूचे प्रमाण कमी करण्यासाठी राष्ट्रीय बाल स्वास्थ कार्यक्रम राबविण्यात येत आहे.

गडचिरोली जिल्ह्यातील २५ आरोग्य पथकांद्वारे वर्षातून ०२ वेळा अंगणवाडीतील व ०१ वेळा शाळेतील बालकांची नियमित आरोग्य तपासणी करण्यात येत आहे. ० ते १८ या वयोगटातील बालकांची ४D म्हणजे जन्मतः व्यंग (Defect), पोषणमुल्यांची कमतरता (Deficiencies), शाररीक व मानसिक विकासात्मक विलंब (Developmental Delay), आजार (Diseases) यांचे निदान व उपचार करण्यात येतात. हृदयरोग तपासणी (२D ECHO), नेत्र रोग, आकडी/फेफरे यांची मोठ्या प्रमाणावर शिबिरे आयोजीत करून निदान व औषधोपचार करण्यात येते. जिल्ह्यातील अनेक मुला-मुलीना या कार्यक्रमाचा मोफत लाभ झालेला असून त्यात अनेक जणांवर हृदय शस्त्रक्रिया व इतर शस्त्रक्रिया करण्यात आलेल्या आहेत. जिल्ह्यातील अंगणवाडी तपासणी दरम्यान कुपोषित बालकांना निदान व औषधोपचार करून श्रेणीवर्धन करण्यासाठी पोषण पुनर्वसन केंद्र (NRC) महिला व बालरुग्णालय गडचिरोली येथे संदर्भित करण्यात येऊन त्यांच्या पालकास बुडीत मजुरीचा लाभ देण्यात येतो.

तसेच जिल्हा शीघ्र हस्तक्षेप केंद्र (District early Intervention Center/DEIC) अंतर्गत ० ते ०६ वर्ष वयोगटातील ज्या बालकांना जन्मजात आजार, अवयवांच्या उणीवा आणि विकास/वाढीचा अभाव आढळल्यास त्यांच्यावर वेळीच शस्त्रक्रिया/औषधोपचार करून भविष्यात त्यांना शरीराच्या गुंतागुंतीच्या आजार किंवा उणीवापासून दूर ठेवणे शक्य होत आहे. याचाच एक उपक्रम म्हणून २२ व २३ सप्टेंबर २०२३ रोजी जिल्हा रुग्णालय गडचिरोली येथे मुख्य कार्यकारी अधिकारी जि.प. गडचिरोली आयुषी सिंह यांच्या मार्गदर्शनाखाली आणि जिल्हा शल्य चिकित्सक डॉ. प्रमोद बी. खंडाते, अतिरिक्त जिल्हा शल्य चिकित्सक डॉ. सतिशकुमार सोळंखे, निवासी वैद्यकीय अधिकारी डॉ. बागराज धुर्वे यांच्या नेतृत्त्वाखाली हृदयाचे आजार असलेल्या बालकांची २ D ECHO तपासणी करण्यात आली. सदर शिबीर हे किंग्स्वे रुग्णालय, नागपूर येथील लहान मुलांचे ह्रदयरोग तज्ञ डॉ. प्रनित लाले विशेषज्ञांच्या उपस्थितीत पार पडले.

सदर शिबिरात गडचिरोली जिल्ह्यातील एकूण १५२ बालकांची तपासणी करण्यात आली असून किंग्स्वे रुग्णालय नागपूर येथे मोफत ह्रदय शस्त्रक्रियेसाठी गरजेनुसार पात्र एकूण ३८ बालकांना संदर्भित करण्यात येणार आहे. सदर शिबिरासाठी हेमलता सांगोळे RBSK जिल्हा समन्वयक, प्रशांत खोब्रागडे DEIC व्यवस्थापक तसेच राष्ट्रीय बाल स्वास्थ कार्यक्रमांतर्गत कार्यरत असलेले वैद्यकीय अधिकारी आणि कर्मचारी यांनी परिश्रम घेतले. जिल्हा शल्य चिकित्सक सामान्य रुग्णालय, गडचिरोली डॉ. प्रमोद बि. खंडाते यांनी कळविले आहे.