वाहन चालकांनी नियमित नेत्र व आरोग्य तपासणी केल्यास अपघातांचे प्रमाण कमी होईल : जिल्हाधिकारी राहुल कर्डिले
- १०२ वाहन चालकांची तपासणी
- चालकांनी शिबिराचा लाभ घेण्याचे आवाहन
विदर्भ न्यूज एक्सप्रेस
प्रतिनिधी / वर्धा : दिवसेंदिवस वाहन अपघाताच्या प्रमाणात वाढ होत आहे. या अपघाताचे कारण बरेचदा वाहनचालकांचा नेत्रदोष किंवा इतर आरोग्य व्याधी असतात. वाहन चालकांनी नियमित नेत्र व आरोग्य तपासणी केल्यास अपघाताचे प्रमाण कमी करण्यास मदत होईल, असे प्रतिपादन जिल्हाधिकारी राहुल कर्डिले यांनी केले.
जिल्हा शल्य चिकित्सक व उप प्रादेशिक परिवहन कार्यालयाच्या संयुक्त विद्यमाने आयोजित नेत्र व आरोग्य तपासणी शिबिराच्या उद्घाटन प्रसंगी ते बोलत होते. कार्यक्रमाला उप प्रादेशिक परिवहन अधिकारी मो. समिर मो. याकूब, जिल्हा शल्य चिकित्सक डॉ. सचिन तडस यांची प्रमुख उपस्थिती होती. जिल्ह्यातील प्रवासी बसचालकांसाठी जिल्हा सामान्य रुग्णालयात हे शिबिर आयोजित करण्यात आले होते.
या शिबिरामध्ये १०२ वाहन चालकांची तपासणी करण्यात आली. नेत्र तपासणीसाठी डॉ. मनोज सक्तेपार यांच्या मार्गदर्शनात अनिल वरगट, अश्विनी गावंडे, किशोर मेश्राम व प्रफुल काकडे यांनी काम पाहिले. एनसीडी विभागात डॉ. माधुरी निमसटकर यांच्या मार्गदर्शनात गिता लाडे, मंजुषा पाटील, मितला गोहाडे, माधूरी लोखंडे, अश्विनी आसुटकर, वैशाली साबळे, सुकांत येसनकर यांनी काम पाहिले.
शिबिराच्या यशस्वीतेसाठी मोटार वाहन निरीक्षक मेघल अनासाने, गोपाल धुर्वे, तुषारी बोबडे, साधना कवळे, सहाय्यक मोटार निरीक्षक मंगेश राठोड, श्री. सालनकर, निखील कदम, अमर पखाण, आदित्य ढोक, श्रीकांत येवले, वाहन चालक पाडुरंग वाघमारे, नरेंद्र तिवारी, धनश्याम टिक्कस तसेच श्यामसुंदर संगारे, सुनिल सिरसाट यांनी परिश्रम घेतले. कार्यक्रमाचे संचालन विजय ओझा यानी केले तर आभार मेघल अनासाने यांनी मानले.
२४ ऑगस्ट रोजी जिल्हा सामान्य रुग्णालय, २५ ऑगस्ट रोजी उपजिल्हा रुगणालय, आर्वी आणि २५ व २६ ऑगस्ट रोजी उपजिल्हा रुग्णालय, हिंगणघाट येथे नेत्र व आरोग्य तपासणी शिबिराचे आयोजन करण्यात आले आहे. जिल्ह्यातील सर्व प्रवासी बस चालक यांनी या शिबिराचा लाभ घेण्याचे आवाहन उपप्रादेशिक परिवहन अधिकारी व जिल्हा शल्य चिकित्सक यांनी केले आहे.
News - Wardha