जहाल नक्षली पहाडसिंग म्हणतो , ‘देशाची विचारधारा बंधुत्व आणि समता’


- नक्षली चळवळ देशाची अखंडता नष्ट करीत असल्याचे पहाडसिंगचे मत
विदर्भ न्यूज एक्सप्रेस
प्रतिनिधी / गडचिरोली :
छत्तीसगड राज्यातील फाफामार गावचा रहिवासी असलेला व छत्तीसगड, महाराष्ट्र आणि मध्यप्रदेश अशा तीन राज्यात मोठा नक्षली नेता म्हणून ओळख आणि दहशत निर्माण करणारा पहाडसिंग उर्फ अशोक उर्फ टिपू सुलतान उर्फ बाबुराव तोफा याने नुकतेच छत्तीसगड पोलिसांसमोर आत्मसमर्पण केले. आत्मसमर्पणानंतर त्याने नक्षल्यांविरूध्द जणू बंडच पुकारल्याचे दाखवून दिले. नक्षली पहाडसिंगने नक्षली हे देशविघातक कृत्य करणारे असून देशाची विचारधारा बंधुत्व आणि समता यावर अवलंबून आहे. मात्र नक्षली देशाची अखंडता नष्ट करण्याचे काम करीत आहेत. नक्षल्यांचे कृत्य विदेशी कृत्य आहे, असेही पहाडसिंग याने म्हटले आहे.
मुळचा राजनांदगाव जिल्ह्यातील फाफामार येथील रहिवासी असलेला पहाडसिंग १९९० पासून नक्षली चळवळीत सक्रीय झाला. त्याचा अनेक घटनांमध्ये समावेश आहे. एकट्या गडचिरोली जिल्ह्यात त्याच्यावर ५० हून अधिक गुन्हे दाखल आहेत. पहाडसिंगवर वेगवेगळ्या राज्याच्या शासनाकडून कोट्यवधींचे बक्षिसही जाहिर करण्यात आले होते. फाफामार येथील शाळेत शिक्षक पदावर कार्यरत असलेला पहाडसिंग हा जहाल नक्षली कमांडर म्हणून ओळखला जावू लागला. 
सन २०१३ मध्ये गडचिरोली जिल्ह्याचे तत्कालीन पोलिस अधीक्षक सुवेझ हक यांनी छत्तीसगड राज्यात जावून पहाडसिंग याच्या कुटूंबीयांची भेट घेतली होती. यावेळी सुवेझ हक यांनी त्याच्या कुटुंबीयांशी चर्चा करून पहाडसिंगला आत्मसमर्पण करण्यास प्रवृत्त करण्याचे कुटूंबीयांना सांगितले होते. यावेळी त्याच्या कुटूंबीयांना आत्मसमर्पण योजनेबाबत माहिती देवून कुटुंबीयांना भेटवस्तूसुध्दा दिली होती. एवढेच नाही तर गडचिरोली पोलिसांनी आयोजित केलेल्या महाराष्ट्र दर्शन सहलीमध्ये पहाडसिंग याच्या मुलींनीसुध्दा सहभाग घेतला होता. अखेर पहाडसिंग याचे मनपरिवर्तन झाले आणि छत्तीसगड पोलिसांसमोर त्याने आत्मसमर्पण केले. यामुळे नक्षली चळवळीला जबर हादरा बसला. नक्षली पहाडसिंग याने नक्षली चळवळीतील अनेक गोष्टींचा खुलासा केला आहे. निरपराध आदिवासींवर अन्याय केले जात असून आदिवासी, कष्टकरी, शेतकरी देशाचा कणा आहेत. त्यांना बळजबरीने देशविरोधी कृत्य करायला लावले जात आहे, असेही पहाडसिंग म्हणाला. 

जहाल नक्षल्यास आत्मसमर्पणानंतर नेत्यांसारखी दिलेली वागूणक योग्य आहे काय?

जहाल नक्षली पहाडसिंग याने आत्मसमर्पण केले ही बाब पोलिस विभागासाठी निश्चित महत्वाची  आहे. त्याच्या आत्मसमर्पणामुळे नक्षली चळवळीला हादरा नक्कीच बसला आहे. मात्र जहाल नक्षल्यास पोलिस विभागाकडून नेत्यांसारखी  वागूणक देणे कितपत योग्य आहे, असा प्रश्न उपस्थित झाला आहे. पहाडसिंग याचे आगमन होताच त्याचे टाळ्यांच्या कडकडाटात स्वागत केले जाते. हातमिळवणी केली जाते. यामुळे नक्षल्यांना आत्मसमर्पणानंतर नेत्यांसारखी वागणूक का दिली जातेय, असा सवाल उपस्थित होत आहे . नक्षली पहाडसिंग याने नक्षल चळवळीत असताना अनेक गुुन्हे केले आहेत. पोलिस चकमकींमध्ये अनेक पोलिसांचा जीव घेतलेला आहे. निरपराध नागरिकांच्या हत्या करण्यामध्ये सुध्दा सहभाग आहे. विकासाच्या कामांमध्ये अडथळे आणण्याचेसुध्दा काम त्याने केले आहे. शेकडो लोकांचे जीवन उध्वस्त करण्यात नक्षली चळवळीचा हात आहे. असे असतानाही आत्मसमर्पणानंतर त्याचे सर्व गुन्हे माफ केले जातात. आत्मसमर्पण योजनेंतर्गत विविध सोयी - सुविधा पुरविल्या जातात. घरे, जमिन दिले जात आहे. मात्र याचा चुकीचा वापरसुध्दा होवू शकतो. सोयी - सुविधा आणि व्हीआयपी वागूणकीमुळे अनेकांच्या मनात नक्षली चळवळीत जावे आणि परत आत्मसमर्पण करावे, अशी भावना तर निर्माण होणार नाही ना असाही प्रश्न या निमित्ताने उपस्थित होत आहे. 

 



  Print






News - Gadchiroli | Posted : 2018-08-25






Related Photos