महत्वाच्या बातम्या

प्रधानमंत्री सुक्ष्म अन्न प्रक्रिया उन्नयन योजनेंतर्गत चंद्रपूर जिल्ह्यात १७१ प्रकरणे मंजूर

- चंद्रपूर जिल्हा राज्यात सातवा तर विभागात दुस-या स्थानावर

विदर्भ न्यूज एक्सप्रेस

प्रतिनिधी / चंद्रपूर : प्रधानमंत्री सूक्ष्म अन्न प्रक्रिया उन्नयन योजनेअंतर्गत जिल्हास्तरीय समितीची बैठक जिल्हाधिकारी विनय गौडा जी.सी., यांच्या अध्यक्षतेखाली घेण्यात आली. यावेळी जिल्हा अधिक्षक कृषि अधिकारी तथा आत्माचे प्रकल्प संचालक भाऊसाहेब ब-हाटे, जिल्हा अग्रणी बँक व्यवस्थापक प्रशांत धोंगडे, कृषी उपसंचालक रविंद्र मनोहरे, बँकांचे जिल्हा समन्वयक, विविध विभागाचे जिल्हास्तरीय अधिकारी, सर्व उपविभागीय कृषी अधिकारी, सर्व तालुका कृषी अधिकारी आणि सर्व जिल्हा संसाधन व्यक्ती (DRP) उपस्थित होते.

प्रधानमंत्री सूक्ष्म अन्न प्रक्रिया उन्नयन योजनेमध्ये आतापर्यंत जिल्ह्यात एकूण १७१ कर्ज प्रकरणे मंजूर झाली आहेत. यात चंद्रपूर जिल्हा राज्यात सातव्या क्रमांकावर तर नागपूर विभागात दुस-या क्रमांकावर आहे. यातील सर्वाधिक ६५ कर्ज प्रकरणे बँक ऑफ इंडिया मार्फत मंजूर करण्यात आल्याने जिल्हाधिका-यांनी अग्रणी बँक व्यवस्थापक प्रशांत धोंगडे यांचा सत्कार केला. तसेच इतर बँकाकडे प्रलंबित असलेली सर्व १६० प्रकरणे येत्या १५ दिवसात मंजूर करण्याबाबत जिल्हाधिका-यांनी निर्देश दिले.

ब-हाटे यांनी योजनेच्या सद्यस्थितीबाबत तसेच बँकनिहाय प्रलंबित असलेल्या कर्ज प्रकरणाबाबत सादरीकरण केले.

एकात्मिक फलोत्पादन विकास अभियानचा आढावा : एकात्मिक फलोत्पादन विकास अभियान (MIDH) अंतर्गत जिल्हास्तरीय कार्यकारी समितीची बैठक जिल्हाधिका-यांच्या अध्यक्षतेखाली घेण्यात आली. या एकात्मिक फलोत्पादन विकास अभियान अंतर्गत जिल्ह्याला सन २०२२ -२३ करिता २४१.७५ लक्ष मंजूर आहे. मंजूर वार्षिक कृती आराखड्याच्या तुलनेत माहे जानेवारी २०२३ अखेर रु. ७०.४६ लक्ष निधी बाबनिहाय खर्च झाल्याचे जिल्हा अधिक्षक कृषी अधिकारी ब-हाटे यांनी सांगितले. यात फलोत्पादन पिकाचा क्षेत्र विस्तार, नियंत्रित शेती, फलोत्पादन यांत्रिकीकरण, मधुमक्षिका पालन, मनुष्यबळ विकास आणि काढणीत्तोर व्यवस्थापन आदी बाबींचा समावेश आहे. जिल्हास्तरीय कार्यकारी समितीने रु. २६४.३९ लक्ष रकमेच्या सुधारीत वार्षिक कृती आराखड्यास मंजुरी प्रदान केल्याचे ब-हाटे यांनी कळविले आहे.