Petrol Price
पर्यावरण संवर्धनासाठी उद्योगांचा पुढाकार कौतुकास्पद : जिल्हाधिकारी वसुमना पंत
- धारिवाल इन्फ्रास्ट्रक्चरच्या अरण्यगर्भ घनवन उद्यानाचे उद्घाटन
विदर्भ न्यूज एक्सप्रेस
प्रतिनिधी / चंद्रपूर : उद्योगांनी केवळ उत्पादनावर लक्ष केंद्रित न करता पर्यावरण संवर्धनालाही प्राधान्य देणे आवश्यक आहे. धारिवाल इन्फ्रास्ट्रक्चर लिमिटेडने मियावाकी पद्धतीवर आधारित अरण्यगर्भ घनवन उद्यानाची संकल्पना राबवून पर्यावरण संवर्धनासाठी घेतलेला पुढाकार कौतुकास्पद आहे, असे प्रतिपादन जिल्हाधिकारी वसुमना पंत यांनी केले. धारिवाल इन्फ्रास्ट्रक्चर लिमिटेडच्या वतीने ३.२ एकर क्षेत्रात १८ हजार वृक्षांची लागवड करण्यात आली आहे. या अरण्यगर्भ घनवन उद्यानाचे उद्घाटन जिल्हाधिकारी वसुमना पंत यांच्या हस्ते करण्यात आले. यापूर्वी कंपनीच्या वतीने १.५ एकर क्षेत्रातही वृक्षारोपण करण्यात आले आहे.
यावेळी बोलताना जिल्हाधिकारी पंत म्हणाल्या की, वृक्षारोपणासोबतच त्यांचे संगोपन व संवर्धन करणे ही आजच्या काळाची गरज आहे. पर्यावरणाने समाजाला सातत्याने भरभरून दिले आहे. त्यामुळे वृक्षलागवड आणि त्यांचे संवर्धन करून पर्यावरणाचे ऋण फेडणे ही प्रत्येकाची जबाबदारी आहे. उद्योगांनी केवळ उत्पादनासाठी नव्हे, तर पर्यावरण समृद्धीसाठीही योगदान द्यावे. प्रदूषण कमी करण्यासाठी उद्योगांची भूमिका महत्त्वाची असून, त्यांच्या सहभागातून प्रदूषणमुक्त वातावरण निर्माण करण्यास मदत होईल, असे त्यांनी सांगितले.
अरण्यगर्भ घनवन उद्यानाची संकल्पना प्रत्यक्षात आणण्यासाठी कंपनीच्या चमूने तळमळीने व प्रभावीपणे काम केले. आज साकारलेले हे उद्यान त्यांच्या मेहनतीचे प्रतीक आहे, असे धारिवाल इन्फ्रास्ट्रक्चर लिमिटेडचे प्लांट हेड देवेश कुमार यांनी सांगितले. भविष्यातही कंपनीच्या वतीने वृक्षारोपण व पर्यावरण संवर्धनाच्या उपक्रमांना अधिक प्रभावीपणे राबविण्यात येईल, अशी माहिती त्यांनी दिली.
उद्घाटन सोहळ्याला प्लांट हेड देवेश कुमार, महाव्यवस्थापक पुंडलिक वानवे, उपमहाव्यवस्थापक दिनेश गाखर, श्रीकांत श्रीवास्तव, अमोल गिरडकर, उपव्यवस्थापक रवी चावरे यांच्यासह उपमहाव्यवस्थापक भूपेंद्र तोमर, मुख्य व्यवस्थापक संदीप ठाकरे, मनोज कुमार, डॉ. अनिष नायर, सौगतो मुखर्जी, संजीत रावत, व्यवस्थापक सुरेश देवांगन, हेमंत निमकर, संतोष काकडे, हर्षल फुलबांधे, उपव्यवस्थापक हर्ष तोमर तसेच कंपनीचे अधिकारी व कर्मचारी उपस्थित होते.
