महत्वाच्या बातम्या

अहेरीतील अवैध रेती उत्खननावर कारवाईचा अभाव : सामाजिक कार्यकर्त्याचा न्यायालयात जाण्याचा इशारा

- उपजिल्हाधिकाऱ्यांना निवेदन; दोषींवर कारवाई न झाल्यास कायदेशीर लढा उभारणार

विदर्भ न्यूज एक्सप्रेस
प्रतिनिधी / गडचिरोली : अहेरी तालुक्यातील दामरंचा येथील इंद्रावती नदीपात्रातून सुरू असल्याचा आरोप असलेल्या अवैध रेती उत्खननाच्या प्रकरणाने गंभीर वळण घेतले आहे. प्रशासनाकडे वारंवार तक्रारी करूनही कोणतीही ठोस कारवाई होत नसल्याचा आरोप करत जनकल्याण समाजोन्नती अन्याय भ्रष्टाचार निवारण समितीचे जिल्हाध्यक्ष संतोष ताटीकोंडावार यांनी उपजिल्हाधिकाऱ्यांना निवेदन सादर केले आहे. तसेच संबंधितांवर तातडीने कारवाई न झाल्यास न्यायालयात दाद मागण्याचा इशाराही त्यांनी दिला आहे.

मिळालेल्या माहितीनुसार, दामरंचा येथे सुरू असलेल्या आंतरराज्यीय पुलाच्या बांधकामासाठी कंत्राटदाराकडून इंद्रावती नदीपात्रातून पोकलॅन्ड मशीनच्या साहाय्याने मोठ्या प्रमाणावर रेती उपसा केला जात असल्याचा आरोप करण्यात आला आहे. या उत्खननामुळे नदीपात्राचे नुकसान होत असून पर्यावरणीय नियमांचे उल्लंघन होत असल्याचा दावा तक्रारीत करण्यात आला आहे.

स्थानिक नागरिकांच्या मते, घरकुल व इतर बांधकामांसाठी आवश्यक रेती सहज उपलब्ध होत नाही. दुसरीकडे सामान्य नागरिकांकडून रेतीची वाहतूक झाल्यास महसूल प्रशासनाकडून कारवाई केली जाते. मात्र, मोठ्या प्रमाणावर सुरू असलेल्या कथित उत्खननाकडे प्रशासन दुर्लक्ष करत असल्याचा आरोप ग्रामस्थांनी केला आहे. त्यामुळे कायद्याची अंमलबजावणी सर्वांसाठी समान आहे का, असा प्रश्नही उपस्थित होत आहे.

संतोष ताटीकोंडावार यांनी यापूर्वीही अहेरी उपविभागीय अधिकाऱ्यांकडे या प्रकरणाची तक्रार केली होती. मात्र, संबंधित कंत्राटदार तसेच त्यांना पाठीशी घालणाऱ्या अधिकारी-कर्मचाऱ्यांवर कोणतीही दंडात्मक कारवाई करण्यात आली नसल्याचा आरोप त्यांनी निवेदनात केला आहे. प्रशासनाच्या या भूमिकेबद्दल त्यांनी तीव्र नाराजी व्यक्त केली आहे.

उपजिल्हाधिकाऱ्यांना दिलेल्या निवेदनात नदीपात्रातील कथित अवैध रेती उत्खनन तातडीने थांबवून संपूर्ण प्रकरणाची निष्पक्ष चौकशी करण्याची मागणी करण्यात आली आहे. तसेच दोषी आढळणाऱ्या कंत्राटदार आणि संबंधित महसूल अधिकाऱ्यांवर कठोर कायदेशीर कारवाई करण्यात यावी, अशीही मागणी करण्यात आली आहे.

यापुढेही प्रशासनाने या प्रकरणात ठोस पावले उचलली नाहीत, तर संबंधित कंत्राटदार आणि जबाबदार अधिकारी यांच्याविरुद्ध न्यायालयात कायदेशीर लढा उभारण्यात येईल, असा इशारा संतोष ताटीकोंडावार यांनी दिला आहे. त्यामुळे या प्रकरणाकडे परिसरातील नागरिकांचे लक्ष लागले असून प्रशासन पुढे कोणती भूमिका घेते, याकडे सर्वांचे लक्ष केंद्रित झाले आहे.