महत्वाच्या बातम्या

जिल्हा परिषद शिष्यवृत्ती परीक्षा २२ फेब्रुवारीला

विदर्भ न्यूज एक्सप्रेस

प्रतिनिधी / वर्धा : महाराष्ट्र राज्य परीक्षा परिषद, पुणे यांच्या वतीने जिल्हा परिषद वर्धा अंतर्गत इयत्ता पाचवी व इयत्ता आठवी शिष्यवृत्ती परीक्षा रविवार, २२ फेब्रुवारी रोजी जिल्ह्यातील विविध परीक्षा केंद्रांवर आयोजित करण्यात येणार आहे.

इयत्ता पाचवीसाठी जिल्ह्यातील ४८ परीक्षा केंद्रांवर ७८० शाळांमधील एकूण ६ हजार ७६३ विद्यार्थी परीक्षेला बसणार आहेत. तर इयत्ता आठवीसाठी २८ परीक्षा केंद्रांवर ३३५ शाळांमधील ३ हजार ६१३ विद्यार्थी परीक्षा देणार असून एकूण १० हजार ३७६ विद्यार्थी या शिष्यवृत्ती परीक्षेत सहभागी होणार आहेत.

परीक्षेचा पहिला पेपर (भाषा व गणित) सकाळी ११ ते दुपारी १२.३० या वेळेत होणार असून दुसरा पेपर दुपारी २ ते २.३० या वेळेत आयोजित करण्यात आला आहे. पेपर सुरू झाल्यानंतर पहिल्या अर्ध्या तासापर्यंतच विद्यार्थ्यांना प्रवेश दिला जाईल.

परीक्षा प्रक्रिया पारदर्शक, सुरक्षित व शिस्तबद्ध पद्धतीने पार पाडण्यासाठी सर्व केंद्रप्रमुखांना सविस्तर मार्गदर्शन पुस्तिका देण्यात आली आहे. गोपनीय साहित्य हाताळणी, आसन व्यवस्था, पर्यवेक्षक नियोजन व परीक्षा शिस्त याबाबत आवश्यक ते नियोजन करण्यात आले आहे. उपशिक्षणाधिकारी ज्ञानेश्वर पानसरे व विस्तार अधिकारी देवानंद एकापुरे यांच्या मार्गदर्शनाखाली सर्व यंत्रणा सज्ज असून परीक्षा यशस्वीरीत्या पार पाडण्यासाठी आवश्यक तयारी पूर्ण करण्यात आली आहे.

पालक व शिक्षकांनी विद्यार्थ्यांना वेळेत परीक्षा केंद्रावर पोहोचवावे. विद्यार्थ्यांना रोल नंबरनुसार परीक्षा गृहात बसविल्यानंतर पालकांनी केंद्राबाहेर प्रतीक्षा करावी तसेच परीक्षा केंद्र परिसरात शांतता राखावी, असे आवाहन प्राथमिक शिक्षणाधिकारी रुपेश कांबळे यांनी केले.