महत्वाच्या बातम्या

पोलीस अधिकाऱ्यांच्या गणवेश भत्त्यात मोठी वाढ

विदर्भ न्यूज एक्सप्रेस
वृत्तसंस्था / मुंबई : महाराष्ट्र पोलीस दलातील अधिकाऱ्यांसाठी शिंदे-फडणवीस सरकारने मोठा निर्णय घेतला आहे. गृह विभागाने याबाबतचे आदेश देखील जारी केले आहेत. महाराष्ट्र पोलीस दलात कार्य़रत असणाऱ्या अधिकाऱ्यांच्या गणवेश भत्त्यामध्ये वाढ करण्यात आली आहे. गृहविभागाने महाराष्ट्र पोलीस दलातील अधिकाऱ्यांच्या गणवेश भत्त्यात एक हजार रुपयांची वाढ केली आहे. त्यामुळे अधिकाऱ्यांना वार्षिक सहा हजार रुपये गणवेश भत्ता मिळणार आहे. राज्य पोलीस दलातील पोलीस उपनिरीक्षक (PSI) ते अपर पोलीस अधीक्षक (Addl SP) या अधिकाऱ्यांना याचा फायदा होणार आहे. गृह विभागाने पोलीस अधिकाऱ्यांच्या गणवेश भत्त्यात वाढ करण्याचा शासन निर्णय जारी केला आहे. पोलीस अधिकाऱ्यांना यापूर्वी पाच हजार रुपये गणवेश भत्ता दिला जात होता. गणवेश भत्त्यामध्ये वाढ केली जावी अशी मागणी केली होती. अखेर गृह विभागाने पोलिसांची ही मागणी मान्य करत गणवेश भत्त्यात एक हजार रुपयांची वाढ करण्याचा निर्णय घेतला आहे. सुरुवातीच्या दिवसात गणवेश भत्ता देण्याऐवजी गणवेशाचं साहित्य पोलीस कर्मचाऱ्यांना दिले जात होते. अनेक दिवस हीच पद्धत सुरु होती. मात्र २०२१ मध्ये साहित्य देणं बंद करुन त्याऐवजी पोलीस अधिकाऱ्यांना गणवेश भत्ता देण्याचा निर्णय गृह विभागाने घेतला. यापूर्वी पोलीस अधिकाऱ्यांना पाच हजार रुपये गणवेश भत्ता दिला जात होता. आता सहा हजार रुपये भत्ता देण्याचा निर्णय घेण्यात आला आहे.