गुणवंत विद्यार्थ्यांच्या सत्काराने महात्मा फुले पतसंस्थेची आमसभा उत्साहात


विदर्भ न्यूज एक्सप्रेस
तालुका प्रतिनिधी / बल्लारपूर : महात्मा ज्योतिबा फुले नागरी सहकारी पत संस्था, विसापूर मर्या. (रजि. क्र. ३१९) यांची वार्षिक आमसभा उत्साहपूर्ण वातावरणात पार पडली. यावेळी संस्थेच्या वतीने इयत्ता दहावी व बारावीच्या परीक्षेत उल्लेखनीय यश संपादन करणाऱ्या गुणवंत विद्यार्थ्यांचा सन्मानचिन्ह देऊन गौरव करण्यात आला.
३१ जुलै १९९७ रोजी संस्थेची स्थापना झाली. संस्थेने २९ वर्षांची यशस्वी वाटचाल पूर्ण करून ३०व्या वर्षात पदार्पण केले आहे. या कालावधीत संस्थेने सभासदांच्या आर्थिक प्रगतीला चालना देतानाच सामाजिक व शैक्षणिक क्षेत्रातही आपले योगदान कायम ठेवले आहे. सभासदांच्या सहकार्यामुळे संस्थेची वाटचाल सातत्याने प्रगतीच्या दिशेने सुरू असल्याचे यावेळी नमूद करण्यात आले.
इयत्ता दहावीमध्ये नैतिक महेश तुराणकर याने ९३.२० टक्के गुण मिळवून प्रथम क्रमांक पटकावला. तो दिलासाग्राम कॉन्व्हेंट, बल्लारपूर येथील विद्यार्थी आहे. हर्ष सुनील चौधरी याने ७९.४० टक्के गुणांसह द्वितीय क्रमांक मिळविला. तो जिल्हा परिषद हायस्कूल, विसापूर येथील विद्यार्थी आहे. आयुष्य विजय वैरागडे याने तृतीय क्रमांक मिळविला.
इयत्ता बारावीमध्ये अमूल्या भास्कर कांबळे हिने ८६ टक्के गुण मिळवून प्रथम क्रमांक मिळविला. हंसिका राजकुमार डाहुले हिने ७२.३० टक्के गुणांसह द्वितीय क्रमांक, तर नीरज बाळा वडस्कर याने तृतीय क्रमांक पटकावला. सर्व गुणवंत विद्यार्थ्यांचा संस्थेच्या वतीने सन्मानचिन्ह देऊन सत्कार करण्यात आला. विद्यार्थ्यांच्या शैक्षणिक गुणवत्तेला प्रोत्साहन देण्यासाठी संस्थेने सुरू केलेली गुणवंत विद्यार्थी सत्काराची परंपरा कौतुकास्पद असून, यापुढेही ही परंपरा कायम ठेवण्यात यावी, अशी अपेक्षा यावेळी व्यक्त करण्यात आली.
संस्थेचे अध्यक्ष सुरेश पंदीलवार यांच्या मार्गदर्शनाखाली उपाध्यक्ष सुधाकर वडस्कर, संचालक मंडळातील विजय गिरटकर, भीमराव पाझारे, संतोष निपुंगे, मंजुषा टोंगे, शंकर गिरटकर व अनंत सुग्रीव वानखेडे तसेच व्यवस्थापक प्रशांत गिरडकर यांच्या सहकार्याने संस्थेची वाटचाल सुरू आहे. संस्थेच्या कार्यात सर्व सभासदांचे सहकार्य लाभत असल्याचे यावेळी सांगण्यात आले. २९ वर्षांची यशस्वी वाटचाल पूर्ण करून ३० व्या वर्षात पदार्पण करणाऱ्या महात्मा ज्योतिबा फुले नागरी सहकारी पत संस्थेने आर्थिक क्षेत्रासोबतच सामाजिक व शैक्षणिक बांधिलकी जपत आपली वेगळी ओळख निर्माण केली आहे.




Petrol Price




