आदिवासी समाजाचा इतिहास, संस्कृती आणि परंपरा ही देशाची अमूल्य संपत्ती : आ. किशोर जोरगेवार

- जनजाती गौरव दिनानिमित्त भाजप महानगर कार्यालयात आदिवासी समाजातील कर्तृत्ववान व्यक्तिमत्त्वांचा सन्मान
विदर्भ न्यूज एक्सप्रेस
प्रतिनिधी / चंद्रपूर : आदिवासी समाजाचा गौरवशाली इतिहास, समृद्ध संस्कृती, परंपरा आणि निसर्गाशी असलेले अतूट नाते ही देशाची अमूल्य संपत्ती आहे. देशाच्या स्वातंत्र्यलढ्यापासून सामाजिक, सांस्कृतिक आणि राष्ट्रनिर्मितीच्या कार्यापर्यंत आदिवासी समाजाने मोलाचे योगदान दिले आहे. या समाजातील महापुरुषांचा त्याग, शौर्य आणि संघर्ष नव्या पिढीसाठी सदैव प्रेरणादायी आहे. त्यामुळे आदिवासी समाजाच्या गौरवशाली परंपरेचे जतन करण्यासोबतच विविध क्षेत्रांत उल्लेखनीय कार्य करणाऱ्या कर्तृत्ववान व्यक्तिमत्त्वांचा सन्मान करणे ही आपली सामूहिक जबाबदारी आहे, असे प्रतिपादन आमदार किशोर जोरगेवार यांनी केले.
भगवान बिरसा मुंडा यांच्या १५१ व्या जयंतीनिमित्त आयोजित जनजाती गौरव दिनाचे औचित्य साधून आमदार किशोर जोरगेवार यांच्या पुढाकारातून भारतीय जनता पार्टी चंद्रपूर महानगर कार्यालयात आदिवासी समाजातील गौरवप्राप्त आणि कर्तृत्ववान व्यक्तिमत्त्वांचा सन्मान सोहळा आयोजित करण्यात आला होता. यावेळी उपस्थितांना संबोधित करताना ते बोलत होते. या कार्यक्रमाला भाजपचे माजी महानगर अध्यक्ष सुभाष कासनगोट्टूवार, महामंत्री रविंद्र गुरुनुले, नामदेव डाहुले, महिला मोर्चा प्रभारी वंदना हातगावकर, नगरसेवक जितेश कुळमेथे, नितेश गवळी, नगरसेविका सरला कुळसंगे, आशा देशमुख आदी मान्यवर उपस्थित होते.
यावेळी बोलताना आमदार जोरगेवार म्हणाले की, आदिवासी समाजाने आपल्या समृद्ध संस्कृतीची आणि परंपरांची जपणूक अत्यंत अभिमानाने केली आहे. जल, जंगल आणि जमीन यांच्याशी असलेले या समाजाचे नाते केवळ जीवनशैलीपुरते मर्यादित नसून ते निसर्गसंवर्धन, सहजीवन आणि पर्यावरण रक्षणाचा महत्त्वपूर्ण संदेश देणारे आहे. आधुनिकतेच्या प्रवाहातही आपल्या सांस्कृतिक ओळखीचे जतन करणारा आदिवासी समाज भारतीय संस्कृतीला समृद्ध करीत आहे. या समाजाच्या पारंपरिक ज्ञानात, कला-संस्कृतीत, लोकपरंपरांत आणि जीवनमूल्यांत मोठे सामर्थ्य दडलेले आहे.
देशाच्या स्वातंत्र्यलढ्याचा इतिहास मांडताना आदिवासी क्रांतिकारकांचे योगदान विसरता येणार नाही. भगवान बिरसा मुंडा यांच्यासह अनेक आदिवासी वीरांनी अन्याय आणि शोषणाविरोधात संघर्ष करून स्वातंत्र्य चळवळीला बळ दिले. त्यांच्या त्याग आणि बलिदानातून स्वाभिमान, स्वातंत्र्य तसेच अन्यायाविरुद्ध लढण्याची प्रेरणा मिळते. या महानायकांचा इतिहास केवळ आदिवासी समाजापुरता मर्यादित नसून तो संपूर्ण देशाचा अभिमान आहे. त्यामुळे त्यांचे विचार आणि कार्य नव्या पिढीपर्यंत पोहोचविणे आवश्यक असल्याचे त्यांनी नमूद केले.
समाजातील कर्तृत्ववान व्यक्तिमत्त्वांचा सन्मान करण्यामागे केवळ त्यांचा गौरव करणे हा उद्देश नसून त्यांच्या कार्यातून इतरांनाही प्रेरणा मिळावी, हा व्यापक विचार असल्याचे आमदार जोरगेवार यांनी सांगितले. शिक्षण, सामाजिक कार्य, कला, संस्कृती, क्रीडा आणि विविध क्षेत्रांत आपल्या कार्यकर्तृत्वाचा ठसा उमटविणाऱ्या व्यक्तींमुळे समाजाची ओळख अधिक उजळते. अशा व्यक्तिमत्त्वांचा सन्मान म्हणजे त्यांच्या परिश्रमाचा, संघर्षाचा आणि समाजासाठी दिलेल्या योगदानाचा गौरव असल्याचेही ते म्हणाले.
आदिवासी समाजातील युवकांनी शिक्षणाला प्राधान्य देऊन आधुनिक संधींचा लाभ घ्यावा. आपल्या परंपरा आणि सांस्कृतिक अस्मितेचा अभिमान कायम ठेवत नव्या क्षेत्रांत प्रगती साधावी. समाजातील प्रत्येक घटकाला विकासाच्या मुख्य प्रवाहात आणण्यासाठी सामूहिक प्रयत्नांची आवश्यकता असून आदिवासी समाजाच्या सर्वांगीण विकासासाठी आणि त्यांच्या न्याय्य हक्कांसाठी सकारात्मक भूमिका घेणे गरजेचे आहे, असे त्यांनी स्पष्ट केले.
भारतीय जनता पार्टीच्या माध्यमातून आदिवासी समाजाचा सन्मान, विकास आणि सांस्कृतिक अस्मिता जपण्याला प्राधान्य दिले जात आहे. समाजातील कर्तृत्ववान व्यक्तींच्या पाठीशी उभे राहून त्यांच्या कार्याला योग्य व्यासपीठ उपलब्ध करून देणे ही काळाची गरज आहे. अशा सन्मान सोहळ्यांमुळे समाजातील सकारात्मक कार्याला प्रोत्साहन मिळण्यासोबतच नव्या पिढीसमोर प्रेरणादायी आदर्श निर्माण होतील, असा विश्वासही आमदार किशोर जोरगेवार यांनी व्यक्त केला.
या कार्यक्रमात विविध क्षेत्रांत उल्लेखनीय कार्य करणाऱ्या आदिवासी समाजातील व्यक्तिमत्त्वांचा सन्मान करून त्यांच्या योगदानाचा गौरव करण्यात आला. आदिवासी समाजाचा गौरवशाली इतिहास, सांस्कृतिक अस्मिता आणि सामाजिक कर्तृत्वाचा सन्मान अधोरेखित करणारा हा उपक्रम उपस्थितांसाठी प्रेरणादायी ठरला.




Petrol Price




