क्रांतिसूर्य भगवान बिरसा मुंडा यांची १५१ वी जयंती उत्साहात साजरी


- गुणवंत विद्यार्थी व शिक्षकांचा गौरव
विदर्भ न्यूज एक्सप्रेस
प्रतिनिधी / वर्धा : क्रांतिसूर्य भगवान बिरसा मुंडा यांच्या १५१ व्या जयंतीनिमित्त व जनजातीय गौरव दिवसाचे औचित्य साधून एकात्मिक आदिवासी विकास प्रकल्प कार्यालयात भगवान बिरसा मुंडा जयंती उत्साहात साजरी करण्यात आली.कार्यक्रमास प्रमुख वक्ते म्हणून आर्वीच्या नायब तहसीलदार सुजाता उईके, वर्धाचे नायब तहसीलदार अजय धर्माधिकारी उपस्थित होते. तसेच प्रमुख पाहुणे म्हणून अखिल भारतीय आदिवासी विकास परिषदेचे विदर्भ अध्यक्ष चंद्रशेखर मडावी, जिल्हाध्यक्ष शरद आडे, बिरसा क्रांती दलाचे जिल्हाध्यक्ष हरिदास टेकाम यांची उपस्थिती होती. यावेळी सहाय्यक प्रकल्प अधिकारी शैलेंद्र खडसे तसेच प्रकल्प कार्यालयातील अधिकारी व कर्मचारी वर्ग उपस्थित होता.
कार्यक्रमाच्या प्रारंभी भगवान बिरसा मुंडा यांच्या प्रतिमेस पुष्पहार अर्पण करून अभिवादन करण्यात आले. यावेळी मान्यवरांनी भगवान बिरसा मुंडा यांच्या त्याग, संघर्ष, समाजप्रबोधन तसेच आदिवासी समाजाच्या हक्कांसाठी दिलेल्या लढ्याचे स्मरण करून त्यांच्या विचारांवर प्रकाश टाकला.
कार्यक्रमाचे विशेष आकर्षण म्हणजे प्रकल्पांतर्गत शैक्षणिक क्षेत्रात उल्लेखनीय यश संपादन करणाऱ्या गुणवंत विद्यार्थ्यांचा क्रांतिवीर राघोजी भांगरे गुणवंत विद्यार्थी सत्कार करून गौरव करण्यात आला. विद्यार्थ्यांनी शैक्षणिक क्षेत्रात मिळविलेल्या यशाचे कौतुक करून त्यांच्या पुढील शैक्षणिक वाटचालीस शुभेच्छा देण्यात आल्या. आदिवासी विद्यार्थ्यांच्या शैक्षणिक जडणघडणीत मोलाचे योगदान देणाऱ्या प्रकल्पांतर्गत कार्यरत शिक्षकांचाही त्यांच्या उल्लेखनीय कार्याबद्दल सत्कार करण्यात आला. विद्यार्थ्यांच्या सर्वांगीण विकासामध्ये शिक्षकांची भूमिका महत्त्वपूर्ण असून, त्यांच्या योगदानाचा यावेळी गौरव करण्यात आला.
यावेळी प्रमुख वक्त्यांनी भगवान बिरसा मुंडा यांच्या जीवनकार्याचा व आदिवासी समाजाच्या हक्कांसाठी त्यांनी केलेल्या संघर्षाचा आढावा घेतला. विद्यार्थ्यांनी शिक्षणाच्या माध्यमातून प्रगती साधून समाजाच्या विकासात योगदान द्यावे, असे आवाहन केले. भगवान बिरसा मुंडा यांच्या संघर्षमय जीवनातून प्रेरणा घेऊन आदिवासी समाजातील विद्यार्थ्यांनी उच्च ध्येय निश्चित करून विविध क्षेत्रांत यश संपादन करावे, तसेच आदिवासी समाजाचा गौरवशाली इतिहास, संस्कृती व परंपरांचे जतन व संवर्धन करावे, असा संदेश यावेळी देण्यात आला.




Petrol Price




