भंडारा जिल्ह्यातील शासकीय आदिवासी वसतिगृहांमध्ये विशेष मार्गदर्शन शिबिराचे आयोजन

विदर्भ न्यूज एक्सप्रेस
प्रतिनिधी / भंडारा : आदिवासी विद्यार्थ्यांना उच्च शिक्षणाच्या विविध संधी उपलब्ध करून देण्यासोबतच त्यांना स्पर्धा परीक्षांसाठी प्रोत्साहित करणे आणि शासकीय शिष्यवृत्ती योजनांची माहिती देण्याच्या उद्देशाने भंडारा जिल्ह्यातील शासकीय आदिवासी मुलांच्या व मुलींच्या वसतिगृहांमध्ये विशेष मार्गदर्शन शिबिराचे आयोजन करण्यात आले. प्रकल्प अधिकारी, एकात्मिक आदिवासी विकास प्रकल्प, भंडारा यांच्या मार्गदर्शनाखाली १७ नोव्हेंबर रोजी आयोजित या शिबिरात विद्यापीठांचे विविध अभ्यासक्रम, उच्च शिक्षणाच्या संधी, शासकीय योजना तसेच विद्यार्थ्यांसाठी राबविण्यात येणाऱ्या विविध उपक्रमांची माहिती देण्यात आली.
यावेळी वसतिगृहांच्या गृहपालांनी विद्यार्थ्यांना महाराष्ट्र लोकसेवा आयोग (MPSC), केंद्रीय लोकसेवा आयोग (UPSC), कर्मचारी निवड आयोग (SSC), बँकिंग, रेल्वे, पोलीस व सैन्य भरती यांसारख्या विविध स्पर्धा परीक्षांची माहिती दिली. या परीक्षांची तयारी कशी करावी, अभ्यासाचे नियोजन, आवश्यक संदर्भ साहित्य आणि यशस्वी होण्यासाठी सातत्यपूर्ण प्रयत्नांचे महत्त्व याविषयी मार्गदर्शन करण्यात आले.
शिष्यवृत्ती योजनांची माहिती -
आर्थिक परिस्थितीमुळे आदिवासी विद्यार्थ्यांचे शिक्षण खंडित होऊ नये, यासाठी केंद्र व राज्य शासनाच्या आदिवासी विकास विभागामार्फत राबविण्यात येणाऱ्या विविध शिष्यवृत्ती आणि आर्थिक सहाय्य योजनांची माहिती देण्यात आली. उच्च शिक्षणासाठी उपलब्ध असलेल्या संधींचा लाभ घेऊन विद्यार्थ्यांनी शैक्षणिक प्रगती साधावी, असे आवाहनही यावेळी करण्यात आले.
या मार्गदर्शन शिबिराला वसतिगृहातील विद्यार्थ्यांनी उत्स्फूर्त प्रतिसाद दिला. विद्यार्थ्यांना शिक्षण, करिअर आणि स्पर्धा परीक्षांच्या दृष्टीने योग्य दिशा मिळावी, हा या उपक्रमाचा मुख्य उद्देश होता. प्रकल्प अधिकारी दीपक मा. हेडाऊ यांच्या मार्गदर्शनाखाली सर्व शासकीय आदिवासी वसतिगृहांचे गृहपाल तसेच संबंधित अधिकारी व कर्मचाऱ्यांनी शिबिराच्या यशस्वितेसाठी विशेष परिश्रम घेतले.




Petrol Price




