Petrol Price
तीळ वाणाच्या बियाण्यासाठी अर्ज करण्याचे आवाहन
विदर्भ न्यूज एक्सप्रेस
प्रतिनिधी / वर्धा : देशात खाद्यतेलाचे उत्पादन वाढवून आयात कमी करणे आणि शेतकऱ्यांचे उत्पन्न सुधारण्याच्या उद्देशाने केंद्र व राज्य शासनामार्फत राष्ट्रीय खाद्यतेल अभियान - तेलबिया जिल्ह्यात प्रभावीपणे राबविण्यात येत आहे. या अभियानांतर्गत जिल्ह्यातील तीळ उत्पादक शेतकऱ्यांसाठी उन्हाळी तीळ प्रात्यक्षिके आणि प्रमाणित बियाणे वितरण करण्यात येणार आहे. शेतकऱ्यांनी या योजनेचा लाभ घ्यावा, असे आवाहन जिल्हा अधीक्षक कृषी अधिकारी यांनी केले आहे.
जिल्ह्यासाठी प्रमाणित बियाणे वितरणाकरिता एकूण १० क्विंटल बियाण्याचे लक्ष्य असून यासाठी १ लाख ९७ हजार रुपये निधी मंजूर करण्यात आला आहे. तसेच १०० हेक्टर क्षेत्रावर उन्हाळी तीळ प्रात्यक्षिके आयोजित केली जाणार असून त्यासाठी ८ लाख रुपये निधी राखीव ठेवण्यात आला आहे.
या योजनेअंतर्गत शेतकऱ्यांना गेल्या ५ वर्षांतील उत्पादक व उच्च दर्जाच्या अधिसूचित तीळ वाणांचे प्रमाणित बियाणे उपलब्ध करून दिले जाईल. प्रात्यक्षिक गटातील शेतकऱ्यांना एकात्मिक कीड व्यवस्थापन व एकात्मिक अन्नद्रव्य व्यवस्थापन यांसारख्या आधुनिक तंत्रज्ञानाचे मार्गदर्शन व निविष्ठा संच दिले जातील. तसेच तज्ज्ञांच्या मार्गदर्शनाखाली शेतीशाळा आयोजित करून पेरणीपासून काढणी पर्यंतचे शास्त्रीय ज्ञान आणि मृदा तपासणी मोहिमेचा लाभ दिला जाणार आहे.
या योजनेचा लाभ घेण्यासाठी इच्छुक शेतकऱ्यांनी महाडीबीटी पोर्टलवर ऑनलाईन अर्ज करणे अनिवार्य आहे. अर्जांची निवड प्रथम अर्ज करणाऱ्यास प्रथम प्राधान्य या नियमानुसार केली जाईल, तसेच शेतकऱ्यांकडे ॲग्रीस्ट्रक फार्मर ओळखपत्र असणे आवश्यक आहे. अधिक माहितीसाठी नजीकच्या तालुका कृषी अधिकारी कार्यालय, मंडळ कृषी अधिकारी किंवा सहायक कृषी अधिकारी यांच्याशी संपर्क साधावा, असे कृषि विभागाने कळविले आहे.
