Petrol Price
धान खरेदीसाठी शेतकरी नोंदणीला ३० नोव्हेंबरपर्यंत मुदतवाढ
- ॲग्रीस्टॅक नोंदणी अनिवार्य; शेतकऱ्यांनी आवश्यक कागदपत्रांसह नोंदणी पूर्ण करावी
विदर्भ न्यूज एक्सप्रेस
प्रतिनिधी / भंडारा : किमान आधारभूत किंमत खरेदी योजनेंतर्गत खरीप पणन हंगाम २०२६-२०२७ मध्ये धान व भरडधान्य खरेदीसाठी शेतकऱ्यांच्या नोंदणी प्रक्रियेला आता ३० नोव्हेंबर २०२६ पर्यंत मुदतवाढ देण्यात आली आहे. यापूर्वी ही मुदत १५ ऑक्टोबर २०२६ पर्यंत होती.
केंद्र शासनाच्या मार्गदर्शक सूचनांनुसार, खरीप पणन हंगाम २०२६-२०२७ पासून या योजनेचा लाभ घेणाऱ्या शेतकऱ्यांची नोंदणी ॲग्रीस्टॅक (Agri Stack) प्रणालीद्वारे करणे अनिवार्य आहे. त्यानुसार, शेतकऱ्यांची BeAM Portal वर नोंदणी होण्यासाठी प्रथम ॲग्रीस्टॅक प्रणालीवर नोंदणी असणे आवश्यक आहे. ज्या शेतकऱ्यांची ॲग्रीस्टॅकवर नोंदणी पूर्ण झाली आहे, त्यांनाच BeAM Portal वर नोंदणी करता येणार आहे.
धान उत्पादक शेतकऱ्यांनी नोंदणीसाठी प्रत्यक्ष उपस्थित राहणे आवश्यक असून, नोंदणी प्रक्रियेदरम्यान लाईव्ह फोटो अपलोड करण्यात येणार आहे. यासाठी चालू हंगामातील पिकपेरा नमूद असलेला सातबारा उतारा, नमुना ८-अ, अद्ययावत बँक पासबुक अथवा रद्द केलेला धनादेश, अद्ययावत मोबाईल क्रमांक आणि आधार कार्ड ही कागदपत्रे सोबत आणावीत.
शेतकऱ्यांनी आपल्या तालुक्यातील जवळच्या पणन महासंघाच्या अ व ब वर्ग सभासद संस्थेच्या धान खरेदी केंद्रावर जाऊन ३० नोव्हेंबर २०२६ पूर्वी नोंदणी प्रक्रिया पूर्ण करावी. मुदतीत नोंदणी करून शासनाच्या किमान आधारभूत किंमत खरेदी योजनेचा लाभ घ्यावा, असे आवाहन जिल्हाधिकारी सावन कुमार आणि प्रभारी जिल्हा पणन अधिकारी एस. बी. चंद्रे यांनी केले आहे.
