Petrol Price
गोंदिया जिल्ह्यात १७१ नवीन कुष्ठरुग्णांचा शोध : सक्रिय रुग्णांची संख्या ४२३ वर
- विशेष शोध मोहिमेत १३ लाख ९१ हजार नागरिकांची तपासणी; १,३१४ आरोग्य पथकांचा सहभाग
विदर्भ न्यूज एक्सप्रेस
प्रतिनिधी / गोंदिया : राष्ट्रीय कुष्ठरोग निर्मूलन कार्यक्रमांतर्गत जिल्ह्यात २८ सप्टेंबर ते १४ ऑक्टोबर या कालावधीत राबविण्यात आलेल्या विशेष कुष्ठरोग शोध मोहिमेला यश आले आहे. या मोहिमेदरम्यान आरोग्य विभागाने जिल्ह्यात १७१ नवीन कुष्ठरुग्णांचा शोध घेतला आहे. नव्याने आढळलेल्या रुग्णांमुळे जिल्ह्यातील एकूण सक्रिय कुष्ठरुग्णांची संख्या ४२३ वर पोहोचली असून, या सर्व रुग्णांवर आरोग्य विभागामार्फत मोफत औषधोपचार सुरू करण्यात आले आहेत.
जिल्ह्यात एप्रिल महिन्यापासून २५२ कुष्ठरुग्ण सक्रिय होते. या रुग्णांवर यापूर्वीपासूनच उपचार सुरू होते. दरम्यान, कुष्ठरोगाचे वेळीच निदान करून त्याचा प्रसार रोखण्याच्या उद्देशाने आरोग्य विभागाने विशेष शोध मोहीम हाती घेतली. या मोहिमेत १७१ नवीन रुग्ण आढळल्याने जिल्ह्यातील सक्रिय रुग्णांची संख्या ४२३ झाली आहे. या सर्व रुग्णांना मोफत कुष्ठरोग प्रतिबंधक औषधे उपलब्ध करून देण्यात येत असल्याची माहिती सहाय्यक संचालक (कुष्ठरोग) डॉ. महेंद्र धनविजय यांनी दिली.
१७ दिवसांत ३ लाख ४० हजार घरांना भेटी -
विशेष कुष्ठरोग शोध मोहिमेच्या १७ दिवसांच्या कालावधीत आरोग्य पथकांनी जिल्ह्यातील एकूण ३ लाख ४० हजार ४१५ घरांना प्रत्यक्ष भेटी दिल्या. या गृहभेटींच्या माध्यमातून जिल्ह्यातील १३ लाख ९१ हजार २११ नागरिकांची आरोग्य तपासणी करण्यात आली. घराघरांत जाऊन नागरिकांची तपासणी केल्यामुळे कुष्ठरोगाची संभाव्य लक्षणे असलेल्या व्यक्तींचा शोध घेणे शक्य झाले. संशयित रुग्णांची ओळख पटवून त्यांना पुढील तपासणी व उपचारांसाठी आरोग्य यंत्रणेकडे पाठविण्यात आले.
१,३१४ आरोग्य पथकांचे योगदान -
जिल्ह्यात ही मोहीम प्रभावीपणे राबविण्यासाठी आरोग्य विभागाने व्यापक नियोजन केले होते. त्यानुसार संपूर्ण जिल्ह्यात १ हजार ३१४ विशेष आरोग्य पथकांची स्थापना करण्यात आली होती. या पथकांमध्ये आशा स्वयंसेविका आणि पुरुष स्वयंसेवकांचा समावेश होता. या पथकांनी ग्रामीण तसेच अतिदुर्गम भागांतील घराघरांत जाऊन नागरिकांची तपासणी केली.
कुष्ठरोगाचे वेळीच निदान झाल्यास नियमित औषधोपचारांद्वारे हा आजार पूर्णपणे बरा होऊ शकतो. त्यामुळे नागरिकांनी अंगावर फिकट किंवा संवेदनाहीन चट्टे अथवा त्वचेच्या संवेदनांमध्ये बदल जाणवल्यास दुर्लक्ष न करता तातडीने जवळच्या शासकीय आरोग्य केंद्रात तपासणी करून घ्यावी, असे आवाहन आरोग्य विभागामार्फत करण्यात येत आहे.
